zaban-e-dargor

By

saba us se ye kah jo us taraf ho kar guzarta ho
qadam o jaane wale rok mera haal sunta ja
kabhi main bhi jawan tha main bhi husn-o-ilm rakhta tha
wahi main hun mujhe ab dekh agar chashm-e-tamasha ho
jawani ki umangen shauq-e-ilmi zehn-o-tabbai
zakawat hausla hilm-o-murawwat rahm-o-gham-khwari
khayal-e-aqraba ahbab ke aibon ki sattari
qanaat dost mujh se dur koson bughz-o-tammai
gharaz aisi bahut si khubiyan thin maut ne lekin
bana dala mere aatish-kade ko khak ka tuda
shararon ke ewaz ab bah raha hai barf ka dariya
musafir ghaur se sun gor se bachna hai na-mumkin

waqt

By

hai sal-e-nau ki aamad har shakhs ki khushi hai
kya rang laega ye is ki nahin khabar kuchh
main jaanta hun zalim teri ye dil-lagi hai
dil mein nahin kisi ke jo maut ka khatar kuchh
ai waqt-e-be-murawwat ai waqt-e-be-murawwat
aalam ka lahza lahza mein haal kya se kya hai
muflis abhi tha koi masnad-nashin abhi hai
jita koi abhi tha ab dafn ho raha hai
zalim kabhi rifaqat tu ne kisi ki ki hai
ai waqt-e-be-murawwat ai waqt-e-be-murawwat
kahna kisi ghadi ko apna ghalat sarasar
aalam jise hain kahte taghir ka hai maskan
tujh ko agar main samjhun thahra ghalat sarasar
zalim laga hua hai tujh mein bala ka engine
ai waqt-e-be-murawwat ai waqt-e-be-murawwat
the khar-zar jis ja hai bulbulon ka maskan
allah kis ghazab ke har aan hain ye phere
thin mahfilen jahan par hai bekason ka madfan
ye hathkande hain tere ye hathkande hain tere
ai waqt-e-be-murawwat ai waqt-e-be-murawwat

ishq-o-dosti

By

ishq ko ek nazar kafi hai
aagahi pahle se darkar nahin
dosti barson ki ham-raazi hai
jaldi-bazi ka ye bazar nahin
ho bhi sakti hai kabhi wo haalat
go ho muddat ka khulus aur niyaz
ek lamha mein banati hai jo gat
pyari surat kabhi pyari aawaz
ghaur-o-fikr is ke sada hain ham-dast
milne-julne se hai paida hoti
garm-joshi ki hai mai se sarmast
dosti hai meri dekhi bhaali
aql ke us mein karishme dekho
kuchh bigadti hai kuchh ithlati hai
jab pahunch jati hai us ki tah ko
tab ba-sad fakhr ye samjhati hai
na sune aur na hargiz dekhe
doston mein ho agar aib bhi aah
chahiye yun nazar-andaz kare
ki hawa bhi nahin goya aagah
ishq mein us ki kahan hai mohlat
kuchh bhi soche sune dekhe bhaale
kya bhala samjhen wo us ki haalat
us ki mai se jo na hun matwale
us ke asrar se ho kaun aagah
be-qarari kabhi mahwiyyat hai
khub 'rasikh' ne kaha hai wallah
ishq ek zor hai kaifiyyat hai

hijr

By

tu pas tha ji ko chain kuchh tha
tera jaana ki aafat aai
nazron se chhupa jo tera chehra
mere sar par qayamat aai
baqi thoda sa din tha lekin
meri aankhon mein tha andhera
kyunkar ho sabr mujh se mumkin
dil ko har-dam hai dhyan tera
ai zulm ke aur sitam ke bani
ai shokh jafa-shiar ayyar
mujh ko dubhar hai zindagani
meri aankhon mein hai jahan tar
ai barq-misal ai trahdar
ai mah-jabin ghazal-sirat
mujh par tar-e-nafas hai ek bar
mujh se koson pare hai rahat
ghar-bhar sota hai ek betab
aahen bhar kar tadap raha hai
bhule bhi aankh ko nahin khwab
zulmat-e-shab ki ajab bala hai
hargiz hargiz mujhe mayassar
aai koi ghadi na rahat
kaisa kaisa raha hun muztar
kitni kitni uthai zahmat
dil ko hai sakht be-qarari
jine ke pad gae hain lale
dil ki haalat na ye mitegi
jab tak tu hi na phir sambhaale
mujh ko tanhai go satae
tujh ko aish-o-tarab ho maimun
mujh par aafat hazar aae
tujh se khush-talai ho maqrun
tujh se chhutna hai sakht mushkil
jab tak hai hafize mein qudrat
tera tera rahega ye dil
jab tak na milae tujh se qismat