zindagi yun karen basar kab tak

By

zindagi yun karen basar kab tak
hum milenge nahin magar kab tak
tum ba-zahir jo la-talluq ho
aur hum tum se darguzar kab tak
raste raste guman tera
aur tanha karun safar kab tak
aah nikle na kab talak aakhir
khun hota rahe jigar kab tak
aao dekhen ye hijr ka sahra
aur karta hai dar-ba-dar kab tak
ek ummid-e-wasl hai lekin
ek ummid pe guzar kab tak

yahi hona tha aur hua jaanan

By

yahi hona tha aur hua jaanan
ho gae hum juda juda jaanan
koi aasan na thi teri furqat
main haqiqat mein ro pada jaanan
tere andar hun main hi main har su
mere andar tu ja-ba-ja jaanan
hans ke milta hai har koi aise
jaise har shakhs ho khafa jaanan
ab main chalta hun chal khuda-hafiz
shahr ye wo nahin raha jaanan

umr-bhar ka hua ziyan jaanan

By

umr-bhar ka hua ziyan jaanan
hum yahan aur tum wahan jaanan
nind aai nahin kai din se
khwab hone lage garan jaanan
kaun jaane teri meri uljhan
kaun samjhega ye zaban jaanan
baad tere yahi raha aalam
dhul hi dhul aur dhuan jaanan
tu bhi zahir nahin zamane pe
main bhi hota nahin ayan jaanan

tujhe bhi ishq hua hai ye kis zamane mein

By

tujhe bhi ishq hua hai ye kis zamane mein
nahin hai mal-e-mohabbat bhi dil-khazane mein
milo ki baat badhe dekhte hain phir shayad
zara kahin se mohabbat jude fasane mein
hamara agla padaw to bas mohabbat hai
hawas to aaegi jaananan darmiyane mein
main ek firaq-zada aur naya naya tera ishq
so khub rang jamega nae-purane mein
jo nagawara tha mujh ko use gawara tha
to sal lag gaya us ko mujhe manane mein

mujhko furqat se guzara jaega

By

mujh ko furqat se guzara jaega
aaj to shab-khun mara jaega
raegan main aur tu bhi raegan
dur tak us ka khasara jaega
yaad ki galiyon mein sina pit kar
raat-din tum ko pukara jaega
sarhad-e-dil par hai khuni marka
aaj apna aap mara jaega
aap ko nafrat pasand aai meri
aap par se khun wara jaega
main ne farmaya tha ki dil se na ja
ab gaya thoda to sara jaega