wo nazar hai suragh mein dil ke

By

wo nazar hai suragh mein dil ke
phul mahke hain dagh mein dil ke
hasraton ki na puchh kaifiyyat
khun-e-dil hai ayagh mein dil ke
jal bujhi ek ek aas magar
gul hai raushan-charagh mein dil ke
wo jo aae to aae subh-e-bahaar
ghup andhera hai bagh mein dil ke
phir usi gul-badan ki yaad aai
phir mahak si hai dagh mein dil ke
yun jhalakta hai pyar un aankhon mein
chand jaise ayagh mein dil ke

wahshat-e-gham mein sukun zist ko milta bhi kahan

By

wahshat-e-gham mein sukun zist ko milta bhi kahan
tha bayaban mein diwar ka saya bhi kahan
ek muddat se na yaad aai na jaan tadpi hai
dil tujhe bhul gaya ho magar aisa bhi kahan
husn bhi wo na raha pahla sa dildar-e-hunar
aah pahli si wo ab azmat-e-tesha bhi kahan
maslahat-bin hai agar ishq-e-junun-pesha to kya
ab wo pahle ki tera wusat-e-sahra bhi kahan
koi manzil hi na thi manzil-e-gham se aage
qafila apni tamannaon ka rukta bhi kahan
ghair-mahdud khalaon mein safar karta hun
aur rasai ka ye aalam hai ki bhatka bhi kahan
nikhat-o-nur se mamur faza hai phir bhi
to ki is rahguzar se abhi guzra bhi kahan
haram-o-dair se ye sar jo kashida aaya
jhuk gaya dar pe tere aur ye jhukta bhi kahan
khak udata hai abhi dasht-e-talab hi mein 'salam'
dil-e-ruswa ye hua hai abhi ruswa bhi kahan

wafa ke wade hue zindagi ke KHwab hue

By

wafa ke wade hue zindagi ke khwab hue
tumhaare ahd-e-karam mein sabhi kharab hue
badal gain wo fazaen tere badalte hi
mahakte khwab sulagte hue sarab hue
meri hayat ki tarikiyan simat na sakin
baja ke mah hue aap aaftab hue
main sochta hun ki wo log jaane kya honge
jinhon ne pyar kiya aur kaamyab hue
hamare mel mein qudrat ka hath shamil hai
chalo main khar sahi aap agar gulab hue

tah-e-daman charagh raushan hai

By

tah-e-daman charagh raushan hai
zist meri baqa ka bachpan hai
shikwa-e-zulm-o-jaur kis se karen
aadmi aadmi ka dushman hai
ek alaw hai ye dahakta hua
tumhein jis par guman-e-gulshan hai
phunk raha hai chaman chaman lekin
aap farma rahe hain sawan hai
kaun hasti ke silsile ko bujhae
ek se ek dip raushan hai
zindagi se kahan farar 'salam'
sina-e-marg mein bhi dhadkan hai

raat-din is tarah guzarte hain

By

raat-din is tarah guzarte hain
hum na jite hain aur na marte hain
log hairan hon is zamane mein
kaise hans hans ke zist karte hain
koi ja kar khizan se kah aae
phul gulshan mein phir nikharte hain
aap ko dekh kar ye sochta hun
aasman se bhi log utarte hain
gham ke hathon bigad gae hum to
wo bhi honge ki jo sanwarte hain
rashk se nam tak nahin lete
dam magar aap hi ka bharte hain

na dil mein gham na honTon par hansi hai

By

na dil mein gham na honton par hansi hai
khudawanda ye kaisi zindagi hai
tere wade pe jite hain jiyenge
magar ye pairahan bhi kaghzi hai
udhar wo chand ki dhun mein magan hain
udhar apni ye be-baal-o-pari hai
chamakti bijliyan hi bijliyan hain
chaman mein raushni hi raushni hai
basa-auqat ye hota hai mahsus
ki nabz-e-zindagi ruk si gai hai