tumko ye hai agar yaqin dil mein wo jalwa-gar nahin

tum ko ye hai agar yaqin dil mein wo jalwa-gar nahin
dhundha karo tamam umr milne ka umr-bhar nahin
aae na aae be-khabar kya tujhe ye khabar nahin
sans ka e'tibar kya sham hai to sahar nahin
dair ho kaba ho ki dil kis mein wo jalwa-gar nahin
dekh sakun magar use itni meri nazar nahin
kunj-e-qafas mein andalib muztar-o-bekas-o-gharib
kahne ko baal-o-par to hain udne ko baal-o-par nahin
dil mein bala ka josh hai sar liye sarfarosh hai
jine ka hosh hai kahan marne ka us ko dar nahin
tod raha hai aaj dam gham mein koi mariz-e-gham
phir bhi hain aap be-khabar aap ko kuchh khabar nahin
jaan gae ye mar ke hum mulk-e-adam tha do-qadam
khatm ho jald jo safar aisa koi safar nahin
parde mein aap baith kar rakhte hain har taraf nazar
aur zaban par ye hai shokh meri nazar nahin
lab pe hai nara-e-alast jhum raha hai koi mast
chhai hai aisi be-khudi apni use khabar nahin
uf ye mera nasib-e-bad ja ke bani kahan lahad
sab ki hai rahguzar jahan aap ki rahguzar nahin
baat ye tum ne sach kahi 'bismil' be-hunar sahi
ye bhi hai ek bada hunar is mein koi hunar nahin

ye kaisi aag abhi ai shama tere dil mein baqi hai

ye kaisi aag abhi ai shama tere dil mein baqi hai
koi parwana jal marne ko kya mahfil mein baqi hai
hazaron uth gae duniya se apni jaan de de kar
magar ek bhid phir bhi kucha-e-qatil mein baqi hai
hue wo mutmain kyun sirf mere dam nikalne par
abhi to ek duniya-e-tamanna dil mein baqi hai
hua tha gharq bahr-e-ishq is andaz se koi
ki naqsha dubne ka dida-e-sahil mein baqi hai
qaza se koi ye kah de ki mushtaq-e-shahadat hun
abhi ek marne wala kucha-e-qatil mein baqi hai
kahan fursat hujum-e-ranj-o-gham se hum jo ye jaanchen
ki nikli kya tamanna kya tamanna dil mein baqi hai
abhi se apna dil thame hue kyun log baithe hain
abhi to hashr uthne ko teri mahfil mein baqi hai
wahan the jama jitne marne wale mar gae wo sab
qaza le-de ke bas ab kucha-e-qatil mein baqi hai
abhi se tu ne qatil myan mein talwar kyun rakh li
abhi to jaan thodi si tan-e-'bismil' mein baqi hai

un se kah do ki ilaj-e-dil-e-shaida na karen

un se kah do ki ilaj-e-dil-e-shaida na karen
yahi achchha hai ki bimar ko achchha na karen
kya kaha phir to kaho hum koi shikwa na karen
chup rahen zulm sahen zulm ka charcha na karen
ye tamasha to karen rukh se utha den wo naqab
ek aalam ko magar mahw-e-tamasha na karen
waqt-e-akhir to nikal jae tamanna meri
wo na aise mein bhi aaen kahin aisa na karen
intiha ho gai aazad-dahi ki sayyaad
hum tasawwur mein bhi gulzar ko dekha na karen
roz wo kahte hain aaj aaenge kal aaenge
aise wade se to behtar hai ki wada na karen
khud-numai unhen ghairon mein liye phirti hai
hum to jab jaanen ki hum se bhi wo parda na karen
tegh ruk jati hai nawak bhi bahak jata hai
koi 'bismil' ko ye samjha de ki tadpa na karen

saz-e-hasti ka ajab josh nazar aata hai

saz-e-hasti ka ajab josh nazar aata hai
ek zamana hama-tan-gosh nazar aata hai
hasrat-e-jalwa-e-didar ho puri kyunkar
wo tasawwur mein bhi ru-posh nazar aata hai
dekhte jao zara shahr-e-khamoshan ka saman
ki zamana yahan khamosh nazar aata hai
aap ke nashtar-e-mizhgan ko chubho leta hun
khun-e-dil mein jo kabhi josh nazar aata hai
aap hi sirf jafa-kosh nazar aate hain
sara aalam to wafa-kosh nazar aata hai
mausam-e-gul na raha dil na raha ji na raha
phir bhi wahshat ka wahi josh nazar aata hai
shana-e-yar pe bikhri to nahin zulf-e-daraaz
har koi khanuman bar-dosh nazar aata hai
jalwa-e-qudrat-e-bari ka muamma na khula
ru-ba-ru rah ke bhi ru-posh nazar aata hai
phir zara khanjar-e-qatil ko khabar de koi
khun-e-'bismil' mein wahi josh nazar aata hai

qabil-e-sharh mera haal-e-dil-e-zar na tha

qabil-e-sharh mera haal-e-dil-e-zar na tha
sunne wale to bahut the koi gham-khwar na tha
ab wo jine ke liye soch raha hai tadbir
apne hathon jise marna kabhi dushwar na tha
mujh se puchho to qaza us ki hai maut us ki hai
dosh-e-ahbab pe jo mar ke giran-bar na tha
chunte the bagh mein aa aa kar unhen ahl-e-junun
aashiyan ka mere tinka koi bekar na tha
ye hamin ne to mohabbat ki nikalin rasmen
aap par marne ko pahle koi tayyar na tha
dam-e-sayyaad mein aazad raha shikwa-e-gham
main giraftar tha lekin ye giraftar na tha
ab unhen samne aane mein hai uzr ai 'bismil'
milne-julne se jinhen peshtar inkar na tha

na rahe tum jo hamare to sahaara na raha

na rahe tum jo hamare to sahaara na raha
koi duniya-e-mohabbat mein hamara na raha
ab koi aur zamane mein sahaara na raha
jis ko kahte the hamara hai hamara na raha
de diya hazrat-e-isa ne use saf jawab
tere bimar ka ab koi sahaara na raha
kya kahen haal zamane ka khulasa ye hai
tum hamare na rahe koi hamara na raha
kya kahun anjuman-e-naz ka haal ai 'bismil'
sab ke charche rahe bas zikr tumhaara na raha