yak-nikati agenda

mahina bhar sar ke baal na katwaun to mujhe kya
dekhne walon ko wahshat hone lagti hai
har hafte hathon aur pairon ke nakhun na lun to
mahsus hota hai jaanwar banta ja raha hun
subh shawe na banaun to ghar se nikalte jhijak aati hai
thahariye zara main dekh lun bahar ye shor kaisa hai
are mali lawn mein ghas ki machine pher raha tha
aap to jaante hain ghas na kate to machchhar jaan nahin chhodte
waise kabhi aap ne takistanon mein angur ki tund-mund mudhiyon ko dekha hai
yaqin hi nahin aata ki un se nai shakhen phutengi
jo patton aur guchchhon se lad jaengi
abhi main ne gulab ke paudon ki apne hathon se kant-chhant ki hai
meri aalim fazil biwi ki jaan nikalti ja rahi thi
jab main bedardi se qainchi chala raha tha
lekin main baghbanon ki aulad hun
dukh to mujhe bhi hota hai
pale hue paudon aur darakhton ko chhangte hue
lekin phul aur phal to us ke baghair yun samjhe rang hi nahin late
na wo husn na wo maza na wo bohtat
aap bhi sochte honge punjab ka muqaddama ladte ladte
main hajjamon aur maliyon ki wakalat karne to nahin chal pada
sada si baat hai ki insanon aur paudon ki tarash-kharash hoti rahni chahiye
lekin kya baal katwa liye jaen nakhun le liye jaen shawe kar li jae
to kaam khatm ho jata hai
kya insan sirf jism ka nam hai ya
jazbaat khayalat khwahishat aur azaem bhi hamara hissa hain
to kya jism ke sath un ki tarash-kharash bhi zaruri hai
shayad jazbaat aur khayalat ki tarash-kharash hi ko tahzib kahte hain
shayad khwahishatan aur azaem ki nok-palak sanwarne hi se tamaddun ne janm liya hai
warna to insan gharaz-mandana huquq hi ke chakkar se nahin nikalta
aur zimmadariyon ke idrak-o-ehsas ki naubat hi nahin aati
muaf kijiye ye sari chori-chakari bad-kari hawas-kari
ye sari lut-mar jal-sazi haram-zadgi be-sabri na-shukr-guzari
ye sara jhut fareb lalach fitna fasad
jazbaat-o-khayalat aur khwahishat-o-azaim ki hajamat na banane hi ka to natija hai
janab jazbaat ko tamiz aur khayalat ko akhlaq na sikhaya jae
khwahishat aur azaem ke munh par insaniyat ki lagam na di jae
to phir wahi kuchh hota hai jo aaj hamare yahan ho raha hai
aur ye kah kar ziyaada din guzara nahin ho sakta ki
is tarah to hota hai is tarah ke kaamon mein
aap hansenge main jab bhi ye misra padhta hun
is tarah se mujhe ustura yaad aa jata hai
qainchiyan yaad aa jati hain hajamat yaad aa jati hai
kuchh bhi ho main to samajhta hun ki qaumi sath par hamari hajamat bahut zaruri ho gai hai
hamare sirf baal aur nakhun hi nahin badh gae
hum zahir hi mein nahin baatin mein bhi jaanwar bante ja rahe hain
jaanwariyat hamare dil-o-dimagh mein utar gai hai
ab to andar bahar hajamat ki zarurat hai
bhai bulao kisi nashtar-ba-dast hajjam ko jo hajamat banae aur fasd khole hamari
lekin ek anar aur sau bimar
ek akela hajjam aur chaudah karod insan
ye to hum sab ko khud hi aaine ke samne baith kar hajamat banai aur fasd kholni padegi apni
to bhaiyo aur bahno
mere pyare ham-watano
aaj se qaumi sath par hamara yak-nikati agenda kya thahra
boliye sab boliye pure zor se boliye
hajamat
hajamat
apni apni hajamat

