yun sang-dil hayat se ahd-o-wafa kiya

By

yun sang-dil hayat se ahd-o-wafa kiya
diwar darmiyan thi magar khud ko wa kiya
mitti ka rang-o-nur se rishta qadim tha
har bar zindagi ne naya tajraba kiya
the dastaras mein yun to sab asrar-e-kaenat
is umr-e-bewafa ne magar na-rasa kiya
har ajnabi maqam se tanha guzar gae
apna hi naqsh-e-pa tha jise rahnuma kiya
chamka diya lahu ne dil-e-tira-jism ko
ek sail-e-nur tha ki ragon mein baha kiya
danista lut gaya ye saman-zar dekhna
phulon ne nikhaton ko sipurd-e-saba kiya
ye raat raushni ki tamanna mein bujh gai
dil ko ye kis shikast ne be-muddaa kiya
yun to jahan tamam hai tufan-e-rang-o-nur
kis aabshaar ne hamein rangin-nawa kiya

sar Takraen jis se wo diwar kahan

By

sar takraen jis se wo diwar kahan
jism kahan aur ruh ka ye aazar kahan
tanhai ka kab ye aalam tha pahle
chhut gae hain mujh se mere yar kahan
andhe shahar ke sab aaine andhe hain
aise mein khud apna bhi didar kahan
tuti tuti chand shabihen baqi hain
dil mein ab yaadon ka wo ambar kahan
mere andar mujh se ladta hai koi
is paikar mein jit kahan aur haar kahan
ruh do-nim aur jism bhi hai reza reza
khak udata phirta hai pindar kahan
kyun ye kashti dol rahi hai lahron par
tuta hai is kashti ka patwar kahan

paiham ek iztirab ajab KHushk-o-tar mein tha

By

paiham ek iztirab ajab khushk-o-tar mein tha
main ghar mein aa ruka tha mera ghar safar mein tha
kya raushni thi jis ko ye aankhen taras gain
kya aag thi ki jis ka dhuan mere sar mein tha
bas ek dhund khwabon ki fikr-o-khayal mein
bas ek lams dard ka sham-o-sahar mein tha
har ahd ko samete hue chal raha tha main
nadida saaton ka ujala nazar mein tha
har lamha tha talash ki sadiyan liye hue
meri baqa ka raaz hi ilm-o-khabar mein tha

juzw-o-kul ka hum is andaz se rishta samjhe

By

juzw-o-kul ka hum is andaz se rishta samjhe
dekh kar qatre ko mahiyyat-e-dariya samjhe
har ada teri ham-ahang thi dil se itni
har ada ko teri hum dil ka taqaza samjhe
hum wo khud-bin hain ki hangama-e-dil ke aage
sare hangama-e-giti ko tamasha samjhe
hum ko mitti ke gharondon ki haqiqat malum
jism ki khak ko hum nafs ka saya samjhe
hum ki har nisbat-e-mauhum ko apnate rahe
ek shikasta se talluq ko bhi kitna samjhe
ustuwar itna hua rishta-e-awaz 'akbar'
dil ki dhadkan ko bhi hum dost ka lahja samjhe

hum jahan rahte hain KHwabon ka nagar hai koi

By

hum jahan rahte hain khwabon ka nagar hai koi
is kharabe mein na diwar na dar hai koi
ja basa tha jo kisi hijr ke sahra mein kabhi
ai hawao kaho is dil ki khabar hai koi
surat-e-mauj-e-saba log idhar se guzre
ye to anjaani hawaon ki dagar hai koi
hijr-e-didar bhi mahrumi-e-didar bhi hijr
jo kabhi khatm na ho aisa safar hai koi
main ki andar se pighalta hi chala jata hun
mere yakh-basta badan mein bhi sharar hai koi
ye faza ras nahin dasht-mizajon ke liye
is saman-zar mein patthar hai na sar hai koi
jism aur jaan ka ye aazar ye mahshar 'akbar'
kisi andesha-e-baatin ka asar hai koi

ek jal-thal thi kal tak ye zamin ye dasht bhi kal tak dariya the

By

ek jal-thal thi kal tak ye zamin ye dasht bhi kal tak dariya the
ye shor tha kal ek sannata ye shahar bhi kal tak sahra the
aaghaz apna wahshat basri anjam apna shorida-sari
hum aaj bhi hain badnam bahut hum kal bhi nihayat ruswa the
tanhai-e-zat ka saya hai tanhai apna wirsa hai
hum aaj bhi hain tanha tanha hum kal bhi tanha tanha the
mazi ke kharabon mein bhi kahin lau deta raha suraj apna
mazi ke kharabon mein bhi hum ek khwab-e-jahan-farda the
apna hi to hai shahkar-e-amal tahzib ka ye zindan 'akbar'
hum aaj hain shahron ke qaidi kal tak aawara-e-sahra the