zindagi ke darwaze par

By

pa-barhana-o-sarasima sa ek jamm-e-ghafir
apne hathon mein liye mashal-e-be-shoala-o-dud
muztarib ho ke gharondon se nikal aaya hai
jaise ab tod hi dalega ye barson ka jumud
un papoton mein ye pathrai hui si aankhen
jin mein farda ka koi khwab ujagar hi nahin
kaise dhundengi dar-zist kahan dhundengi
un ko wo tishnagi-e-shauq mayassar hi nahin
jaise sadiyon ke chatanon pe tarashe hue but
ek diwane musawwir ki tabiat ka ubaal
nachte nachte ghaaron se nikal aae hon
aur wapas inhin ghaaron mein ho jaane ka khayal
zindagi apne darichon mein hai mushtaq abhi
aur ye raqs-e-tilismana ke rangin sae
us ki nazron ko diye jate hain paiham dhoke
jaise bas aankh jhapakne mein wo ud kar aae
shahpar-e-maut kisi ghul-e-bayaban ki tarah
qahqahe bharta hai khamosh fazaon mein sada
kanpte kanpte ek bar simat jati hai
ek tarik sa parda yunhi aawezan raha
koi darwaze pe dastak hai na qadmon ka nishan
chand pur-haul se asrar tah-e-saya-e-dar
khud hi sargoshiyan karte hain koi jaise kahe
phir palat aae ye kam-bakht wahi sham-o-sahar
nachta rahta hai darwaze ke bahar ye hujum
apne hathon mein liye mashal-e-be-shoala-o-dud
zindagi apne darichon mein hai mushtaq abhi
kya khabar tod hi de badh ke koi qufl-e-jumud

wapsi

By

khamosh hai gung hai siyah-posh
mazi ke mahal ki kohna diwar
tuta nahin be-hisi ka pindar
chhoda tha usi mahal ke pichhe
ahbab ko sirf naghma-o-saz
rakhte the shararaton ki buniyaad
hota tha mohabbaton ka aaghaz
lauta hun to mahfilen hain khamosh
aati nahin qahqahon ki aawaz
zindan ki hadon mein kho gae hain
diwane bahal ke so gae hain
darwazon pe de raha hun aawaz
khamosh hai gung hai siyah-posh
mazi ke mahal ki kohna diwar
phailae hue zamin hai aaghosh
tariki mein dhundhta hun rahen
suraj ko taras gain nigahen

tanhai mein

By

mere shanon pe tera sar tha nigahen namnak
ab to ek yaad si baqi hai so wo bhi kya hai
ghar gaya zehn gham-e-zist ke andazon mein
har hatheli pe dhare soch raha hun baitha
kash us waqt koi pir-e-khamida aa kar
kisi aazurda tabiat ka fasana kahta
ek dhundlaka sa hai dam tod chuka hai suraj
din ke daman pe hain dhabbe se riya-kari ke
aur maghrib ki fana-gah mein phaila hua khun
dabta jata hai siyahi ki tahon ke niche
dur talab ke nazdik wo sukhi si babul
chand tute hue viran makanon se pare
hath phailae barahna si khadi hai khamosh
jaise ghurbat mein musafir ko sahaara na mile
us ke pichhe se jhijakta hua ek gol sa chand
ubhra be-nur shuaon ke safine ko liye
main abhi soch raha hun ki agar tu mil jae
zindagi-go hai giran-bar pa itni na rahe
chand aansu gham-e-giti ke liye chand nafas
ek ghaw hai jise yun hi siye jate hain
main agar ji bhi raha hun to tajjub kya hai
mujh se lakhon hain jo be-sud jiye jate hain
koi markaz hi nahin mere takhayyul ke liye
is se kya faeda jite rahe aur ji na sake
ab irada hai ki patthar ke sanam pujunga
taki ghabraun to takra bhi sakun mar bhi sakun
aise insanon se patthar ke sanam achchhe hain
un ke qadmon pe machalta ho damakta hua khun
aur wo meri mohabbat pe kabhi hans na saken
main bhi be-rang nigahon ki shikayat na karun
ya kahin gosha-e-ahram ke sannate mein
ja ke khwabida farain se itna puchhun
har zamane mein kai the ki khuda ek hi tha
ab to itne hain ki hairan hun kis ko pujun
ab to maghrib ki fana-gah mein wo sog nahin
aks tahrir hai ek raat ka halka halka
aur pur-soz dhundalke se wahi gol sa chand
apni be-nur shuaon ka safina kheta
ubhra namnak nigahon se mujhe takta hua
jaise ghul kar mere aansu mein badal jaega
hath phailae udhar dekh rahi hai wo babul
sochti hogi koi mujh sa hai ye bhi tanha
aaina ban ke shab-o-roz taka karta hai
kaisa talab hai jo us ko hara kar na saka
yun guzare se guzar jaenge din apne bhi
par ye hasrat hi rahegi ki guzare na gae
khun pi pi ke pila karti hai angur ki bel
gar yahi rang-e-tamanna tha chalo yunhi sahi
khun piti rahi badhti rahi konpal konpal
chhanw taron ki shagufon ko numu deti rahi
narm shakhon ko thapakte rahe ayyam ke hath
yunhi din bit gae subh hui sham hui
ab magar yaad nahin kya tha maal-e-ummid
ek tahrir hai halki si lahu ki baqi
bel phalti hai to kanton ko chhupa leti hai
zindagi apni pareshan thi pareshan hi rahi
chahta ye tha mere zakhm ke angur bandhen
ye na chaha tha mera jam-e-tahi rah jae
hath phailae udhar dekh rahi hai wo babul
sochti hogi koi mujh sa hai ye bhi tanha
ghir gaya zehn gham-e-zist ke andazon mein
kaisa talab hai jo us ko hara kar na saka
kash is waqt koi pir-e-khamida aa kar
mere shanon ko thapakta gham-e-tanhai mein

