wo jaanta hai uski dalilon mein dam nahin

By

wo jaanta hai us ki dalilon mein dam nahin
phir bhi mubahison ka use shauq kam nahin
puchho zara ye kaun si duniya se aae hain
kuchh log kah rahe hain hamein koi gham nahin
kis kis ke ehtiram mein sar ko jhukaun main
mere alawa kaun yahan mohtaram nahin
milta hai jin se rah-nawardon ko hausla
mere liye wo log bhi manzil se kam nahin
hum karobar-e-dil ko kahen kis tarah ghalat
honge bahut se log khasare mein hum nahin

un se bhi kahan meri himayat mein hila sar

By

un se bhi kahan meri himayat mein hila sar
kahte the jo har baat pe hazir hai mera sar
han ye hai ki aahista-kalami ka hun mujrim
khamosh-mizaji to hai ilzam sarasar
jis rose se aaya hai ye qatil ki nazar mein
us rose se jhukne ki ada bhul gaya sar
ghairat ke muqabil thi zarurat bhi hawas bhi
ye marka mushkil tha magar hum ne kiya sar
ek rose ek insan ne mujhe kah diya insan
us rose bahut der na sajde se utha sar

tamannaen jawan thin ishq farmane se pahle

By

tamannaen jawan thin ishq farmane se pahle
shagufta the ye sare phul kumhlane se pahle
hifazat ki koi surat nikal aati hai aksar
main tum ko dhund hi leta hun kho jaane se pahle
bhala wo log kya jaanen safar ki lazzaton ko
jinhen manzil mili ho thokaren khane se pahle
meri wahshat mere sahra mein un ko dhundhti hai
jo the do-chaar chehre jaane pahchane se pahle
junun ki manzilen aasan nahin ye soch lena
kai gulshan padenge tum ko virane se pahle

har ek ranj-o-gham se subuk-dosh ho ja

By

har ek ranj-o-gham se subuk-dosh ho ja
use yaad kar aur madhosh ho ja
nazar us ki chahe to nazren jhuka le
hai kuchh arz karna to khamosh ho ja
sukun ke liye be-sukun dil ko mat kar
pareshaniyon se ham-aghosh ho ja
nikal parsai ke khatron se bahar
tu mai-nosh hai to bala-nosh ho ja
hai tashhir ka sab se achchha ye nuskha
achanak kisi rose ru-posh ho ja