ye shahr tamam andoh mein hai

ye shahr tamam andoh mein hai
is raat sipahi gasht par aaya nahin
tum ghar ja sakti ho
aur shahr ke bahar jitne shahr hain sab ke sab andoh mein hain
kal hafte ki tatil ka pahla din hoga
wo ladki ghas pe baith ke likhti hai aur hansti hai
ek tez hansi jo sat gharon ko chir gai
wo ladki ghas pe baith ke likhti hai aur hansti hai
in lafzon par jo us ne likhe
in lafzon par jo is se pahle aane wale sab ne likhe
in lafzon par jo is ke baad ke aane wale shayad is par likhenge
wo hansti hai aur likhti hai aur hansti hai
aur shahr tamam andoh mein hai
koi patthar aan hataega
is ghar ke bahar ek ghar hai
tum ghar mein ja kar so rahte
aur khwab ke liye dam kahe ko aane hain
khwab to rath par aate hain
aur tum ne rath-dewta ko khwab mein dal diya
ab shahr aur khwab aur aankh ka rishta tut gaya
ab dariya phailta jata hai
aur koi kinara pas nahin
aur dariya phailta jata hai
aur dariya phailta jata hai
aur dariya phailta jata hai

ret aaina hai

qais aasuda-e-naqsh raqsh-e-rawan
hairat-e-chashm parina hai
ret aaina hai
aur zangar-e-aina har aalam-e-chaub-o-abresham-o-khakdan
ret aaina hai
jab manaron mein ghanti baji
wo achanak mudi kal yahan koi tha
wo gajar dam uthi
us ne angdai li kal yahan koi tha
sanp lahraati sadkon pe chalte hue wo ruki
kal yahan koi tha
kal yahan kaun tha
qais aasuda-e-naqsh raqs-e-rawan
kaun suraj ko angar-zadon ke ghar le gaya
kal yahan bin muradon ki barish ka pahla phuwara pada
qais aagah-e-dad-o-rasad
qais be-kin-o-kad
ret aaina hai aur zangar-e-aina har aalam-e-chaub-o-abresham-o-khak-dan
khauf ek saya-e-saiban
sare ghar band hain
sare ghar band hain aur darichon pe baithi hui ladkiyan mujh pe hansne lagin
nind ek chandni
nind patthar pe phaili hui chandni
kaun patthar pe chalta rahe aur sambhalta rahe
kaun sota rahe
ret aaina hai
qais aasuda-e-naqsh raqs-e-rawan
hairat-e-chashm parina hai
ret aaina hai

mere panw ke niche KHak nahin

mere panw ke niche khak nahin kisi aur ke panw ki mitti hai
darwaza khula
aur mah-e-zawal dar aaya
band makan ke rauzan-e-dar se
aage sat dulhan ki qabr hai
niche kuza-garon ki basti hai
kuza-garon ki basti mein mere panw ke niche khak nahin
bade qisse hain
bade qisse hain dil sabr-o-sawal ke sunne ke
badi baaten saif-o-kitab pe likhne ki
bade khwab hain odh ke sone ko
kabhi khwab likhe nahin jate
kabhi baaten suni nahin jatin
kabhi qisse kahe nahin jate
kuza-garon ki basti mein bade qisse hain aur khak nahin
mere panw ke niche khak nahin
aur mah-e-zawal dar aaya
band makan ke rauzan-e-dar se
aage sat dulhan ki qabr hai
niche kuza-garon ki basti hai
kuza-garon ki basti mein
mere panw ke niche khak nahin kisi aur ki panw ki mitti hai

ibn-e-ziyaad ka farman

tumhaari haddiyan mudti nahin hain
rahm-e-madar se nikalne ke liye betab ho
sote raho ye ghar grihasti ka zamana hai
maweshi astabal mein jaenge aur unt kheme mein
faras ibn-e-ziyaada ke liye uzw ziyaada hai
sawari waste mushki hiran zanjir karte hain
zamin-e-shor se shorida-sar ifrit se baune
samundar se gulabi machhliyan
mitti se suraj mukh ka jangal
chaar-diwari se uth kar dekhta hai
aanganon mein hal nahin chalte
abu-suifyan se main ne suna tha
abu-suifyan se main ne suna tha
aanganon ka haal khemon ki khabar ghodon ke jal jaane ka qissa
jab bidak kar bhag uthe the maweshi unt suraj-mukh sipah-zade
abu-suifyan ke bete
abu-suifyan se main ne suna tha
abu-suifyan se main ne suna hai
aanganon ki khair likkhi hai ziyaad-ibn-e-ziyaada ne
nai belen chadhai hain purani kursiyon par
mez par khargosh pala hai
ghadon mein nariyal ki kasht ki hai
beach angnai mein likkha hai
tumhaari haddiyan mudti nahin hain
rahm-e-madar se nikalne ke liye betab ho
ye ghar grihasti ka zamana hai
maweshi astabal mein jaenge aur unt kheme mein

hona sab se baDa uljhawa hai

hona sab se bada uljhawa hai
shakh-e-sanobar chand ki aas mein jagti hai
aur din-bhar sone wale ghar ki dahlizon par aa kar baithte hain
aur khwahish-o-khwab ke andeshon mein raat
simatte pairahan ki lazzat ban kar rauzan-e-dar se jhankti hai
bachche maon ki gardan mein banhen dale sote hain
khwab hamari maen hain
khwab hamari maen hain
aur rah kinare baithe ladke ghar ko jaane wala sab se lamba raste chunte hain
shadabi is shahr mein ek din aai thi
shadabi har shahr mein ek din aati hai
aur har shahr ke ek goshe mein sannate ki chadar tane
ek akela ghar sota hai
bari bari ek ek aane wala
ek na ek din us ghar mein aata hai
shadabi us shahr mein ek din aai thi
us din shahr-e-panah mein sab se pahla aane wala main tha
aur chand saman jhalajhal chehre fanuson ka saut bane the
chand akela ghar
so ek din har jaane wala us ghar mein jata hai
maen apne bachchon ko us ghar mein ja kar janti hain
bahnen dhol suhag alap ke roti hain
aur bete
saz sajae maidanon mein ghode daudate hain
khemon mein har raat alaw jalae jate hain
aur zakhmi jism ko dagha jata hai
aur marne walon ki fihrist banai jati hai
khwahish khwab andeshe khauf
kabhi na thakne wale payaade
hum maidani log
so ek din har jaane wala us ghar mein jata hai
is ke baad jo hai wo shahr-e-panah mein aane ka pachhtawa hai
hona sab se bada uljhawa hai

zaban par zaiqa do paniyon ka hai

zaban par zaiqa do paniyon ka hai
samundar darmiyan hota to is se puchhte
kis samt jaega musafir kal
khunuk pani ke bajre par namak ki garm lahron mein
akela jaane wala jis taraf bhi jaega tanha nahin hoga
mohabbat paniyon par khelti hogi
so ye jal-makdiyon ki jal-sazi thi
ki sahil se ulajh kar log lahron mein utarte
aur un ko khauf hota aansuon ke paniyon mein khushk hone ka
main in ko paniyon ki nazr karta hun
so ai aadhe badan ki mehrban machhli
tum apne aansuon ko khushk mat karna
mohabbat paniyon par khelti hogi
aur us ka zaiqa khul jaega
jis waqt jaega musafir kal
khunuk pani ke bajre par namak ki garm lahron mein