ye ishq-e-na-murad bhi kis gumrahi mein hai

By

ye ishq-e-na-murad bhi kis gumrahi mein hai
khidki mein jo kabhi tha wo chehra gali mein hai
har subh chhedti hain hawaon ki ungliyan
poshida ek phul jo nannhi kali mein hai
jaise har ek ang hai aankhen liye hue
kya turfa ehtiyat teri sadgi mein hai
nakaam zindagi ho ki nakaam ishq ho
jine ki aarzu to meri jaan sabhi mein hai
zardar-o-hukmaran mein insan ka ehtiram
agli sadi mein tha na ye ab ki sadi mein hai
tujh se bichhad ke sab ki nazar mein rahega kya
ab tak to ye 'shakil' teri raushni mein hai

wae-taqdir kya ye alamiya nahin

By

wae-taqdir kya ye alamiya nahin
sab hain apne magar koi apna nahin
dida-o-dil ki sunsan sahra hue
dil mein jazba to aankhon mein sapna nahin
ishq ko tark karne mein diqqat na thi
ishq ko mashghala hum ne samjha nahin
ab ke mujh se mila wo to aisa laga
wo hi chehra hai lekin wo chehra nahin
phunk raha hai badan kunj-e-tanhai mein
sar pe chhat hai magar man ka saya nahin
meri nazron mein duniya bhi uqba bhi hai
aadmi hun main 'athar' farishta nahin

usko tum mere talluq ka hawala dete

By

us ko tum mere talluq ka hawala dete
main bhi kal us ka shanasa tha ye samjha dete
ye amawas ka andhera hai ki chhutta hi nahin
kash wo aa ke kabhi ghar ko ujala dete
hum ne duniya ka bahut sath diya hai ab tak
kash ek bar kabhi sath hum apna dete
hum tahi-dast sahi phir bhi sakhi hain itne
qatra milta to ewaz mein tumhein dariya dete
dil-shikasta ki tasalli ko hai duniya lekin
kash wo bhi to kabhi aa ke sahaara dete
sirf ghaflat ko to sona nahin kahte 'athar'
aankhon ko nind hi ke sath mein sapna dete

tauhid dil mein ho to labon par rahe KHuda

By

tauhid dil mein ho to labon par rahe khuda
hum yun jiye to kya jiye be-din be-khuda
lo yun to ho gai hai bahut kam zamir ki
is aakhiri charagh ko bujhne na de khuda
to rah-e-rast apne karam se dikha mujhe
raste ghalat hazar hain duniya mein ai khuda
talib hain bartari ke magar hain amal se dur
hum ko jo kaam karna hai wo kyun kare khuda
gar zaniyon ko milti nahin hai saza yahan
hawwa ki betiyon se kashish chhin le khuda
ab to sukun bakhsh ki 'athar-shakil' ne
is umr-e-mukhtasar mein bahut dukh sahe khuda

subh bhi hoti rahi mahtab bhi Dhalta raha

By

subh bhi hoti rahi mahtab bhi dhalta raha
zindagi ka karwan chalta raha chalta raha
saneha kya us pe guzra kaun uth kar dekhta
ahl-e-khana so gae lekin diya jalta raha
mere khwabon ki koi buniyaad bhi thi kya kahun
barf ka parbat tha ek galta raha galta raha
aakhiri waqt aa gaya to sochta hun dosto
aaj ka jo masala tha kal pe kyun talta raha
samne ke dushmanon se bach ke rahna sahal tha
aastin ka sanp tha badhta raha palta raha
hadse ki wo kahani mukhtasar si hai 'shakil'
bansuri bhi baj rahi thi shahr bhi jalta raha

sarsabz ye jangal chahat ka wo dasht-e-wafa hai viran bhi

By

sarsabz ye jangal chahat ka wo dasht-e-wafa hai viran bhi
hai dil ko sukun bhi dekh ke ye aur zehn-e-rasa hai hairan bhi
ye bhi hai qarina ek shayad hasti mein tawazun rakhne ka
kuchh raaz ayan kar logon par kuchh haal magar rakh pinhan bhi
ek zarb ana ne zer-o-zabar kar dala mohabbat ka mehwar
ab us se panah rab chahen the jis pe kabhi hum nazan bhi
is daur-e-zehanat mein jab jab dastur-e-aman par baat hui
aaya hai katahre mein aksar tab sath hamare yazdan bhi
ek lahza sitam ek lamha karam hum par hai ye ehsan un ka sada
raazi bhi hun ek saat mein magar ho jate hain pal mein nalan bhi
hai aql samajhne se qasir pahlu ye tamaddun ka ab tak
malbus jahan hain mard bahut aurat hai wahin par uryan bhi
apna to nahin kuchh logon ko ye dekh ke hairani hai bahut
hain jis se gile-shikwe bhi hamein rahte hain usi par nazan bhi
shair hain amal ke maidan se kuchh dur to us mein hairat kyun
ghazlon ki zaminon par un ko dekhoge bahut sargardan bhi
us se bhi pata chalta hai ki han khallaq-e-do-alam hai koi
har shai hai alag pahchan liye ek nazm hai sab mein yaksan bhi
ab hum mein nahin wo josh-e-junun us mein bhi nahin wo baat ki jo
rahat ka sabab the dil ke liye jaanan nahin zikr-e-jaanan bhi
qismat ke andhere mein bhi rahi aankhon mein meri ek kahkashan
tarik nahin kar pae kabhi khwabon ko sawad-e-zindan bhi
nafrat se mohabbat se aksar hum ne hi likhi taqdir teri
hum ne hi zamin-e-gul tujh ko jannat bhi kiya aur viran bhi
takrar-e-sitamgar se behtar rukhsat lo yahan se 'athar'-ji
ye kaam to tum kar sakte ho ye kaam lage hai aasan bhi