san li sada-e-koh-e-nida aur chal paDe

By

san li sada-e-koh-e-nida aur chal pade
hum ne kisi se kuchh na kaha aur chal pade
sae mein do ghadi bhi na thahre guzarte log
pedon pe apna nam likha aur chal pade
thahri hui faza mein ulajhne laga tha dam
hum ne hua ka git suna aur chal pade
tarik raston ka safar sahl tha hamein
raushan kiya lahu ka diya aur chal pade
rakht-e-safar jo pas hamare na tha to kya
shauq-e-safar ko sath liya aur chal pade
ghar mein raha tha kaun ki rukhsat kare hamein
chaukhat ko alwidaa kaha aur chal pade
'makhmur' wapsi ka irada na tha magar
dar ko khula hi chhod diya aur chal pade

mujh mein kisi ka aks na partaw Khaali aaina hun main

By

mujh mein kisi ka aks na partaw khali aaina hun main
mere tukde kaun samete ab tutun ya bikhrun main
meri rasai meri hadon tak teri faza mein tu bhi qaid
tu mujh tak aae to kyun-kar tujh tak kaise pahunchun main
rukh pe jo tere shafaq khili hai khun hai mere khwabon ka
kahe tu ai sham-e-tanhai tujh se lipat kar ro lun main
duri ke ye lamhe badh kar kahin na sadiyan ban jaen
tujh ko jab apne pas na paun jaane kya kya sochun main
diwaron se sar takraun band darichon ke pichhe
khuli faza mein aa niklun to mauj-e-hawa se uljhun main
kaun sunega ye tulani qissa kis ko fursat hai
jo kuchh mujh par bit rahi hai apne dil mein rakkhun main
lafzon mein ehsas ki kaliyan khila raha hun ai 'makhmur'
jaise koi mujh se kahta ho aa tere lab chumun main

ek bar mil ke phir na kabhi umr bhar mile

By

ek bar mil ke phir na kabhi umr bhar mile
do ajnabi the hum jo sar-e-rah-guzar mile
kuchh manzilon ke khwab the kuchh raston ke dhul
nikle safar pe hum to yahi ham-safar mile
yun apni sarsari si mulaqat khud se thi
jaise kisi se koi sar-e-rah-guzar mile
ek shakhs kho gaya hai jo raste ki bhid mein
is ka pata chale to kuchh apni khabar mile
apne safar mein yun to akela hun main magar
saya sa ek rah ke har mod par mile
barson mein ghar hum aae to begana-war aaj
hum se khud apne ghar ke hi diwar-o-dar mile
'makhmur' hum bhi raqs karen mauj-e-gul ke sath
khul kar jo hum se mausam-e-diwana-gar mile

bujh gai dil ki raushni rah dhuan dhuan hui

By

bujh gai dil ki raushni rah dhuan dhuan hui
subah chale kahan se the sham hamein kahan hui
shauq ki rah-e-pur-khatar tai to kar aae hum magar
nazr-e-hawadis-e-safar daulat-e-jism-o-jaan hui
ishq-o-junun ke wardat dida-o-dil ke sanehat
biti hui har ek baat dur ki dastan hui
koi bhi ab nahin raha jis ko sharik-e-gham kahen
daur-e-tarab ki yaad bhi shamil-e-raftagan hui
lut gai kaise dafatan raushniyon ki anjuman
aa ke kahan se khema-zan zulmat-e-be-karan hui
kis ko khabar ki hum ne kya khwab bane hain umr-bhar
kis se kahen ki zindagi kis liye raegan hui
tarz-e-bayan to be-qayas the tere gham-zadon ke pas
bol uthi nigah-e-yas band agar zaban hui

adhuri qurbaton ke KHwab aankhon ko dikha jaana

By

adhuri qurbaton ke khwab aankhon ko dikha jaana
hazaron duriyon par ye tera kuchh pas aa jaana
udasi ke dhundlakon ka dimagh-o-dil pe chha jaana
nazar ke samne ek gum-shuda manzar ka aa jaana
suni hai main ne akasr band darwazon ki sargoshi
sadaen chahti hain sab khuli sadkon pe aa jaana
teri yaaden ki is tufan-e-zulmat mein bhi raushan hain
hua mushkil hawa ko in charaghon ka bujha jaana
khala mein dubti si aahaten thin kuchh jinhen hum ne
safar mein sath rakkha manzilon ka aasra jaana
main tere sath hun to us ki khushbu ke taaqub mein
jahan tak ja sake ai sar-phiri mauj-e-hawa jaana
nazar us ki bhi ai 'makhmur' dhoka kha gai aakhir
wahi tha aashna chehra jise na-ashna jaana