waris

nubuwwat ka silsila khatm ho chuka
raunat ka silsila jari hai
ab koi zamana
kisi nabi ka zamana nahin
har daur
ek firaun ka daur hai
jis ke qabze mein
qarun ka khazana hai
jis ne
ambiya ki miras par qabza kar liya hai
use pahchanna mushkil nahin
us ke pas
tauhin risalat ki talwar hai
jo us par iman na laen
wo lapata ho jate hain
jo iman le aaen
unhen wo khizr ki tarah talash kar leta hai
nuh ki tarah
us ki kashti mein
har-nau ka jaanwar hai
us ke mahal mein
sulaiman ka takht bichha hai
mukhalifin ke liye
us ke qaid-khane mein
isa ki suli hai
farishton ka lashkar use sajda karta hai
kyunki us ki baghal mein
musa ka asa hai

tumhaara nam

kya tumhaara nam ain se shurua hota hai
main lughat khangal raha hun kisi ishwa-saz ka nam nahin mil raha
kya tum ne apna nam chhupa diya
kya tumhaara nam shin se shurua hota hai
main nazmen padh raha hun kisi shoala-rukh ka nam nahin mil raha
kya tum ne shairon ko jalwa nahin dikhaya
kya tumhaara nam qaf se shurua hota hai
main sahife dekh raha hun kisi qayamat-khiram ka nam nahin mil raha
khuda tumhaara nam lena bhul gaya
main ain shin aur qaf ko mila kar tumhaara nam bana leta hun
aaj se tum mera ishq ho

tarkhan

kursi mein nikli hui
kil ki tarah
siyasat-dan mujhe chubhte hain
jab aur jahan
nazar aate hain
thonk deta hun unhen
apne hathaude se
un ke haq mein ya khilaf
dalael ko tole baghair
tarkhan ki dukan mein
taraazu ka kya kaam

talash

ahl-e-aql ke sath
main kuchh dur chala
khuda nahin mila
ahl-e-kitab ke sath
main kuchh dur chala
jawab nahin mila
ahl-e-eqtidar ke sath
main kuchh dur chala
marifat nahin mili
ahl-e-tazabzub ke sath
main kuchh dur chala
qarar nahin mila
ahl-e-ishq ke sath
main kuchh dur chala
husain mil gaya

siyani

wo ladki har paheli bujh leti hai
use har muamma hal karna aata hai
har uljhan ko suljha leti hai
har masale ka hal talash kar leti hai
har mushkil ko aasan bana deti hai
har pareshani dur kar deti hai
chand ke us par ki khabar le aati hai
gahre samundar ki tah mein jhank leti hai
hatheli par naqsh lakiren padh sakti hai
chehre par ubhri hui tahriren samajh jati hai
aankhon mein chhupe hue dard jaan leti hai
tamam sawalat ke jawab use aate hain
bas mere ek sawal ka jawab kabhi nahin deti
wo ladki hai ya koi paheli hai