wassalam

pyare bete ibrahim
tumhein shikayat hai ki ek arse se main ne kuchh likha likha ya nahin
'iqbaal' ne kaha tha
nale bulbul ke sunun aur hama-tan gosh rahun
ham-nawa main bhi koi gul hun ki khamosh rahun
phir 'faiz' ne kaha tha
bol ki lab aazad hain tere
bahut uksata hun apne-ap ko
lekin zaban ki girah khulti hi nahin
aur dil ka shoala-lab mojiz-bayan par aata hi nahin
hae 'nasir'-kazmi'
bas 'ghaalib' ki tarah kan lapet kar baith jata hun
khula kar faeda arz-e-hunar mein khak nahin
bolunga to sunega kaun
kisi ke kan mein pad bhi gai to samjhega kaun
aaj-kal to bade bade khad-penchon ki haalat ye hai
ki koi sunta hai to samajhta nahin
koi samajhta hai to sunta nahin
aur bahut hain jo sunte bhi nahin samajhte bhi nahin
phir mere pas nale ko hai kiya
kaun si zaruri baat hai jo an-kahi rah gai hai
sare falsafe sare nazariye sare masail to bayan ho chuke
shairon ne latif se latif jazbe ko sau sau tarah se bandh dala
mausiqaron ne nazuk se nazuk ehsas ko paband le kar diya
na kisi ke liye kuchh kahne ko baqi hai
na kisi mein sunne ka yara hai
yahi ghanimat hai ki dil bhar aae to munh hi munh mein kuchh badbada len
aakhir jab khuda ne abhi khudai na banai thi
to akele mein kya karta ho wo
khud hi bolta hoga khud hi sunta hoga wo
mera ye maqam to nahin lekin haalat yahi hai
khud hi bolta hun khud hi sunta hun
bas ye samajh mein nahin aata ki kaha kya hai aur suna kya hai
waise ye samjhe samjhane wali baat bhi tedhi khair hai
'ghaalib' ne kaha tha
bak raha hun junun mein kya kya kuchh kuchh na samjhe khuda kariye koi
aur is se pahle 'mir-dard' ne bahut dard se bataya tha
samajhte the na magar sunte the tarana-e-dard samajh mein aane laga jab to phir suna na gaya
wassalam

shana-ba-shana

mujhe kuchh nahin malum kya chahti ho tum mujh se
mere pas hai kya jo main de sakta hun kisi ko
tabl-o-alam hai pas apne na mulk-o-mal
aur phir koi bahut khas chiz hi honi chahiye tumhein nazar karne ko to
kya nahin hai tumhaare pas pahle se
husn aisa ki khuda bhi khush ho gaya hoga tumhein bana kar
raunaq si lag jati hai baith jati ho jahan
chalti ho to sath chalen sarw-o-sanobar
upar se paya hai zehn-e-rasa
main to azal se marta aaya hun husn aur danish ke imtizaj par
mahz khub-surat aurat kabhi na lubha saki mujhe
na hi mutassir kar saki mujhe kam-shakl danish-wari
main aksar kahta hun tum mein khuda ne jama kar diye hain chand aur suraj
dastanon se mawara chande aaftab chande mahtab koi hai to tum
aur phir tumhaari aawaz
pattharon ko pighla dene wala gudaz hai is mein
bolti ho to charagh se jal uthte hain mahfil mein
kyun sharminda karti ho ye kah kar mujhe ki tumhein zarurat hai meri
yaad aaya ek roz kaha tha tum ne
har kisi ko ek shana chahiye jis par sar rakh ke ro sake wo
aur fikr na ho ki mazaq udaya jaega is ka ya banaya jaega is baat ka batangad
lekin meri jaan aisa kaun sa dikh hai jo naubat aa gai rone ki
kya kahte hain roen tumhaare dushman
go main tumhaara dushman nahin lekin main jo hun rone ke liye
mere shane par sar rakh kar roin agar tum
to tumhaare aansu na ponchh sakunga main
main to khud bah jaunga aansuon mein
mujhe to is khayal hi se rona aa raha hai ki tumhaari aankhon mein bhare hon aansu
tumhein sach-much rota dekh kar kya haal hoga mera
han ek surat ho sakti hai albatta
tum ro lo mere shane par sar rakh kar
aur main ro lun tumhaare shane par sar rakh kar
kya ye mumkin hai
shana-ba-shana

