tumne bimar-e-mohabbat ko abhi kya dekha

tum ne bimar-e-mohabbat ko abhi kya dekha
jo ye kahte hue jate ho ki dekha dekha
tifl-e-dil ko mere kya jaane lagi kis ki nazar
main ne kambakht ko do din bhi na achchha dekha
le gaya tha taraf-e-gor-e-ghariban dil-e-zar
kya kahen tum se jo kuchh wan ka tamasha dekha
wo jo the raunaq-e-abaadi-e-gulzar-e-jahan
sar se pa tak unhen khak-e-rah-e-sahra dekha
kal talak mahfil-e-ishrat mein jo the sadr-nashin
qabr mein aaj unhen be-kas-o-tanha dekha
bas-ki nairangi-e-alam pe use hairat thi
aaina khak-e-sikandar ko sarapa dekha
sar-e-jamshed ke kase mein bhari thi hasrat
yas ko moatakif-e-turbat-e-dara dekha

raushan dil-e-arif se fuzun hai badan un ka

raushan dil-e-arif se fuzun hai badan un ka
rangin hai tabiat ki tarah pairahan un ka
mahrum hi rah jati hai aaghosh-e-tamanna
sharm aa ke chura leti hai sara badan un ka
jin logon ne dil mein tere ghar apna kiya hai
bahar hai do-alam se meri jaan watan un ka
har baat mein wo chaal kiya karte hain mujh se
ulfat na nibhegi jo yahi hai chalan un ka
aariz se gharaz hum ko anadil ko hai gul se
hai kucha-e-mashuq hamara chaman un ka
hai saf nigahon se ayan josh-e-jawani
aankhon se sambhalta nahin mastana-pan un ka
ye sharm ke mani hain haya kahte hain is ko
aaghosh-e-tasawwur mein na aaya badan un ka
ghairon hi pe chalta hai jo ab naz ka khanjar
kyun beach mein laya tha mujhe bankpan un ka
ghairon ne kabhi pak nazar se nahin dekha
wo us ko na samjhen to ye hai husn-e-zan un ka
is zulf-o-rukh-o-lab pe unhen kyun na ho nakhwat
tatar hai un ka halab un ka yaman un ka
allah re fareb-e-nazar-e-chashm-e-fusun-saz
banda hai har ek shaikh har ek barahman un ka
aaya jo nazar husn-e-khuda-dad ka jalwa
but ban gaya munh dekh ke har barahman un ka
marqad mein utara hamein tewri ko chadha kar
hum mar bhi gae par na chhuta bankpan un ka
guzri hui baaten na mujhe yaad dilao
ab zikr hi jaane do tum ai jaan-e-man un ka
dilchasp hi aafat hai qayamat hai ghazab hai
baat un ki ada un ki qad un ka chalan un ka

na hasil hua sabr-o-aram dil ka

na hasil hua sabr-o-aram dil ka
na nikla kabhi tum se kuchh kaam dil ka
mohabbat ka nashsha rahe kyun na har-dam
bhara hai mai-e-ishq se jam dil ka
phansaya to aankhon ne dam-e-bala mein
magar ishq mein ho gaya nam dil ka
hua khwab ruswa ye ishq-e-butan mein
khuda hi hai ab mere badnam dil ka
ye banki adaen ye tirchhi nigahen
yahi le gain sabr-o-aram dil ka
dhuan pahle uthta tha aaghaz tha wo
hua khak ab ye hai anjam dil ka
jab aaghaz-e-ulfat hi mein jal raha hai
to kya khak batlaun anjam dil ka
khuda ke liye pher do mujh ko sahab
jo sarkar mein kuchh na ho kaam dil ka
pas-e-marg un par khula haal-e-ulfat
gai le ke ruh apni paigham dil ka
tadapta hua yun na paya hamesha
kahun kya main aaghaz-o-anjam dil ka
dil us be-wafa ko jo dete ho 'akbar'
to kuchh soch lo pahle anjam dil ka

hasinon ke gale se lagti hai zanjir sone ki

hasinon ke gale se lagti hai zanjir sone ki
nazar aati hai kya chamki hui taqdir sone ki
na dil aata hai qabu mein na nind aati hai aankhon mein
shab-e-furqat mein kyun kar ban pade tadbir sone ki
yahan bedariyon se khun-e-dil aankhon mein aata hai
gulabi karti hai aankhon ko wan tasir sone ki
bahut bechain hun nind aa rahi hai raat jati hai
khuda ke waste jald ab karo tadbir sone ki
ye zarda chiz hai jo har jagah hai bais-e-shaukat
suni hai aalam-e-baala mein bhi tamir sone ki
zarurat kya hai rukne ki mere dil se nikalta rah
hawas mujh ko nahin ai nala-e-shab-gir sone ki
chhapar-khat yan jo sone ki banai is se kya hasil
karo ai ghafilo kuchh qabr mein tadbir sone ki

haram kya dair kya donon ye viran hote jate hain

haram kya dair kya donon ye viran hote jate hain
tumhaare mo'taqid gabru musalman hote jate hain
alag sab se nazar nichi khiram aahista aahista
wo mujh ko dafn kar ke ab pasheman hote jate hain
siwa tifli se bhi hain bholi baaten ab jawani mein
qayamat hai ki din par din wo nadan hote jate hain
kahan se launga khun-e-jigar un ke khilane ko
hazaron tarah ke gham dil ke mehman hote jate hain
kharabi khana-ha-e-aish ki hai daur-e-gardun mein
jo baqi rah gae hain wo bhi viran hote jate hain
bayan main kya karun dil khol kar shauq-e-shahadat ko
abhi se aap to shamshir-e-uryan hote jate hain
ghazab ki yaad mein ayyariyan wallah tum ko bhi
gharaz qael tumhaare hum to ai jaan hote jate hain
udhar hum se bhi baaten aap karte hain lagawat ki
udhar ghairon se bhi kuchh ahd-o-paiman hote jate hain

agar dil waqif-e-nairangi-e-tab-e-sanam hota

agar dil waqif-e-nairangi-e-tab-e-sanam hota
zamane ki do-rangi ka use hargiz na gham hota
ye paband-e-musibat dil ke hathon hum to rahte hain
nahin to chain se katti na dil hota na gham hota
unhin ki be-wafai ka ye hai aathon-pahar sadma
wahi hote jo qabu mein to phir kahe ko gham hota
lab-o-chashm-e-sanam gar dekhne pate kahin shair
koi shirin-sukhan hota koi jadu-raqam hota
bahut achchha hua aae na wo meri ayaadat ko
jo wo aate to ghair aate jo ghair aate to gham hota
agar qabren nazar aatin na dara-o-sikandar ki
mujhe bhi ishtiyaq-e-daulat-o-jah-o-hasham hota
liye jata hai josh-e-shauq hum ko rah-e-ulfat mein
nahin to zoaf se dushwar chalna do-qadam hota
na rahne pae diwaron mein rauzan shukr hai warna
tumhein to dil-lagi hoti gharibon par sitam hota