zamin ke sare manazir se kaT ke sota hun

By

zamin ke sare manazir se kat ke sota hun
main aasman ke safar se palat ke sota hun
main jama karta hun shab ke siyahi qatron ko
ba-waqt-e-subh phir un ko palat ke sota hun
talash dhup mein karta hun sara din khud ko
tamam-raat sitaron mein bat ke sota hun
kahan sukun ki shab-o-roz ghumna us ka
zara zamin ke mehwar se hat ke sota hun
tere badan ki khalaon mein aankh khulti hai
hawa ke jism se jab jab lipat ke sota hun
main jag jag ke raaten guzarne wala
ek aisi raat bhi aati hai dat ke sota hun

ye kisi shaKHs ko khone ki talafi Thahra

By

ye kisi shakhs ko khone ki talafi thahra
mera hona mere hone mein izafi thahra
jurm-e-adam teri padash thi duniya sari
aakhirash har koi haq-dar-e-muafi thahra
ye hai tafsil ki yak-lamha-e-hairat tha koi
mukhtasar ye ki meri umr ko kafi thahra
kuchh ayan ho na saka tha teri aankhon jaisa
wo badan ho ke barahna bhi ghilafi thahra
jab zamin ghum rahi ho to thaharna kaisa
koi thahra to thaharne ke munafi thahra
qafiya milte gae umr ghazal hoti gai
aur chehra tera buniyaad-e-qawafi thahra

wo apne band-e-qaba kholti to kya lagti

By

wo apne band-e-qaba kholti to kya lagti
khuda ke waste koi kahe khuda-lagti
yaqin thi to yaqin mein sama gai kaise
guman thi to guman se bhi mawara lagti
agar bikharti to suraj kabhi nahin ugta
tera khayal ki wo zulf bas ghata lagti
tere mariz ko duniya mein kuchh nahin lagta
dawa lage na raqibon ki bad-dua lagti
hui hai qaid zamane mein raushni kis se
bhala wo jism aur us ko koi qaba lagti
lagi wo tujh si to aalam mein munfarid thahri
wagarna aam si lagti agar juda lagti

rudad-e-jaan kahen jo zara dam mile hamein

By

rudad-e-jaan kahen jo zara dam mile hamein
us dil ke raste mein kai kham mile hamein
labbaik pahle hum ne kaha tha rasul-e-husn
ho kar-zar-e-ishq to parcham mile hamein
aae ek aisa zakhm jo bharna na ho kabhi
yani har ek zakhm ka marham mile hamein
din mein jahan sarab mile the hamein wahan
aai jo raat qatra-e-shabnam mile hamein
tum jaise aur log bhi honge jahan mein
ye baat aur hai ki bahut kam mile hamein
jab sath the to mil ke bhi milna na ho saka
jab se bichhad gae ho to paiham mile hamein
aur phir hamein bhi khud pe bahut pyar aa gaya
us ki taraf khade hue jab hum mile hamein
jo umr-bhar ka sath nibhata na mil saka
waise to zindagi mein bahut gham mile hamein

nind ke bojh se palkon ko jhapakti hui aai

By

nind ke bojh se palkon ko jhapakti hui aai
subh jab raat ki galiyon mein bhatakti hui aai
dida-e-khushk mein ek mahi-e-be-ab thi nind
chashma-e-khwab talak aai phadakti hui aai
aur phir kya hua kuchh yaad nahin hai mujh ko
ek bijli thi ki sine mein lapakti hui aai
aaj kya phir kisi aawaz ne baiat mangi
ye meri khamushi jo panw patakti hui aai
raat ghabra gai suraj se kaha al-madade
wo ba-sad-naz jo zulfon ko jhatakti hui aai
ho gai khair tera nam na aaya lab par
ek aahat teri khushbu mein mahakti hui aai
waqt-e-rukhsat meri aankhon ki tarah chup thi jo yaad
ai mere dil teri manind dhadakti hui aai

maddham hui to aur nikharti chali gai

By

maddham hui to aur nikharti chali gai
zinda hai ek yaad jo marti chali gai
thi zindagi ki misl shab-e-hijr dosto
aur zindagi ki misl guzarti chali gai
hum se yahan to kuchh bhi sameta na ja saka
hum se har ek chiz bikharti chali gai
aae the chand zakhm guzar-gah-e-waqt par
guzri hawa-e-waqt to bharti chali gai
ek ashk qahqahon se guzarta chala gaya
ek chikh khamushi mein utarti chali gai
har rang ek rang se ham-rang ho gaya
taswir zindagi ki ubharti chali gai