shaiKH salahuddin

ye sujhi hai kya aap ko shaikh sahab
jo chup sadh li aap ne shaikh sahab
lapeta tha nasir jab jab munh socha main ne
mohabbat hi kamzor thi aap ki jo nahin rok pai use shaikh sahab
sajila tha gul aap ke bagh ka sab se wo shaikh sahab
gaya wo gai bazm-e-yaran ki raunaq gai us ki khushbu
tarannum se khali hui shairi guftugu mein maza na raha shaikh sahab
mujhe ilm tha ki chhupate hain gham aap apna
magar aap ko main bahut sakht-jaan jaanta tha
bhai aql-e-kul manta tha
kaha aap ka go nahin manta tha
kahan to ye dawa ki sau sal ki umr hogi hamari
kahan ab yakayak batae bina chal diye aap nasir se milne
akele mein dil aap ka bhi kahan lagta hoga
kitaben khwah quran hi kyun na ho dosti ka badal to nahin shaikh sahab
wafa ke taqaze kiye aap ne sare pure
meri wapsi ke rahe muntazir aakhiri sans tak aap to shaikh sahab
na toda kabhi yaad ka mujh se rishta
dhar mein jise mil na paya kabhi rasta wapsi ka
bahut zor mara ki main laut aaun
karun aa ke aabaad wo bagh-e-hikmat
chamakte the jis mein misal-e-mehr aap hi shaikh sahab
masail ke jangal mein gum ho gaya main
siyasat ke kambal ko jitna bhi main chhodta wo nahin chhodta tha mujhe shaikh sahab
mujhe ab chala hai pata ki mohabbat na kamzor thi aap ki shaikh sahab
bulawe pe nasir ke yun chal diye aap uth kar
mohabbat thi kamzor meri
bulate rahe aap barson mujhe main na aaya
bahut der kar di hai aane mein be-shak
magar ab mein aaya ki aaya
zara do ghadi intizar aur ghaalib se mil lun
bahut kuchh hai kahna unhen aap se shaikh sahab
main paigham le lun
sakina se mariyam se anwar se rukhsat mein ho lun
gale se ibrahim ko main laga lun
main aaya ki aaya khuda ki qasam shaikh sahab

murda-KHana

duniya ki ila-billa thasi padi hai mujh mein
han kuchh kaam ki chizen bhi hain is kabad-khane mein
ilhami kitabon se le kar falsafa-e-adab aur shairi tak ki
libraryan bhari padi hain dimagh mein
aankhon mein utar kar dekhen to husn-e-do-alam paenge jalwa-afroz
pure pure nigar-khane mere bhi sanam-khane tere bhi sanam-khane
kanon mein baithuon se le kar kop-land ki samfaniyan
aur tansen ki bandishon se raushan-ara begam ki gaiki tak mahfuz hai aaj bhi
lekin gand to macha rakkha hai mere jism ne
aur is ke andar dhadakte dil ne
gandagi ka dipo hai mera ye jism
balki karkhana hai gandagi ka
achchhi se achchhi chiz dalen aap is mein
bol-o-baraaz bana kar rakh deta hai use
dal kar dekhen han han ye phal dalen ye mithai
ye tikke aur kabab dalen is mein
aur phir nak par rumal rakh kar dekhen ki banta kya hai in ka
khair jahan kar-khane hun wahan gandagi to hoti hai laziman
gandagi na ho to aaludgi sahi
id-e-qurban par shahr ka chakkar to lagya hi hoga aap ne
aziz-o-aqarib se milne ke liye
jo kuchh sadkon aur galiyon mein nazar aata hai ojhadiyon aur aanton se ubalta hua
wahi kuchh hai mere andar bhi
ye to meri khaal ka kamal hai jo aap ne pas bitha rakkha hai mujhe
aur agar aap mein jhankne ki himmat ho mere dil mein
to shayad abhi utha den apne pas se mujhe
karda gunahon ki nahin na-karda gunahon ki baat kar raha hun main
khwahishon aur hasraton ke janaze pade hain
mere dil mein qatar-andar-qatar
main ne tashbih di thi kabad-khane se apne aap ko
asal mein to ek bahut bada murda-khana hun main
fasadat mein qatl-e-am dekha ho shayad aap ne
zalzale mein mare jaane walon ki lashen nikalte to dekha hoga logon ko
ya phir telewision par bosina aur koswo mein ijtimai qabron ki khudai ke manazir
jab lawahiqin koshish kar rahe hote hain lashon ko pahchanne ki
aur nak phat rahe hote hain un ke sadand se
jald-az-jald dobara dafna di jati hain ye lashen
lekin mere dil mein khwahishon aur hasraton ki lashen gal-sad gai hain pade pade
aur main phir bhi dafan nahin karta unhen
dafn karna chahta hi nahin
aur chahun bhi to kahan karun dafn unhen
dimagh mein
dimagh mein kulbulata hafiza kahan mohlat deta hai us ki
dil hi to hai jis mein dafna sakta hun unhen
inhi murda khwahishon aur hasraton ko dekh dekh kar to jita hun main
ye to dafan hongi mere sath hi
aur ab samajh mein aata hai ki kyun banai jati hain badi badi qabren
baadshah log to marne se pahle hi banwa liya karte the apne maqbare aur ehram
mujhe ghin aati thi badi badi qabron se
main kaha karta tha dekho un mal-zadon ko
zindagi mein bhi ghere rakhte the zarurat se ziyaada zamin
aur mar kar bhi itni jagah gher lete hain ki khuda ki zinda makhluq ko mayassar nahin sar chhupane ko
mar kar bhi nahin mitti zamin ki hirs un ki
magar ab sochta hun shayad unhen waqai zarurat ho badi qabron ki
shayad un ke andar pade hun mujh se bhi ziyaada janaze
khwahishon aur hasraton ke
shayad un ki ojhadiyon aur aanton mein ghalazat ho mujh se bhi ziyaada
waise kahin main bhi to jawaz nahin dhundh raha apne liye kushada qabr ka

