ab uski yaad satane ko bar bar aae

By

ab us ki yaad satane ko bar bar aae
wo zindagi jo tere shahr mein guzar aae
ye bebasi bhi nahin lutf-e-ikhtiyar se kam
khuda kare na kabhi dil pe ikhtiyar aae
qadam qadam pe gulistan khile the raste mein
ajib log hain hum bhi ki su-e-dar aae
na chahchahe na surud-e-shaguftagi na mahak
kise ab aisi bahaaron pe e'tibar aae
junun ko ab ke gareban se kya milega ki hum
ba-faiz-e-mausam-e-gul pairahan utar aae
teri lagan ne zamane ki khak chhanwai
teri talab mein tamam aarzuen haar aae
ye fakhr kam to nahin ku-e-yar mein 'nikhat'
na sharmsar gae the na sharmsar aae

ai dil samaaton pe sitam ki duhai de

By

ai dil samaaton pe sitam ki duhai de
is be-karan sukut mein kuchh to sunai de
ye wasf bhi kamal-e-junun aashnai de
har aaine mein ek wahi surat dikhai de
main bhi to rang-o-bu ka tamasha karun kabhi
qudrat mere chaman ko bhi jalwa-numai de
dil ki basaraton ka ye ejaz hai ki main
aankhen bhi band rakkhun to rasta dikhai de
har samt zindagi ka hai mela laga hua
lekin har aadmi yahan tanha dikhai de

ai mauj-e-saba soz-e-mujassam use kahna

By

ai mauj-e-saba soz-e-mujassam use kahna
mumkin hai wo puchhe mera aalam use kahna
chaha mere haalat ne paiham use kahna
lekin na hui pyar ki lau kam use kahna
ek hum hi nahin shaki-e-alam use kahna
ab ahl-e-tarab ko bhi hai ye gham use kahna
shayad kabhi pad jae kisi taur zarurat
milte hain sar-e-rahguzar hum use kahna
tu kis liye naraaz hua ahl-e-wafa se
duniya to hamesha se hai barham use kahna
kahna to bahut kuchh hai magar maslahat-e-waqt
be-ab se hain shoala-o-shabnam use kahna
mana ki mere dam se nahin bazm ki raunaq
phir bhi to ghanimat hai mera dam use kahna

ab ahl-e-dil hain ki nayab hote jate hain

By

ab ahl-e-dil hain ki nayab hote jate hain
ghubar-e-khatir-e-ahbab hote jate hain
tumhaare aane se kuchh iztirab kam hota
ye kya ki aur bhi betab hote jate hain
sukun-maab samajhte the jin kinaron ko
simat ke halqa-e-girdab hote jate hain
hamein bhi raat ko din kahna aata jata hai
ki hum bhi hamil-e-adab hote jate hain
hamein mile na mile zindagi magar 'nikhat'
suna hai zist ke asbab hote jate hain

har ek lamha tabiat pe bar hai, kya hai

By

har ek lamha tabiat pe bar hai, kya hai
tumhaara gham ki gham-e-rozgar hai, kya hai
wo hum pe aaj bahut jalwa-bar hai kya hai
ab is ada mein adawat hai, pyar hai, kya hai
sitam to ye hai ki is ahd-e-jabr mein bhi yahan
malul hai na koi be-qarar hai, kya hai
hazar rang-ba-daman sahi magar duniya
bas ek silsila-e-etibar hai, kya hai
faza chaman ki hai aisi ki kuchh nahin khulta
khizan ki rut hai ki fasl-e-bahaar hai, kya hai
suna hai raat to kab ki guzar gai lekin
hamein sahar ka abhi intizar hai, kya hai
chaman hamara hai lekin chaman hamara nahin
na bebasi na koi ikhtiyar hai, kya hai
batae jate hain unwan nae nae 'nikhat'
magar tamasha wahi wahi bar bar hai, kya hai