tafaut

By

hum kitna roe the jab ek din socha tha hum mar jaenge
aur hum se har nemat ki lazzat ka ehsas juda ho jaega
chhoti chhoti chizen jaise shahd ki makkhi ki bhin bhin
chidiyon ki chun chun kawwon ka ek ek tinka chunna
nim ki sab se unchi shakh pe ja kar rakh dena aur ghonsla bunna
sadken kutne wale engine ki chhuk chhuk bachchon ka dhul udana
aadhe nange mazduron ko pyaz se roti khate dekhe jaana
ye sab la-yani bekar mashaghil baithe baithe ek dam chhin jaenge
hum kitna roe the jab pahli bar ye khatra andar jaga tha
is gardish karne wali dharti se rishta tutega hum jamid ho jaenge
lekin kab se lab sakit hain dil ki hangama-arai ki
barson se aawaz nahin aai aur is marg-e-musalsal par
in kam-maya aankhon se ek qatra aansu bhi to nahin tapka

picnic

By

saman suhana tha thandi hua ke jhonkon se
badan ko tazgi milti thi ruh mein jaise
izafa hota sa mahsus ho raha tha mujhe
faza mein udte hue mast abr ke tukde
ye lag raha tha bahaaron ke hain faristade
khayal aaya ki mausam ka lutf len sab dost
mare to jate hain jine ko aaj khul ke jien
azim shahr ki aaluda is faza se pare
kahin bhi mil ke chalen sath baithen khaen piyen
mera padosi bada pyara aadmi tha use
gali mein aan ke aawaz di ghulam-rasul
man mujhe ye khayal aaya mera ham-saya
ab is jahan mein nahin ban chuka hai waqt ki dhul
jo pichhle sal achanak bhadak uthe the yahan
wo firqa-wari fasadat kha gae us ko

naqsh-e-pa

By

ye nim-khwab ghas par udas udas naqsh-e-pa
kuchal raha hai shabnami libas ki hayat ko
wo motiyon ki barishen faza mein jazb ho gain
jo khak-dan-e-tira par baras rahi thin raat ko
ye rahrawan-e-zindagi khabar nahin kahan gae
wo kaun sa jahan hai azal nahin abad nahin
daraaz se daraaz-tar hain halqa-ha-e-roz-o-shab
ye kis maqam par hun main ki bandishon ki had nahin
hai markaz-e-nigah par chatan si khadi hui
udhar chatan se pare wasia-tar hai tirgi
use phalang bhi gaya to is taraf khabar nahin
adam kharab-tar mile na maut ho na zindagi
hazar bar chahta hun bandishon ko tod dun
magar ye aahani rasan ye halqa-ha-e-bandagi
lipat gae hain panw se lahu mein jazb ho gae
main naqsh-pa-e-umr hun fareb-khurda-e-khushi
koi naya ufuq nahin jahan nazar na aa saken
ye zard zard suraten ye haddiyon ke jod se
hawa ke bazuon mein kash itni tab aa sake
dikha saken wo ahd-e-nau hi zindagi ke mod se