waqt ki aankhen

lamha lamha khunin khanjar
sadiyan jibhen hain sanpon ki
ghat pe baithi pyas ki dewi
aur jadugar
waqt ki aankhen dekh rahi hain
murda ghar ke ek kamre ke tez dhuen mein
ek kunwari nangi aurat
chat rahi hai
apne hi be-rang lahu ko
man ki aankhen khol ke dekhun to kya dekhun
sab to suli par latka hai
sab kuchh luta luta lagta hai
koi chupke se kahta hai
nangi aurat ki jaanghon mein sanp dal kar main so jaun
lekin koi chikh raha hai
waqt ki aankhen dekh rahi hain
lamha lamha khunin khanjar
sadiyan jibhen hain sanpon ki

tanhai

tanha baitha hun kamre mein mazi ki taswir liye
ab to anjaane qadmon ki aahat se ji darta hai
meri chahat un ke wade dafn hue tahriron mein
jhute hain sare afsane kaun kisi par marta hai
sine ki har ek jalan se samjhauta kar ke main ne
in sari biti baaton ko tariki mein chhod diya
shisha kah lo patthar kah lo kabhi bhi kah lun is dil ko
main ne is afsurda shai ko tanhai se jod diya
ab nazuk nazuk zehnon par fauladi hamla hoga
shishon ke paikar pighlenge pathrili tanhai mein
khwabon ka sansar sunahra tah-khanon mein bhatkega
aql bichaari ja dubkegi soch ki gahri khai main

shahr aur main

dil pahadon par chala jae ki maidanon mein ho
bhid mein logon ki ya khali shabistanon mein ho
shor phir bhi tez tufanon ki surat har ghadi
todta rahta hai khalwat-khwah sinon ka jumud
reza reza ho gae meri tarah kitne wajud
ab nahin mumkin kisi sahra mein majnun ka warud
na-tawan shakhsiyaten barqi tawanai liye
raat ke kale badan ko chat kar hain mutmain
jal raha hai har shajar is shahr ka ab raat din
ud rahe hain hath se toton ki surat sal-o-sin
raushni ka rang jaise kuchh samajh aata nahin
shahr ki tahzib ka rukh kis taraf hai kya pata
aadmi sada hai ya khanjar-ba-kaf hai kya pata
kis liye ye shor-e-mohmal saf-ba-saf hai kya pata
main ne har andaz se samjha hai sare shahr ko
shahr jo khwabon ke jangal ke siwa kuchh bhi nahin
umr sari chhin kar jis ne diya kuchh bhi nahin
jaise mere waste baqi raha kuchh bhi nahin
apne galon par tamancha jad ke khush ho jaun mein
aaj raushan qumqumon ke beach jaga ye shuur
yun to har mausam ke chehre par numayan hain sutur
ek parinda tak nahin lekin hawa mein dur dur
machhliyan chhat par sikhane ke liye jab khwahishen
sidhiyon par panw rakhti hain to aa jati hai chil
thonk di jaegi ab shayad sabhi zehnon mein kil
uth rahi hai har taraf jalte andheron ki fasil
gerua kapdon mein lipta zard mustaqbil mujhe
mashwara deta rahega aur main mar jaunga

sadma

basti ki bimar gali mein
shahnai jab jab gunji hai
man ne aksar mujh se kaha hai
tum bhi apna byah racha lo
main ghar ke kone mein baitha
shor sun raha hun shahron ka
ghayal nadiyon ki lahron ka
parbat par baitha ek jogi
apni aankhen band kiye mujh par hansta hai
aur wo mustaqbil ki aurat
kabhi sarasar zahr ugalti
kabhi anokha zahar nigalti
pit rahi hai chat rahi hai chhati meri
dariya jangal parbat sahra
shor hai kitna andar bahar
pal pal jaise kude laga rahi hai khwahish
sadiyon ke pyase neze paiwast hue phir
sukhi aur be-rang ragon mein
khun ke ek qatre ki khatir
sadiyon ki rahen tai karna
koi mushkil kaam nahin hai
bahr-e-kashakash ke sahil par
rahat patthar tod rahi hai
mauj-e-tamanna chattanon se apna matha phod rahi hai
main ghar ke kone mein baitha
shor sun raha hun mamta ka
han ab main soch raha hun
aisa koi ras rachaun
amman ki budhi chhati par
ek naya sadma ban jaun

raushni raushni ke KHwab

dilon mein dard dimaghon mein kashmakash ka dhuan
jabin pe khak nigahon mein gham ki tariki
fareb khae hain hum ne fareb khate hain
fareb de na sake hum magar zamane ko
hamein to fikr yahi hai ki kaun aaega
hamare baad lahu ke diye jalane ko
wo zindagi jo sabhi ko aziz hoti hai
hum ahl-e-gham ke na yun pas aa sakegi kabhi
qadam qadam pe jinhen justuju ho chahat ki
unhen rafiq na duniya bana sakegi kabhi
khala mein dhund rahe hain hum ek masiha ko
hatheliyon pe aqidat ke aaftab liye
shuur-o-hosh ki duniya hai ek muddat se
nazar nazar mein nai raushni ke khwab liye
wasia dasht-e-tamanna ke surkh sine par
sulagte dard ka aanchal na sard hoga kabhi
charagh-e-umr bujhana to khair mumkin hai
charagh-e-jehd musalsal na sard hoga kabhi
dhuan ugalte andheron mein raushni bhar den
ragon mein khun ki gardish ko tez-tar kar den

koshish raegan

sab kuchh yaad kar raha hun main
koi baat bhula dene ko
aur ye kaisi sachchai hai
aaj bhulne ki koshish mein
sadiyon ki tarikhen azbar kar baitha hun
main hairan hun main hun pareshan
kaise chhupaun haalat apni
har koshish la hasil meri
aur ye kamra ye diwaren
khunti se latki shalwaren
ye be-raunaq budhi raaten
farsh pe lipti biti baaten
ye sab mujh par bojh bane hain
uf ye kaisa zulm hai mujh par
jab bhi main nanga hota hun
mere tan par chadar koi padi hoti hai
wo bhi ek ghadi hoti hai
jab sine par shahr khada ho
tab kuchh be-mani chikhon se
ek matlab ki chikh achanak main hathya lun
aur kisi khamosh jagah tanha goshe mein
sara matlab chhin jhapat kar
fauran us ka gala daba dun
main shayad kuchh bhul raha hun
han main sab kuchh bhul chuka hun
ab tanha khali kamre mein
hath mein nanga chhura dabae
daud raha hun bhag raha hun
ye bhi mujh ko yaad nahin ab
soya hun ya jag raha hun
qatl ke fauran baad magar phir
wo sab ka sab yaad rahega
jise bhulne ki koshish mein
sadiyon ki tarikhen azbar kar baitha hun