yun sisakta mujhe tum chhoD na jao aao

yun sisakta mujhe tum chhod na jao aao
aakhiri waqt hai ai jaan-e-man aao aao
sohbat-e-lutf mein lo nam na ghairon ka kabhi
dil mein aashiq ke na tum aag lagao aao
be-bane hi bahuton ko hai bigada is ne
apni kakul ko bahut ab na banao aao
pi bhi lo rahne do kausar ki kahani zahid
aisi be-par ki na yaron se udao aao
'kaifi' chhodo bhi kahin ku-e-butan ki ye dhun
chain aaram dil-o-din na ganwao aao

wasl ki un buton se aas nahin

wasl ki un buton se aas nahin
ki tike dakshina ko pas nahin
imtihan-e-wafa pe karb-e-firaq
pas hain hae aur pas nahin
nafs ko mar kar mile jannat
ye saza qabil-e-qayas nahin
dam mein ye aana aur jaana kya
aap insan hain kuchh hawas nahin
khauf-e-viran hua hai khana-e-dil
aas kaisi ki yan to yas nahin
kabe mein ja ke kya karen zahid
wan ki aab-o-hawa hi ras nahin
shairi hai meri ki sehr-e-halal
bhala kah den to haq-shanas nahin
paun kis se mazaq-e-sher ki dad
aaj 'faizi'-o-'kalidas- nahin
jam-e-khurshid mein hai aab-e-hayat
ram-rangi ka ye gilas nahin
'kaifi' aur jam-e-baada se inkar
tum ko kuchh nam ka bhi pas nahin

ushshaq mein nam ho chuka hai

ushshaq mein nam ho chuka hai
'kaifi' badnam ho chuka hai
kya puchhte ho mariz-e-gham ko
kaam us ka tamam ho chuka hai
aashiq ka na imtihan lo wo to
banda-e-be-dam ho chuka hai
kyun hum se na munh chhupa ke jaen
han aap ka kaam ho chuka hai
kya kaam hamein raha kisi se
jab apna hi kaam ho chuka hai
'kaifi' kab tak ye khwab-e-ghaflat
mehr lab-e-baam ho chuka hai

sare ushshaq se hum achchhe hain

sare ushshaq se hum achchhe hain
han tere sar ki qasam achchhe hain
uljha hi rahne do-zulfon ko sanam
jo na khul jaen bharam achchhe hain
koi janchta nahin us but ke siwa
aur bhi yun to sanam achchhe hain
hashr tak mujh ko jalae rakkha
ye hasinon ke bhi dam achchhe hain
bahs ho jae to sab par khul jae
hain bhale aap ki hum achchhe hain
ghair ki kuchh nahin shirkat is mein
hum ko ye tere sitam achchhe hain
jite hain aarzu-e-qatl mein hum
dam tere tegh-e-do-dam achchhe hain
na hua kabe ka didar nasib
hum se aahu-e-haram achchhe hain
khub hai waqt jo kat jata hai
jo guzar jate hain dam achchhe hain
puchhte kya hain mizaj-e-'kaifi'
aap ka lutf-o-karam achchhe hain

pani siyane dete hain kya phunk phunk kar

pani siyane dete hain kya phunk phunk kar
dil soz-e-gham ne khak kiya phunk phunk kar
chhidkaw aab-e-tegh ka hai ku-e-yar mein
panw is zamin pe rakhiye zara phunk phunk kar
dekha na aankh-bhar ke nazar ke khayal se
lete hain hum to nam tera phunk phunk kar
hoga na saf jhuti hawa-khwahiyon se dil
yun dil ka kab ghubar uda phunk phunk kar
baad-e-nafas se dagh-e-dil-e-sard jal uthe
hum ne jila diya hai diya phunk phunk kar
ulta hai kya is aah-e-sharar-bar ka asar
dil hi bujha diya hai mera phunk phunk kar
piri mein aaegi na kabhi taqat-e-shabab
ai pir lakh pare ko kha phunk phunk kar
shaitan ka dhoka zahid-e-pur-fan pe kyun na ho
pita hai chhachh dudh-jala phunk phunk kar
aatish-bayani-e-lab-e-'kaifi' ne bazm mein
dushman ke dil ko khak kiya phunk phunk kar

pani pani ho gaya josh abr-e-dariya-bar ka

pani pani ho gaya josh abr-e-dariya-bar ka
dekh kar tufan hamare dida-ha-e-zar ka
chashm-e-hamdardi mariz-e-ishq in aankhon se na rakh
kaam kya nikle bhala bimar se bimar ka
dil se hamdam ne rah-e-ulfat mein ye dhoka diya
kya kare ab koi duniya mein bharosa yar ka
dil diya jis ko usi ne dagh-e-mayusi diya
ras hi aaya na hum ko hae karna pyar ka
ya mitaya us ka likhwaya main khud hi mit gaya
ai muqaddar ab to ye sar aur dar hai yar ka
hum ne 'kaifi' khub hi aankhen ladain us se kal
kar diya sara hiran nashsha nigah-e-yar ka