pichhli raat

raat kamre mein hi bhatakti rahi
nind bhi be-qarar thi meri
khwab bhi unghne lage sare
mujh ko bistar bula raha tha bahut
karwaten dekhne lagi rasta
aur tanhai shor karne lagi
jagte jagte thaka main bhi
aur phir subh subh bil-akhir
main teri yaad odh kar soya

wasl

main ne teri yaad ka lamha boya tha
khun pilaya tha dharti ko
dard-o-gham ki khad bhi dali
mere aansu ke suraj ne
hijr ke paude ko sincha tha
aur ab dekho
hijr ka pauda ped bana to
us par wasl ke phul aur phal aae hain

waqt

waqt bada zalim hai mohsin
umr ko meri noch noch ke kha jata hai
pi jata hai roz tawanai meri
rakh mere mazi ki har din
mere hi baalon par lipta rahta
aankhon mein tariki jhonkta rahta hai
mere badan pe jhurriyan malta rahta hai
sanson ko danton se katta rahta hai
til til kar ke mujh ko marta rahta hai
waqt bada chaalak bhi hai
aata hai kab hath kisi ke
lekin mere hath laga to
is se ek ek zulm ka badla le lunga
aur khuda ke pas use pahuncha dunga

udas chand

aasman par udas baitha chand
raat-bhar tare ginta rahta hai
chahta hai ke jhuk ke dharti ki
chum le ye chamakti peshani
aur hasrat nikal le dil ki
kaun samjhae par diwane ko
khwahishen hasraten jo hain dil ki
khwahishen hasraten hi rahti hain
khwahishon par chala hai bas kis ka
hasraten kis ko ras aai hain

shaer

jhuthe shaer ye ghaur se sun len
shairi sab ke bas ki baat nahin
ye wo ilham hai ke jis ke liye
rab hi chunta hai apne bandon mein
aise bandon ko jin ke sine mein
dard hota hai sare aalam ka
jo mohabbat ki baat karte hain
jo ukhuwwat ki baat karte hain
jo sadaqat ki baat karte hain
zulm ke samne khade ho kar
jo baghawat ki baat karte hain
muflison aur gham ke maron ki
jo himayat ki baat karte hain
na-ummidi ke ghup andheron mein
jo diye aas ke jalate hain
bughz rakhte nahin jo sine mein
dushmanon ko gale lagate hain
sare aalam mein amn ki khatir
raat-din khun-e-dil jalate hain
jin ko shohrat ki aas hoti nahin
jin ko daulat ki aas hoti nahin
shan-o-shaukat ki aas hoti nahin
jo qalandar ki tarah jite hain
jo faqiron ki tarah rah kar bhi
baadshahon ki tarah jite hain
jhuthe shaer ye ghaur se sun len
shair-e-be-nawa ke sine par
sher utarte hain aayaton ki tarah

rishte

sukhe patton ki tarah tut ke gir jate hain rishte bhi agar in ko mohabbat ki tar-o-taza hawa pani jo ehsas ki mitti mein faraham na karen
han magar
bhule se jab tut ke gir jaen kabhi kuchh rishte
to phir achchha hai ke un ristho ko yakja kar ke
waqt ke jalte sulagte hue chulhe ke hawale kar den