yar log

yaum-e-mizaji yaron ki
sab meri dekhi-bhaali
raat ki tariki mein
un ki angara si aankhen
puri
din ko andhi aur adhuri
khali
din ke ye darwesh magar raaton ke wali
apne mohsin ko jab
din ke aaine mein dekhen
fart-e-adab se simten sikuden jhuk jaen
aur kuchle masale raunde lahje mein puchhen
kaisa hai mizaj-e-ali
raat ko lekin
pyar ka rasta kat ke niklen
jaise billi kali
in ki hai bas ek nishani
gali

tark-e-mohabbat ke baad

ghair ki ho ke bhi tum meri mohabbat chaho
is ghata-top andhere mein ye tare kaise
farsh par jis ko abhi tak na mili jae panah
arsh se chand ka aiwan utare kaise
jis ki rahon pe bhatakte hue jag bite hain
phir usi dasht ko bad-bakht sudhaare kaise
qafile aae gae gard uthi baith gai
ab musafir ko ufuq par se ishaare kaise
jin ki taqdir mein tha daman-e-gulchin ka mazar
wo shagufe to parae hain hamare kaise
pesh kar sakta hun lekin tujhe bahlane ko
chandni-raat mein machle hue ruman ki yaad
bed-e-majnun ke tilismat se pal-pal chhanti
aasmanon ko lapakti hui ek tan ki yaad
meri waraftagi-e-shauq ki sun kar rudad
teri aankhon mein damakte hue arman ki yaad
donon chehron pe shafaq donon jabinon pe araq
donon sinon mein dhadakte hue haijaan ki yaad
kaun hain aap meri zist ki tanhai sathi
pahli pahchan ki yaad aakhiri paiman ki yaad

mujhe talash karo

shajar se tut ke jab main gira kahan pe gira
mujhe talash karo
jin aandhiyon ne meri sar-zamin udhedi thi
wo aaj maulid-e-isa mein gard udati hain
jo ho sake to unhi se mera pata puchho
mujhe talash karo
chali jo mashriq-o-maghrib se tund-o-tez hawa
mere shajar ne mujhe pyar se samet liya
mujhe lapet liya apni kitni bahon mein
ye be-lihaz anasir magar ba-zid hi rahe
main barg-e-sabz gira barg-e-zard ki manind
usi sulagti hui rakh si patawar mein
jo bichh rahi hai ufuq se ufuq ke par talak
mujhe talash karo
shajar se kat ke zaban kat gai na ho meri
main chikhta hun magar harf-e-na-shunida hun
hayat-e-taza hai meri shajar se mera milap
ki bas wahi meri baalidgi ka mamba hai
jo regzar mein chhitnar dekhne hain tumhein
mujhe talash karo
falak ke raaz to khulte rahenge ham-nafaso
mere wajud ka bhi ab to raaz fash karo
mujhe talash karo

mear

shair ab tak to ye kahta tha ki mera mahbub
kuchh is andaz se chup-chap mere pas aaya
jaise phulon pe utarti hai subuk-pa shabnam
lekin is daur ko kya jaaniye kya rog laga
ab to mahbub ki aamad bhi nahin hashr se kam
ek ek sans mein hain kitne chhanake barpa
ab to mas karti hai jab aise ezar-e-gul se
aisi aawaz se gunj uthti hai gulshan ki faza
jaise jalte hue jangal pe baras jae ghata
fan ke mear badalte to hain lekin ab ke
is qadar shor hai kyun ai mere khamosh khuda

izhaar

tujhe izhaar-e-mohabbat se agar nafrat hai
tu ne honton ko larazne se to roka hota
be-niyazi se magar kanpti aawaz ke sath
tu ne ghabra ke mera nam na puchha hota
tere bas mein thi agar mashal-e-jazbaat ki lau
tere rukhsar mein gulzar na bhadka hota
yun to mujh se huin sirf aab-o-hawa ki baaten
apne tute hue fiqron ko to parkha hota
yunhi be-wajh thitakne ki zarurat kya thi
dam-e-rukhsat main agar yaad na aaya hota
tera ghammaz bana khud tera andaz-e-khiram
dil na sambhla tha to qadmon ko sambhaala hota
apne badle meri taswir nazar aa jati
tu ne us waqt agar aaina dekha hota
hausla tujh ko na tha mujh se juda hone ka
warna kajal teri aankhon mein na phaila hota

agar hai jazba-e-tamir zinda

agar hai jazba-e-tamir zinda
to phir kis chiz ki hum mein kami hai
jahan se phul tuta tha wahin se
kali si ek numayan ho rahi hai
jahan bijli giri thi ab wahi shakh
nae patte pahan kar tan gai hai
khizan se ruk saka kab mausam-e-gul
yahi asl-e-usul-e-zindagi hai
agar hai jazba-e-tamir zinda
khandar se kal jahan bikhre pade the
wahin se aaj aiwan uth rahe hain
jahan kal zindagi mabhut si thi
wahin par aaj naghme gunjte hain
ye sannate se li hai samt-e-hijrat
yahi asl-e-usul-e-zindagi hai
agar hai jazba-e-tamir zinda
to phir kis chiz ki hum mein kami hai
rahe yakh-bastagi ka khauf jab tak
shuaen barf par larzan rahengi
na dhire jam nahin paenge jab tak
charaghon ki lawen raqsan rahengi
bashar ki apni hi taqdir se jang
yahi asl-e-usul-e-zindagi hai
agar hai jazba-e-tamir zinda
to phir kis chiz ki hum mein kami hai