soch ka dhaara

By

meri dahliz ka patthar hai
tum chaho to le jao use
sab patthar ek se hote hain
kal bhi
ek bachcha aaya tha
sahma
sahma
main ne us se
ye baat kahi
tum chaho to le jao use
sab patthar ek se hote hain
bachcha ek-dam bol pada
kuchh patthar hire hote hain
main
aql-o-khirad ka shaidai
main ne jab is par ghaur kiya
aur aankh khuli
mere samne but tha patthar ka
patthar ka ye but
mandir ka khuda
kabe ka sanam
mazdur ka fan
main kya samjhun main kya jaanun
hira ki sanam
patthar ki khuda

waqt ajib chiz hai waqt ke sath Dhal gae

By

waqt ajib chiz hai waqt ke sath dhal gae
tum bhi bahut badal gae hum bhi bahut badal gae
mere labon ke waste ab wo samaaten kahan
tum se kahen bhi kya ki tum dur bahut nikal gae
tez hawa ne har taraf aag bikher di tamam
apne hi ghar ka zikr kya shahr ke shahr jal gae
mauja-e-gul se ham-kanar ahl-e-junun ajib the
jaane kahan se aae the jaane kidhar nikal gae
shauq-e-visal tha bahut so hai visal hi visal
hijr ke rang ab kahan mausam-e-gham badal gae
surat-e-haal ab ye hai ki log khilaf hain mere
ai mere ham-khyal-o-khwab tum to nahin badal gae
bu-e-gul aur hisar-e-gul ahl-e-chaman pe zulm hai
apni hudud-e-zat se jaan ke hum nikal gae
aab-e-hayat jaan kar zahr piya gaya yahan
zahr bhi khamushi ka zahr-e-jism tamam gal gae
sham-e-badan bhi the kai rah-e-junun mein ham-safar
tab-e-muqawamat na thi dhup padi pighal gae

the wo qisse magar sarab ke the

By

the wo qisse magar sarab ke the
jaane wale khayal-o-khwab ke the
lamha lamha kisi ki yaaden thin
roz-o-shab the magar azab ke the
us ka chehra tha aur shishon mein
aks khilte hue gulab ke the
gard-e-rah thi miyan-e-manzil-o-dil
dhundle dhundle nuqush khwab ke the

tha aasman par jo sitara nahin raha

By

tha aasman par jo sitara nahin raha
yaadash-ba-khair ab wo hamara nahin raha
jo din guzar gae wo guzar hi gae so ab
yaadon ke ma-siwa koi chaara nahin raha
sail-e-rawan mein gum hai nishan-e-muhit-e-ab
ai mauj-e-muztarib wo kinara nahin raha
tanha the jab to aankh ke aansu bhi dil mein the
wo aa gaya to zabt ka yara nahin raha

shahr mein shor hai us shoKH ke aa jaane ka

By

shahr mein shor hai us shokh ke aa jaane ka
har koi rup bhare phirta hai diwane ka
rind-o-waiz the baham dast-o-gareban kal raat
jaane kya haal hua shisha-o-paimane ka
shab ka aalam tha juda din ke taqaze kuchh aur
us se kya zikr karen raat ke afsane ka
tar-ba-tar khun mein hai daman-e-ummid-e-bahaar
hath mein zakhm hai tute hue paimane ka
us ki aankhon mein wahi rang wahi husn-e-talab
dil ko samjhaen magar faeda samjhane ka
sahn masjid ka hai aur 'hafiz'-o-'khayyam' ke sher
jam-e-ghayab mein magar rang hai mai-khane ka

phir saje bazm-e-tarab zulf khule shana chale

By

phir saje bazm-e-tarab zulf khule shana chale
phir wahi silisla-e-shokhi-e-rindana chale
phir ye yakjai-e-yaran-e-chaman ho ki na ho
der tak aaj zara bazm mein paimana chale
phir koi qais ho aawara-e-sahra-e-junun
phir kisi gesu-e-shab-rang ka afsana chale
hum wo bad-mast-e-junun hain jo sar-e-rah-e-hayat
kabhi ba-hosh kabhi hosh se begana chale
hum ne chaha to na tha un se ulajhna lekin
is ko kya kahiye wo har chaal harifana chale
waqt badla hai to phir kyun na ba-andaz-e-digar
wahi tahrik-e-shikast-e-khum-o-khum-khan chale