ism-e-azam

ikkis sal umr thi us ki bas
abhi us ne goya zindagi ko aankh bhar ke dekha bhi na tha
khelne kudne ke din the ki zamane ki rit ke mutabiq
chat mangni pat byah ho gaya
aur tin sal mein tin bachche bhi paida ho gae
phir achanak bechaari ko wo bimari mil gai
jis ke panje se koi khush-nasib hi chhutta hai
mujhe barson pahle ganw mein apni chitkabri bakri yaad aa gai
jis ne ek jholi mein panch bachche diye the
aur chand roz baad mar gai thi
mari hui bakri ke thanon se is ke panchon bachche
dudh ki aakhiri bund tak nichod lene ke chakkar mein
ek dusre se guttham-guttha ho rahe the
main ne khuda se kaha
ghazab ke sitam-zarif ho tum bhi
aadmi ko itna kamzor paida kiya hai
bakri ka bachcha to janm lete hi chaar tangon par khada ho jata hai
magar aadmi ka bachcha baras-ha-baras tak yatimon ki tarah sahaare dhundhta phirta hai
aur phir tum ye sahaare bhi chhin lete ho
chalo marhum bap ki jagah to tum khud pur kar lete ho
ki aasmani bap kahlane ka tumhein azal se shauq hai
lekin ye nau-maulud aur nau-khez bachchon ko tum maon se kis khate mein mahrum kar dete ho
hansa bahut hansa
main kahe baghair na rah saka ki aafrin hai
dusre ke dukh par is tarah khile bandon to saffak siyasat-dan bhi nahin hanste
achanak mera shana jhinjhod kar bola zara meri taraf dekho
mujhe guman tha ki to raat aur quran ke auraq se nikal kar
ek pur-jalal mardana paikar mere samne hoga
magar wahan to ek hari-bhari aurat khadi thi
jis ki chhatiyon se dudh ki dhaaren fawware ki tarah phut rahi thin
qarib tha ki main ghash kha kar gir jata
isi ne mujhe sambhaala diya
aur dhire se kaha
main bap bhi hun aasmanon mein
main man bhi hun zamin par
dobara us ki jaanib dekha
aankhon se do garm garm aansu mere chehre par tapak pade
main ne kaha pahle tum hans rahe the
ab tum ro rahi ho
kaha hansi aur rone ka ek hi nam hai
zindagi
main ne kaha tumhaare mardana namon ka to shumar nahin
logon ko ninnanwe ke phere mein dal rakkha hai tum ne
murshidon se ism-e-azam puchhte puchhte behaal ho jate hain
ab tumhaare zanana nam bhi dhundne padenge
zer-e-lab muskura ke kaha
paida hote hi tum sab ke munh par mera ism-e-azam aa jata hai
har koi az-khud pukar uthta hai
man
aur phir apni man ki chahat mein sab ki man ki bhul jata hai
nam bhi yaad nahin rahta us ka