zara socho

By

mujhe malum hai jaanan
mere marne pe tum aansu bahaoge
meri har baat tum ko yaad aaegi
ba-mushkil bhul paoge
zara socho
ye narmi hamdami mein mujh ko mil jae to achchha ho
mujhe malum hai
meri ghalatiyon ko sarasar bhul jaoge
gile shikwe kabhi munh par na laoge
zara socho
tumhaari be-niyazi
gar meri maujudgi mein mujh ko mil jae to achchha ho
mujhe malum hai ye bhi
ki meri qabr par
tum phul rakkhoge mohabbat se
meri khatir wahin kuchh der rah kar gham bhulaoge
zara socho
ye chahat hath hi mein mujh ko mil jae to achchha ho
mujhe aisa bhi lagta hai
meri aawaz khamoshi mein sun kar chaunk jaoge
meri yaadon ke andhere mein apna dil jalaoge
zara socho
yaqin is raushni mein mujh ko mil jae to achchha ho
mujhe ehsas hota hai
ki mera ranj kuchh arsa tumhein maghmum rakkhega
tumhein zehni sukun se der tak mahrum rakkhega
magar jaanan
ye gham aasudgi mein mujh ko mil jae to achchha ho
jo mar kar tum se hasil ho
wo sab is zindagi mein mujh ko mil jae to
achchha ho
zara socho

wo kaisi aurten thin

By

wo kaisi aurten thin
jo gili lakdiyon ko phunk kar chulha jalati thin
jo sil par surkh mirchen pis kar salan pakati thin
sahar se sham tak masruf lekin muskuraati thin
bhari dopahar mein sar apna jo dhak kar milne aati thin
jo pankhe hath ke jhalti thin aur bas pan khati thin
jo darwaze pe ruk kar der tak rasmen nibhati thin
palangon par nafasat se dari chadar bichhati thin
ba-sad israr mehmanon ko sirhane bithati thin
agar garmi ziyaada ho to ruh-afza pilati thin
jo apni betiyon ko sweater bunna sikhati thin
silai ki mashinon par kade roze batati thin
badi pleton mein jo iftar ke hisse banati thin
jo kalime kadh kar lakdi ke framon mein sajati thin
duaen phunk kar bachchon ko bistar par sulati thin
aur apni ja-namazen mod kar takiya lagati thin
koi sail jo dastak de use khana khilati thin
padosan mang le kuchh ba-khushi deti dilati thin
jo rishton ko baratne ke kai nuskhe batati thin
mohalle mein koi mar jae to aansu bahati thin
koi bimar pad jae to us ke pas jati thin
koi tehwar ho to khub mil-jul kar manati thin
wo kaisi aurten thin
main jab ghar apne jati hun to fursat ke zamanon mein
unhen hi dhundhti phirti hun galiyon aur makanon mein
kisi milad mein juzdan mein tasbih danon mein
kisi baramde ke taq par bawarchi khanon mein
magar apna zamana sath le kar kho gai hain wo
kisi ek qabr mein sari ki sari so gai hain wo

mera KHat

By

kabhi aisa bhi hota hai
main anjaane pate par ek khat likh kar
sipurd-e-dak karti hun
jo dil mein muamalat-e-dil hain sab
sad-chaak karti hun
main likh deti hun un ke nam bhi jin se shikayat hai
bata deti hun kis kis se mujhe kitni mohabbat hai
taaruf un ka bhi jin se bahut nuqsan pahuncha hai
jinhen pane ko sahra tak dil-e-viran pahuncha hai
raqam karti hun kis ka dil dukha hai waqai mujh se
bayan karti hun kyun ruthi rahi hai zindagi mujh se
ghalatiyan hain jo meri sab sar-e-auraq rakhti hun
aur har safhe pe apne dastakhat misdaq rakhti hun
magar aisa bhi hota hai
koi dastak si hoti hai
na jaane darmiyan-e-shab yahan par kaun aata hai
meri dahliz par aa kar mera khat dal jata hai

maut ke us taraf

By

maut ke us taraf
koi sirr-e-nihan hai ki bazar hai
kya sitaron ka taban koi qafila
ya buland aur tarik diwar hai
khak udti hai ya khushbuen hain rawan
koi sahra hai ya ek chaman-zar hai
koi apna bhi hai
ya hujum-e-bala shahr-e-aghyar hai
koi zinda bhi hai
ya ki har samt nashon ka ambar hai
ek khala hai ki phir
bar-e-imkan hai
rah pur-khar hai
jang hai amn hai
faisla hai wahan
jit hai haar hai
maut ke us taraf
kuchh nahin hai to kyun
sar pe aawezan wahshat ki talwar hai
main hun ya
nuqta-e-be-aman
jism ke daere mein giraftar hai
tu hai ya
aaina-saz
wal-asr ka
mahw-e-didar hai

achchhi urdu piyari urdu

By

achchhi urdu pyari urdu
kuchh der to mujh se baat karo
jo nil gagan se aai ho
to raushan meri raat karo
jo komal sundar ladki ho
to dil apna saughat karo
jo bazi rakkho chahat ki
tum jito hum ko mat karo
in phike phike lafzon par
sab beja khub akadte hain
sab jaante hain tum bolti ho
to phul labon se jhadte hain
sab apne adhure jumlon mein
ye hire moti jadte hain
sab tum se aankh milate hain
sab panw tumhaare padte hain
hum ne to yahi dekha hai yahan
jo tum ne kaha wo rit bana
hum ne to yahi samjha hai yahan
sar tum ne diye sangit bana
hum ne to yahi jaana hai yahan
tum se hi koi man mit bana
nazmon ne hamein chuma badh kar
aur mitha sachcha git bana
lekin ye tumhaari qismat hai
hat aai hai aisi tanhai
phirti ho kahin mari mari
jo milta hai so harjai
har roz ke dhoke rahon mein
har roz jabin par ruswai
har roz zara si khush-fahmi
har roz ki mahfil-arai
jab duniya ke in melon se
thak jao to mere pas aana
jab auron ki banhon se kabhi
uktao to mere pas aana
main badh kar nazr utarungi
ghabrao to mere pas aana
marham se nahin bhar pae agar
ye ghaw to mere pas aana
achchhi urdu pyari urdu
achchhi urdu pyari urdu