zara si raat aur itna sawab kafi hai

zara si raat aur itna sawab kafi hai
meri nazar ko faqat tera khwab kafi hai
main chahti nahin mujh ko waraq waraq likh de
sar-waraq hai jo ek intisab kafi hai
main kya karungi ye itni kahaniyan le kar
mere liye to faqat ek kitab kafi hai
main apni pyas ko mahsus kar ke jiti hun
samundaron ki talab kya sarab kafi hai
main tujh se milti hun 'farhat' to khauf aata hai
ki mujh pe tera purana hisab kafi hai
nahin hain lafz mayassar to phir tassur bhej
kisi bhi shakl mein ho ek jawab kafi hai
khayal-e-yar kahan hai koi batae use
mere liye wahi khana-kharab kafi hai

ye gham ka rang ye aab-e-malal aankhon mein

ye gham ka rang ye aab-e-malal aankhon mein
aza ka jaise ho aks-e-hilal aankhon mein
kabhi sarab kabhi tishnagi kabhi sahra
kabhi kabhi faqat aab-e-zulal aankhon mein
nazar milaun to kaise wo le ke chalta hai
bahut ajib se kitne sawal aankhon mein
ab aaina bhi jo dekhun to apne chehre par
main padhti rahti hun tera khayal aankhon mein
zara si der ko 'farhat' nazar nazar se mili
phir us ke baad to jam-e-sifal aankhon mein

sukun-e-zat waqf-e-intishaar kar liya gaya

sukun-e-zat waqf-e-intishaar kar liya gaya
ghazab hua ki dil ka e'tibar kar liya gaya
qadam qadam mile jo aable rah-e-hayat mein
to aansuon ko misl-e-abshaar kar liya gaya
umid-e-subh-o-sham gham ke darmiyan basar jo ki
to saaton ko dard mein shumar kar liya gaya
mila fareb-o-makr se bhi kab wo hila jo magar
libas sadgi ka dagh-dar kar liya gaya
nakir ne madad badi hisab rakh ke ki meri
gunah tamam umr be-shumar kar liya gaya
zaban-o-jism-o-jaan-o-dil gawah sab jo ban gae
to jurm un se ho ke darkinar kar liya gaya
gawah adliya subut hashiyon pe aa gae
hikayaton pe aise e'tibar kar liya gaya
zaban-e-haal muntakhab hui bayan-e-dard ko
wajud aap apna tar-tar kar liya gaya
garan zamin-e-kisht-e-gham-e-jigar ko naqd ki ada
masarraton ka wahm tha udhaar kar liya gaya
jo ek jam 'farhat'-e-hayat ki umid tha
sitam ye hai ki wo bhi kal pukar kar liya gaya

riwaq-e-kahkashan se bhi ho aage tak guzar tera

riwaq-e-kahkashan se bhi ho aage tak guzar tera
ki tera ishq hai manzil teri azm-e-safar tera
ramida wusaten hun tundi-e-raftar se teri
bari ho tangi-e-afkar se aahu-e-sar tera
zamana thahar kar puchhe teri raftar-o-surat se
mujhe bhi sath leta chal irada hai kidhar tera
hayat mukhtasar aur be-karani sail-e-imkan ki
raqam hoga sar-e-aflak qissa mo'atabar tera
kisi bahr-e-muhit-e-be-karan ki aarzu mein hai
ye tufanon ki maujon mein sanwarne ka hunar tera
miyan-e-ab-o-gil ek barq hai shoala hai shabnam hai
ye dil ye qatra-e-khun ye wajud-e-mukhtasar tera
tadap ki justuju ki rah mein ye bhi ibaadat hai
teri har aah-e-sozan hai pyam-e-pur-asar tera
musafir hai masafat ka sila hai aabla-pai
bhala kab sath chhodegi ye gardish umr-bhar tera
jalan aankhon mein sukhe lab ghubar-e-zindagi rukh par
thakan ki dastan kahta hai huliya sar-ba-sar tera
kabhi rakh kar kisi zanu pe sar aaram bhi kar li
ghani hai chhanw kyun khulta nahin band kamar tera
charagh-e-arzu ki lau bhadakne de abhi 'farhat'
wahi tanha shab-e-furqat mein hoga ham-safar tera

kuchh sukun paun jo is sahn-e-makan se chhuTun

kuchh sukun paun jo is sahn-e-makan se chhutun
phir naya ek safar ho main jahan se chhutun
sare ehsas se har sud-o-ziyan se chhutun
ho ke khamosh gunahan-e-bayan se chhutun
tund-khu tazi-e-be-bak khiraman ki qasam
kash raftar-o-ram-o-rakhsh-e-rawan se chhutun
muzmahil ho ke thaharne nahin deti surat
kash aazad ho tausan ki inan se chhutun
zikr kuchh dil ka na kuchh baat tamannaon ki
khushk aankhen hon main iza-e-fughan se chhutun
raqs ho aatish-e-sayyal ka aur khak hun main
gardish-e-sham-o-sahar dahar-o-zaman se chhutun
taer-e-ruh har ek gosha-e-jaan dekhta hai
jism se jaan se kis dar se kahan se chhutun
chhutun 'farhat' se aziyyat se sukun se gham se
na-tawani se sahi tab-o-tawan se chhutun

gulon ka rang tapish KHushbuen samundar khinch

gulon ka rang tapish khushbuen samundar khinch
kuchh is tarah se meri aarzu ka paikar khinch
nikal hi jae na dam apna aah-e-sozan se
zaban pe lafz to rakh is tarah na tewar khinch
atak raha hai mera dam nikal na paega
sitam-shiar jigar se mere ye khanjar khinch
mahaz-e-jang pe teri shikast aakhir hai
hisar kar le khud apna tamam lashkar khinch
kai sitare khinche aaenge salami ko
tu is jagah se zara hat ke apna mehwar khinch
tujhe to khinch na pai hayat ki 'farhat'
jo tujh se ho sake ye zindagi ka patthar khinch