wo aalam KHwab ka tha

By

wo aalam khwab ka tha
so rahe the sab
magar ek wo
akela jag utha tha
kuchh aise nind tuti thi
ki har har uzw be-kal tha
badan sara
taghayyur ki talab mein
mahi-be-ab ki surat tadapta tha
junun-o-be-qarari ne
ragon mein bijliyan bhar din
hazaron sal se rakkhe hue patthar ko sarkaya
wo apne ghaar se bahar nikal aaya
nigahen raushni se chaar ho kar jun hi paltin
us ne khud ko
zindagi se wasl ke imkan mein paya
bahut lamba bahut dushwar rasta tai kiya us ne
na jaane kitne dariya koh-o-sahra darmiyan aae
tilism-o-haft-khwan aae
tab us shahr-e-buland-o-baala-o-pur-kaif mein pahuncha
jahan insan aur haiwan sab bedar rahte the
bade be-khar hote the
zaban thi sukh ke kanta
papote phul ke kuppa
ki us par jagte rahne ka aisa shauq ghaalib tha
badan wahshat ka talib tha
magar ye kya
use malum ye kab tha
zara jo mukhtalif ho
shahr-e-bedaran mein us par kya guzarti hai
dukanen jin ki unchi thin
use mukhbir samajhte the
jo masha-khor the pheri lagate the
use pagal batate the
wahan bazar mein koi use kuchh bhi na deta tha
jo sikke pas the us ke unhen koi na leta tha
wo wapas ja na sakta tha
khuda-e-lam-yazal ke hukm se
us ghaar ka munh band tha phir se
ajab be-yawari na-ashnai thi
saza mahz us ne
aankh khul jaane ki pai thi

sawal

By

ye sari duniya sawaliya hai
har ek chehra sawal andar sawal hai aur
har ek manzar sawal ban kar
jawab ka muntazir khada hai
agar koi samne bhi aae
aur aa ke ek baat ka bhi hum ko
jawab de de
to dar-haqiqat jawab mein bhi
na jaane kitne sawal honge
hazar-ha nit-nae masail hamein milenge
ki aaj tak to yahi hua hai
jawab hi se sawal nikle
jawab hi mein sawal dhunde
ye sari duniya sawaliya hai
khud aadmi ek sawal hai aur
usi ne paiham sawal utha ke
sawal karne ki rit dali
sawal-e-awwal bhi aadmi hai
sawal-e-akhir bhi aadmi hai
jawab-e-mutlaq bhi aadmi hai
agar yaqin ho
to aadmi par kamand dalen
sawal hi mein jawab dhunden

KHwahish

By

mujhe wo khauf tha
ki jis se koi bhi bacha nahin
wahi to ek sawal tha
ki jis sawal ka jawab
aaj tak
kisi ko bhi mila nahin
bas us ke jism-o-jaan ke be-kanar
paniyon mein pair ne ka bhut
sar pe yun sawar tha
aur aisa intizar tha
ki ek ek pal jo kat raha tha
bar tha
ye sab jahan tha fuzul
gard tha ghubar tha

kangal

By

tumhein bhi malum hai mujhe bhi
ki pas mere to kuchh nahin hai
jo zar-parasti ke is jahan mein
mujhe bhi kuchh mo'atabar bana de
na qimti hai libas mera
na mal-o-daulat zar-o-jawahar
ki jin mein tum ko sharik kar lun
meri to daulat ajib si hai
meri mata-e-jahan mein tum ko
bahut si ruswaiyan milengi
wafa ke aansu guman ki khushiyan
junun ki danaiyan milengi
mithas mein talkhiyan milengi
qalam ki sachchaiyan milengi
khulus-e-jazbaat ki lagan ki
athah gahraiyan milengi
meri to daulat ajib si hai
agar kaho to sharik kar lun
tumhein bhi apni mata-e-dil mein
ki pas mere to kuchh nahin hai

istiara

By

istiara
udas raaton ki tirgi mein
agar koi naghma-rez tair
khud apni marzi se rah bhula hua parinda
ki jis ka nanha sa dil
mohabbat ke sare jazbon se aashna ho
ki jis ke par dukh chuke hon lekin
wo ud raha ho
nai fazaon ko dhundhta ho
main us ko aawaz de raha hun
wahi to hai mera istiara
main chahta hun ki sath mere
wo git gae
nai ruton ke mohabbaton ke
zamin ko khush-rang karne wali
tamam gul-rez saaton ke