pyar isar wafa sher-o-hunar ki baaten

By

pyar isar wafa sher-o-hunar ki baaten
ab to lagti hain kisi aur nagar ki baaten
koi surat na rihai ki bani to jaana
hum to diwar se karte rahe dar ki baaten
waqt aaya to zabanon ko bhi jumbish na hui
log karte the bahut tegh ki sar ki baaten
ye hain maghrur parinde unhen darne do abhi
baith jaenge agar chhed den ghar ki baaten
khak se jod liya hai wo talluq ki hamein
ras aati nahin shams-o-qamar ki baaten
panw resham ke gadilon se utarte hi nahin
aur har-waqt hain kanton pe safar ki baaten
aasman dekh ke 'shahin' ye dil chahta hai
koi karta rahe parwaz ki par ki baaten

yaqin se bahar bikhra sach

By

mahakte reshmi bistar pe tuta kanch bikhra hai
mulaem narm takiye mein basi hai khurduri khushbu
nashili nind ke tukde hain kude-dan ki zinat
likhi hain qurmuzi pardon pe na-manus tahriren
sunahre phul-danon mein saji hain ajnabi aankhen
ye sab kaise hua aur kyun hua
kis khwab se puchhun
main kya sochun
meri sochen mere apne lahu mein dub jati hain
hai koi zakhm aisa jo musalsal khun ugalta hai
lahu ki dhaar girti hai
khayal-o-khwab ke upar

ulTa chakkar

By

ajib chakkar koi chala hai
jo shai jahan se uthana chahi
utha na pae
jahan jo rakkha wahan wo rakkha nahin raha hai
jo likhna chaha wo likh na pae
tamam chakkar ulat chala hai
jo khwab ke daere se bahar tha us ne aankhon se bair rakkha
dil-o-nazar mein jise jagah di wo khwab ban kar bikhar gaya hai
nasib mein jo nahin tha us ki talash mein zindagi laga di
jo hath mein tha wo be-khudi mein diya hai
jo baat kahni thi us ki himmat juta na pae
jo lab pe aaya wo harf hi ghair ho gaya hai

sahir

By

hamesha tum ne apna-ap apni jeb mein rakkha
magar phir bhi kushada-dil kushada-dast kahlae
lutaya tum ne khud par dusron ko mutthiyan bhar ke
hamesha chahne walon ko afsun ki tarah barta
magar aise saliqe se
ki khud ko sarf kar ke bhi kisi ko gham nahin hota
tumhaara sehr aisa hai
ki jis par kaam kar jae
kabhi phir kam nahin hota
tumhaara rang jis par bhi chadhe
maddham nahin hota

raat

By

raat kitni sahir hai
gard se ate chehre
badh ke tham leti hai
apne narm hathon mein
din ka shor kanon se
phike manzar aankhon se
chun ke phenk deti hai
be-karan andheron mein
muzmahil thake-mande
ladkhadate jismon ko
badh ke tham leti hai
raat apni banhon mein
raat kitni mahir hai
jabr aur mashaqqat ki
sakhtiyan bhulane mein
dosti nibhane mein
be-sukun zehnon ko
loriyan sunane mein
jagne sulane mein
raat kitni mahir hai
raat kitni behis hai
us ki aastinon mein
kitne sanp palte hain
ta-sahar gunahon ke
kaise daur chalte hain
raat jaise gungi hai
dekhti hai sara kuchh
aur kuchh nahin kahti
raat jaise bahri hai
siskiyan nahin sunti
hausla nahin deti
jin ki kashtiyon ko gham
zabt ke jazire par
therne nahin deta
jin ko bar-e-bad-bakhti
zist ke samundar mein
tairne nahin deta
reg-e-sahil-e-shab par
kaise sar patakhte hain
raat jaise andhi hai
aasra nahin deti
dost hi nahin banti
raat kitni behis hai

qadr-e-mushtarak

By

khuda aur majazi khuda mein koi qadr aisi bhi hai
jis ko hum mushtarak kah saken
ek ki zat se zulm mumkin nahin
dusre ko khudai ka itna nasha hai ki us ke liye
qahr aasan insaf dushwar hai