yaum-e-mazdur

By

diwar pe mazdur ki taswir saja kar
akhbar ke kone mein khabar ek laga kar
kuchh card bhi mazdur ke hathon mein utha kar
do-chaar gharibon ko bhi dharti pe bitha kar
un mein se kisi ek ko stage par la kar
phir us ki kahani sabhi logon ko suna kar
taqrir kara kar to kabhi tali baja kar
mazdur ko mazdur ka irfan dila kar
aur apne tain kar-e-muqaddas ko nibha kar
har sal ye ehsan jatate hain bade log
mazdur ka phir jashn manate hain bade log

halchal

By

mujhe achchha nahin lagta
khada khamosh sa dariya
koi halchal ho
tufan ho
koi to baadban tute
koi to nakhuda aisa ho jo baad-e-mukhalif ko
palat de zor-e-bazu se
na kashti dagmagae us ki lahron ke talatum par
na kashti dolti jae hawa ke rukh pe sahil par
bahut girdab bhi honge
bahut bhaunchaal aaenge
ho aisa na-khuda ki jo bhanwar mein dub na jae
khud apni zat ke iqan par bahar nikal aae
yaqin ho aap par to sahilon ko chhod dete hain
bharosa ho basirat par to dariya mod dete hain
yun apne aap mein tufan ki halchal macha rakkho
ki tughyani nahin aati to dariya sukh jate hain

gunah

By

mohabbat barmala izhaar hai sachche talluq ka
agar koi kahe chhup kar
mujhe tum se mohabbat hai
bharosa tum nahin karna
gunah ke waste khalwat hi to darkar hoti hai

guDiya

By

khilauna to nahin hun main
na mitti ka koi but hun
ki jab tum hath ko modo nahin hogi mujhe taklif
ki jab tum aankh ko phodo to chikhen bhi na niklengi
bina soche
bina dekhe meri shadi kisi gudde se kar doge
mere sar mein kisi bhi nam ka sindur bhar doge
mujhe mujh se bina puchhe mujhi se dur kar doge
suno ye jaan lo tum bhi
suno ye jaan lo tum bhi
murawwat chhod di main ne
jise gudiya samajhte the
wo gudiya tod di main ne

chingariyon ka raqs

By

bujhana bhul jati hun
main yaadon ke charaghon ko
main khidki khol deti hun
khubi jab apne khwabon ki
hawaen sarsaraati hain
to lau bhi thartharaati hai charaghon ki
mere kamre mein jo chingariyan si raqs kartin hain
meri sochon ki taswiron ko paiham aks kartin hain