KHwabon ka sailab nahin dekha jata

By

khwabon ka sailab nahin dekha jata
nind-nagar gharqab nahin dekha jata
jaane wale meri aankhen bhi le ja
in ko yun betab nahin dekha jata
itna kah kar ek shanawar dub gaya
afsurda girdab nahin dekha jata
jaane us ka chehra kaise dekhenge
jis ka nur-naqab nahin dekha jata
hum ne sara gulshan jalte dekha hai
tum se ek gulab nahin dekha jata

hamin par dhup barsata hai suraj bhi muqaddar bhi

By

hamin par dhup barsata hai suraj bhi muqaddar bhi
darakht-e-mehrban koi kare saya to hum par bhi
ayan hoti chali jati hain sab chehre ki tahriren
hui jati hai na-kafi khamoshi ki ye chadar bhi
badan ki raushni mein jo na dekha ja saka hum se
usi shishe ke paikar mein dhadakta tha wo patthar bhi
haqiqat se tasawwur tak safar mujh mein kiya us ne
magar mujh tak nahin pahuncha wo itni dur chal kar bhi
koi musa-o-isa-o-mohammad ab na aaega
hamare na-tawan shanon pe hai kar-e-payambar bhi

yunhi aksar mujhe samjha bujha kar lauT jati hai

By

yunhi aksar mujhe samjha bujha kar laut jati hai
kisi ki yaad mere pas aa kar laut jati hai
main bad-qismat wo gulshan hun khizan jis ka muqaddar hai
bahaar aati hai darwaze se aa kar laut jati hai
use apna banane mein bhi ek anjaan sa dar hai
dua honton talak aati hai aa kar laut jati hai
main apni qaid ko hi apni aazadi samajh lunga
rihai mujh ko zanjiren laga kar laut jati hai
agar itni hi sarkash hai to mujh pe kyun nahin girti
wahi bijli jo mera ghar jala kar laut jati hai
wahan par bhi charagh-e-arzu hum ne jalae hain
jahan se raushni bhi sar jhuka kar laut jati hai
use main dekh to leta hun lekin chhu nahin pata
koi shai hai jo mere pas aa kar laut jati hai

wo tabassum tha jahan shayad wahin par rah gaya

By

wo tabassum tha jahan shayad wahin par rah gaya
meri aankhon ka har ek manzar kahin par rah gaya
main to ho kar aa gaya aazad us ki qaid se
dil magar is jald-bazi mein wahin par rah gaya
kaun sajdon mein nihan hai jo mujhe dikhta nahin
kis ke bose ka nishan meri jabin par rah gaya
hum ko aksar ye khayal aata hai us ko dekh kar
ye sitara kaise ghalati se zamin par rah gaya
hum labon ko khol hi kab pae us ke samne
ek naya ilzam phir dekho hamin par rah gaya

teri fuzul bandagi bana na de KHuda mujhe

By

teri fuzul bandagi bana na de khuda mujhe
main kya hun aur tu samajh raha hai jaane kya mujhe
na tu nazar mein hai kahin na dasht hai na shahr hai
ye kis khala mein khinch lae tere naqsh-e-pa mujhe
tu apna kaam kar guzar mujhe koi gila nahin
jo waqt ne bana diya hawa tujhe diya mujhe
tujhe hi sochte hue phir aaj so gaya hun main
guzar tera ho khwab se to nind se jaga mujhe
wahan se dekhti hai kya hawa-e-dast-e-mariya
zara mere qarib aa main khak hun uda mujhe
main jaante hue bhi sab kharidta chala gaya
wo ashk bechta raha bata ke qahqaha mujhe
mile tamam log zindagi ki dhup-chhanw mein
bas ek 'imtiyaz' hi kahin nahin mila mujhe

taraj KHwahishon ka mudawa na ho saka

By

taraj khwahishon ka mudawa na ho saka
koi hamare waste isa na ho saka
itni shadid dhup thi mujh pe ki umr-bhar
abr-o-darakht se kabhi saya na ho saka
nindon mein chhod kar hamein aage nikal gaya
hum se us ek khwab ka pichha na ho saka
guzre phir ek bar to donon ke darmiyan
wo waqia jo tur pe pura na ho saka
dahkan-e-gham ne khun se sinchi zamin-e-dil
lekin ye dasht dasht tha sabza na ho saka