ai mere KHwab

ai mere khwab
hunar-khez riwayat ke amin
inkishafat ki daryuza-gari chhod bhi de
gard-e-hangam mein tartib se rakh
aankh ki khasta fasilon se gire khisht-mizaj
un chune zard gulon se dhake kuchh sokhta pal
samt ka koi tayyun to nazar mein thahre
ai mere khwab
mere sath na chal
mujhe darpesh hai la-samt samaj
ek virani tamashe mein gundhi
ye tamasha nahin paband-e-charagh
gard ne rakht-e-safar aankh ka chhal
ghar kahan hai koi ghar mein thahre
ai mere khwab
minaron pe parinde utre
jaane kis khauf se jangal se palat aae hain
dar hai ye surkh aqiqon ko nigal jaenge
sansanati hui tanhai mein ghir jaenge
un ko darpesh hai ab hijr ka thal
is kharabe mein bhala kaun safar mein thahre

shattul-arab

ye surkh dhaare qadim waqton ki dastanon ke surkh-rawi
kanar-e-ab-e-falak hain dastar banne wale nakhil-zade
nawah-e-basra mein phailti bad-guman subhen
faza mein be-nam siskiyon ki shikasta-lahren
jinhen munafiq sifaraton ke hisar ne qatl kar diya tha
yahin kahin hain
ye shahr-e-basara jahan pe faras ki apsaraen
qadim unton ki jang mein kaam aa gai thin
khilafaton aur hijraton ke asil shahid
ye surkh dhaare
ajab nahin khamushi ki tasbih karti raaten
kisi zamane mein chikh utthin
ki kaise abbasiyon ke ahd-e-muwafaqat mein
siyah-sanji ubal pade the
ghulam-gardish ki dastanon mein rakhna padna kahan likha tha
ye surkh dhaare moarrikhon ki tarash-karda
qabih girhen kabhi to kholenge sach ki khatir
ai ahal-e-basra ye eatizalon ki dastanen kahan likhi thin
to wasil-ibn-e-ata ki baaten jo razm-gah-e-kalam-andar
chuni gai thin samaaton ne kabhi suni hain
to ahal-e-basra hasan jo basri the jaante ho
muhasba ki nawed le kar tumhaari khatir tumhaari mitti pe aa gae the
tumhein khabar hai jab ahal-e-basra namaz padhna hi bhul baithe
hasan jo basri the yan ki shorish se dur jangal mein
tar-e-anfas ke tajalli se bahra-war the magar jo is roz
qahr tuta janaza-gah mein the ahal-e-basra
koi nahin tha khuda ke ghar mein
to ahal-e-basra ye surkh dhaare khamosh the kya
qadim waqton ke surkh-rawi
bata ai shattul-arab ke pani
yahan pe turkon ne kya kiya tha yahan walandezi kaise aae
tumhaare pani ke khar-o-khas ki mithas thi ya
khumar hairat ki god mein mahw-e-istirahat qadim waqton ki dastanen
tamam aalam ke surkh dariya khamosh kyun hain
moarrikhon ki qabih girhen kabhi khulengi
hum apni apni sadaqaton mein hi rahne wale
barahna lamhon ke warison mein se rah gae hain

ghair-nisabi tariKH

shahi darbar main khadim-e-khas ka elan
takhliya
raqs-e-junun-khez pe nau-khez badan
shahr main aadam-e-khaki kai lahu ki qimat
dene aae hain mahaaraj ke maikhane main
rang aur nur ki barsat ke beach
kaun dekhega be-sar ki lashen
nau-badan jam-e-tahayyur ka naya zaiqa hain
jan pe do-lakht kiye jate hain mulkon ke badan
shahi darbar mein mahaaraj ka elan
sahibo
dhund ki tahzib ka parchaar karo
jin par nare hain likhe ghar wo tah-e-khak karo
shahr mein gunje faqat naghma-e-tausif-e-riya
hurmat-e-harf ho paband-e-shikoh-e-aiwan
zikr mat ho kahin jalte hue khiyam ka bas
sirf tarikh main chamke mera farman-e-shahi
shahi darbar mein wazir-e-ba-tadbir ka mashwara
takhliya
sahibo ye waqt hai sarshaari ka
faisle kal pe utha rakhte hain mustaqbil ke
is samay shahr mein barpa karo jadu koi
log masruf rahen waqt guzar jae bas
khak ho jaengi sadiyan yunhi qadmon ke tale
shahi darbar mein mahaaraj ka mukhbir-e-khas ko hukm
lahn-e-salar bata haal zamane ka mujhe
us mein bas mujh ko bata meri khabar ki babat
mat suna khasta zamanon ki shikasta baaten
lafz likh mere liye nok-e-qalam se aur phir
shahar-bhar mein yahi tarikh munadi kar de
waqt ke sare moarrikh karen baiat us ki
phul par khun nahin tha wo nam-e-shabnam tha
ek khamosh riyazat thi ajal ka chakkar
be-badan khwab the tahzib ka nau-rafta-mizaj
shahi darbar se bahar reaya ka mizaj
dosto yun hi salamat rahe aiwan ka waqar
rizq malta rahe ranai ka aankhon ko yunhi
yun hi batti rahe khairaat-e-kafan gard-e-yaqin
yun hi milti rahe qabron ke liye muft zamin
dosto yun hi salamat rahe aiwan ka waqar

KHwaja-sara

resha resha git ka gota har ek ang mein raqs
sans ke bhitar koyal bole panchhi jaisa shakhs
ungli ke chhalle mein raj kamal ke gore pankh
hae re mori pit nigodi hae re more pankh
galon par ghaze ke pichhe dard ke sukhe phul
lachkili banhon ki shakhon par nafrat ki dhul
thumri ke bolon mein pinhan aklape ka bain
din aankhon mein kat jata hai kaise kate ye rain
qaus-e-quzah se pairahan mein sundar sundar jism
honton ki phislan par girta padta kora ism
kali kali qismat un ki nile pile khwab
itne rangon mein apni pahchan bhi ek azab

aadmi

la-intiha jahan-e-mujassam se bhi siwa
la-muntaha zamanon mein rahte hue ye abad
qarnon se rengti hui taqwim-e-kaenat
aab-o-gil-o-shuur sar-e-do-jahan adam
la-falsafa nihayat-e-fahm-e-payambari
zauq-e-numu ki hath mein rekhaen dam-ba-dam
kya jaaniye ki kitne baras ka hai ye charagh
tahzib-e-sokhta hai ayagh-e-huruf mein
fikr o khirad ki bahr o talatum mein kashtiyan
ubhrin kahin to rizq-e-samundar kahin huin
is ehtimam-e-khwab-e-tahayyur mein main nazhad
tanha khada hun apni numaish ke waste
main bhid ke nawah mein madum aadmi

bagh ek din ka hai so raat nahin aane ki

bagh ek din ka hai so raat nahin aane ki
wo pari phir se mere hat nahin aane ki
ab wo ladki nahin aane ki mere college mein
ab ke multan se saughat nahin aane ki
tum chali jao ye patthar nahin pahle jaisa
aankh se ju-e-munajat nahin aane ki
ab jo ye wasl hai is wasl ko be-kar samajh
hum pe rangini-e-haalat nahin aane ki
dekh lo khol ke khidki ki zara der hain hum
dusri bar ye baraat nahin aane ki
ab tere baad faqat aab hi utrega yahan
ab ke barsat mein barsat nahin aane ki