zamana chaal chal jae

kabhi aisa bhi hota hai
ki barson baad
banjar is zamin-e-dil mein
konpal sar uthati hai
kali khilti hai
titli raqs karti
gungunati hai
kiran ek jagmagati hai
hawa-e-khush-gumani ka
farhat-angez jhonka
mujh se sargoshi mein kahta hai
tumhein us se mohabbat hai
use tum se mohabbat hai
na tum izhaar karte ho
na wo iqrar karti hai
ye sach hai
phir bhi tum donon hi apni zat se inkar karte
kahi har baat se inkar karte ho
zara apne dilon se puchh kar dekho
kahin aisa na ho ye waqt hathon se nikal jae
zamana chaal chal jae

ye raat hogi tawil kitni

ye raat hogi tawil kitni
buland hogi fasil kitni
ye khauf-o-dahshat ka daur-daura
rahega kab tak
gali gali kucha kucha pahra
rahega kab tak
ye aag jangal ki aag kab tak
falak se barsegi rakh kab tak
sitare tutenge aur kab tak
yun aasman se
parind ruthenge aashiyan se
ye phul-patte hawaen shabnam
karenge kis kis ka aur matam
siyah pur-haul aandhiyon ka ye mauj mela
rahega kab tak
muqable mein shajar akela
kadakti bechain bijliyon ka
zamin ki jaanib safar kabhi to tamam hoga
phirenge dharti ke din yaqinan
kabhi to bandon pe lutf-e-rabb-e-anam hoga
hasin titli ke narm-o-nazuk paron ki jumbish
dhanak ke khush-dida rang har-su
bikher degi
kabhi to baad-e-nasim khushbu bikher degi
mujhe yaqin hai ki kal ke suraj ki muskurahat
zamin ke mahrum basiyon ko
nai sahar ka payam degi
labon ko izn-e-kalam degi
mujhe yaqin hai wo din bhi aaega
jab urus-e-chaman ke qadmon ki dhimi aahat sunai degi
bahaar lamhon ki gungunahat sunai degi
tuyur chahkenge baaliyon par
gulab mahkenge daliyon par
kabhi to dekhega sar utha kar
chaman mein nanha sa koi pauda
kabhi to jhankega baadalon ka hata ke ghunghat
kahin ye chhota sa ek sitara
kabhi to niklega chand pura
ye ghar ye aangan chamak uthega
har ek chehra damak uthega
mujhe yaqin hai
kabhi to utrega aasman se koi farishta
padhega chehre pe jo likha hai
sunega wo bhi jo hum ne ab tak nahin kaha hai
siyah raaton ki tirgi ka
tawil be-kaif zindagi ka
koi to aa kar hisab dega
hamari aankhon mein khar ban kar
jo chubh rahe hain sawal un ka
jawab dega

wo hamd-e-rabb-e-jalil

hamein talim deta hai
ishaaron se kinayon se
achhute istiaron se
kabhi tashbih ke raushan sitaron se
hamare zehn-o-dil ki har tah-e-na-saf ko
aaludgi se pak karta hai
kabhi lafzon ke tan par se
qaba-e-pur-takalluf chaak karta hai
har ek baatil rawayye ko jala kar
rakh karta hai

pichhle bis barson mein

apne apne kaamon se
waqt jo bhi bachta tha
sath hum batate the
jo samay guzarte the
un ki jag kahani bhi
ek dusre ko hum
shauq se sunate the
laut kar main office se
jis ghadi thaka-haara
apne ghar mein aata tha
sab takan din-bhar ki
apne dar ki chaukhat se
dur chhod aata tha
yaad hai mujhe ab tak
din wo talkh mazi ka
boss apne ghar se jab
pit-pita ke aae the
taza taza chehre par
har taraf kharonche thin
kat-khani si billi ne
shayad apne panjon se
donon gal noche the
naukri to karna thi
chaakari bhi karna thi
so janab-e-wala ne
roz ki tarah pahle
haal boss ka apne
phone par hi puchha tha
aur phir receiwer se
phone ke cradle ko
bebasi se pita tha
aan-janab ne us din
jis qadar bhi ghussa tha
mujh pe hi utara tha
mera jaisa bad-qismat
jab bhi samne aaya
dant kar bhagaya tha
main bhi kam na tha un se
apni desk par ja kar
filon ko de patkha
aur apne jaison par
be-qusur hi barsa
ye katha meri biwi
sun ke khilkhila uthi
aur apni din biti
khud hi phir shurua kar di
aaj meri masi ne
phir gilas shishe ka
chakna-chur kar dala
sirf ye nahin balki
kapde dhone wali ne
silk ka wo dupatta
kal hi jo kharida tha
bor bor kar dala
main ne bhi lagi-lipti
kuchh bacha nahin rakkhi
jis qadar thin salwaten
be-nuqat suna dalin
apni apni din-biti
donon jab bhi kah chukte
qahqahe lagate the
yun hum apni ghurbat ki
khud hansi udate the
wo sukun jo ghurbat ke
un dinon mein hasil tha
wo sukun nahin milta
wo jo ghar kabhi jis mein
dil hamara lagta tha
us mein dil nahin lagta
roz-o-shab ki gardish ne
sab hi kuchh badal dala
aur jo nahin badla
pichhle bis barson mein
ek wahi mera office
log ab bhi taqriban
sath mein wahi sab hain
farq hai to bas itna
boss ki main kursi par
boss ban ke baitha hun
mere apne chehre par
har taraf kharonche hain
saf aisa lagta hai
kat-khani si billi ne
jaise gal noche hain

naqab jitne hain

safar mein pesh koi hadisa bhi mumkin hai
zara se der mein aah-o-buka bhi mumkin hai
mera wajud kabhi be aman na ho jae
ye jism mar ke kahin be-nishan na ho jae
mera pata na chale kuchh meri khabar na mile
guzar hua tha jahan se wo rahguzar na mile
shikar ho gaya jab marg-e-na-gahani ka
khayal aaega logon ko tab nishani ka
naqab jitne hain mere wo noch dalenge
parat utarenge chehra kharonch dalenge
yahi sabab hai ki jab bhi main ghar se jata hun
kuchh ehtimam isi dar se kar ke jata hun
na koi naqsh na tahrir apni rakhta hun
main apni jeb mein taswir apni rakhta hun