suKHan-e-wapsin

By

dawa se kuchh na hua aur dua se kuchh na mila
bashar ne kuchh na diya aur khuda se kuchh na mila
zawal mera muqaddar bana ke chhod diya
mujhe khyal-o-hadis-e-baqa se kuchh na mila
main dard-o-dagh-e-yatimi mein yun raha mahsur
pidar se kuchh na mila mamta se kuchh na mila
jahan-e-ilm-o-hunar mein to sarfaraaz raha
dayar-e-shauq mein meri wafa se kuchh na mila
main apne aap mein jhanka to ye sada aai
khudi se kuchh na mila aur ana se kuchh na mila
kisi ne dida-e-bina ki raushni le li
kahun main kis se teri is ada se kuchh na mila
main khali hath chala aa raha hun teri taraf
tujhe batane ki teri ata se kuchh na mila
tere jahan se khamosh chal diya 'masud'
nawa-e-sher ko is be-nawa se kuchh na mila

pir-e-mughan-e-urdu

By

suna suna sa hai kyun aaj jahan-e-urdu
uth gaya kahte hain ek pir-e-mughan-e-urdu
jis ko dhundenge sada tishna-laban-e-tahqiq
roenge barson jise dida-waran-e-urdu
rah-rau rah-guzar-o-rahbar-e-urdu-e-qadim
warna milta tha kise nam-o-nishan-e-urdu
chhin gai ahl-e-watan ek mata-e-tahqiq
ai dakan lut gai phir teri dukan-e-urdu
aakhiri tir bhi tarkash ka hua rah-e-sipar
tut kar rah gai lo aaj kaman-e-urdu
kaun hota hai harif-e-mai-e-mard-afgan-e-ilm
kis ke sar jaega ab bar-e-giran-e-urdu

jamal

By

kahan se aa gain ranginiyan tamanna mein
ki phir khayal ne lale khilae sahra mein
teri nigah se meri nazar mein masti hai
tere jamal mein maujen hain us ke dariya mein
ye ho raha hai guman tere jism-e-khubi par
bhatak ke hur chali aai ho na duniya mein
nazar se kuchle hue motiyon ki jhalkaren
labon pe rang jo milta hai jam-o-mina mein
wo muskuraate se aankhon mein be-shumar kanwal
wo kasmasati adaen tamam aaza mein
napa-tula sa tabassum jachi hui si nazar
sani sani si wo palken ghubar-e-surma mein
wo narm nima se kundan badan ki rang-tarang
bani hui si wo kirnen libas-e-zeba mein
jo goshe goshe mein pinhan hai us ke rah-e-gurez
khayal gum hua jata hai qadd-e-rana mein
qadam qadam pe wahi tamkanat ka ek sawal
hai koi dusra hum sa sawad-e-ganga mein
bata main tujh se kahun kya ba-juz wo shauq ki baat
ki dal rakkha hai jis ko jawaz-e-mani mein
jamal-e-yar latif aarzu hai us se latif
ye aai hai na wo aaega harf-e-sada mein

hind ki ye shab-e-mahtab

By

aaj bhi tere liye sozish-e-gham kam to nahin
zakhm-e-dil par tere hamdam koi marham to nahin
tu jo phulon ki tarah phul kar itraata hai
dekhna yar tere jam mein shabnam to nahin
hind ki ye shab-e-mahtab bahut khub sahi
qalb-e-anjum ka magar dard abhi kam to nahin
chandni-raat ke wade bhi wafa hote hain
ai gham-e-dil ye sabab laeq-e-matam to nahin
tishna-kaami mujhe majbur to karti hai magar
tere saghar se jhijakta hun kahin hum to nahin
tu ne aasudagi-e-shauq se khaya hai fareb
qalb-e-shair mein jo dhadkan hai wo maddham to nahin
aaj 'masud' ki palkon pe diye hain raushan
sathiyo un ke sitaron se magar kam to nahin

ek kahani

By

raat kal fazaon mein teri hi kahani thi
hum bhi sunne wale the dil ki pasbani thi
aasman se aamad thi gum-shuda khayalon ki
jis qadar tasawwur tha itni shadmani thi
dur sari duniya se ek nagar basaya tha
us ka ek raja tha us ki ek rani thi
zulf-o-rukh ki baaten thin din tha aur raaten thin
subh kitni rangin thi sham kya suhani thi
yaad hain wo din ab tak jab hasin raaton mein
teri gungunahat par meri naghma-khwani thi
tere ek tabassum par waqt bhi thahar jata
is mein kab tarannum tha is mein kab rawani thi
aansuon se jita tha gauhar-e-mohabbat ko
teri kaamrani bhi kaisi kaamrani thi
kitni garm-joshi thi kitni girya-o-zari
kitni sard-mehri thi kitni sargirani thi
ye meri khudai thi ya teri khuda jaane
meri lan-tarani par teri be-zabani thi
main ne tujh ko kab samjha main ne tujh ko kab paya
main zamin ka banda tu ruh aasmani thi

zindagani ka KHala

By

zindagani ka khala
ye na bhar paya kabhi
lala-o-gul ko kabhi pyar kiya
raat-bhar taron ko bedar kiya
kam na hoti thi magar dil ki kasak
dil ka gham aankhon se barsaya kabhi
ye na bhar paya kabhi
zindagani ka khala
bhar liya us mein kabhi dard-e-chaman
kabhi be-nam maqasid ki lagan
jin se ehsas bhi jata tha bahak
shisha-e-dil ko bhi chhalkaya kabhi
ye na bhar paya kabhi
zindagani ka khala
fan ki dewi ne bhi barsai sharab
waqt ki mauj ne phenke dur-e-nab
jin se aai mere khwabon mein chamak
ji zara un se bhi bahlaya kabhi
ye na bhar paya kabhi
zindagani ka khala