ye roz hashr ka aur shikwa-e-wafa ke liye

By

ye roz hashr ka aur shikwa-e-wafa ke liye
khuda ke samne to chup raho khuda ke liye
ilahi waqt badal de meri qaza ke liye
jo koste the wo baithe hain ab dua ke liye
bhanwar se naw bache tere bas ki baat nahin
khuda pe chhod de ai nakhuda khuda ke liye
hamare waste marna to koi baat nahin
magar tumhein na milega koi wafa ke liye
hazar bar mile wo magar nasib ki baat
kabhi zaban na khuli arz-e-muddaa ke liye
koi zarur hai didar-e-akhiri mein naqab
hazar waqt pade hain teri haya ke liye
mujhe mita to rahe ho maal bhi socho
khata muaf taras jaoge wafa ke liye
wo jaan kar mujhe tanha meri nahin sunte
kahan se laun zamane ko iltija ke liye
mere jale hue tinkon ki garmiyan tauba
khula hua hai gareban-e-gul hawa ke liye
mariz kitna tha khuddar jaan tak de di
magar zaban na khuli arz-e-muddaa ke liye
wo ibtida-e-mohabbat wo ehtiyat-e-kalam
banae jate the alfaz iltija ke liye
zara mariz-e-mohabbat ko tum bhi dekh aao
ki mana karte hain ab chaaragar dawa ke liye
'qamar' nahin hai wafadar khair yunhi sahi
huzur aur koi dhundh len wafa ke liye

tum apni yaad se kah do na jae chhoD ke dil

By

tum apni yaad se kah do na jae chhod ke dil
ki dard-e-hijr na rakh de kahin marod ke dil
ab aap ke mere ghar tak qadam nahin aate
ye wo saza hai diya tha jo hath jod ke dil
khuda rakhe abhi kamsin ho qadr kya jaano
zara si der mein rakh doge tod-phod ke dil
liya tha jaise usi tarah pher bhi dete
ye kya ki phenk diya tum ne munh sikod ke dil
hamare sath na dekhi bahaar taron ki
'qamar' chale gae wo chandni mein tod ke dil

tere nisar na dekhi koi KHushi maine

By

tere nisar na dekhi koi khushi main ne
ki ab to maut ko samjha hai zindagi main ne
ye dil mein soch ke tauba bhi tod di main ne
na jaane kya kahe saqi agar na pi main ne
koi bala mere sar par zarur aaegi
ki teri zulf-e-pareshan sanwar di main ne
sahar hui shab-e-wada ka iztirab gaya
sitare chhup gae gul kar di raushni main ne
siwae dil mujhe dair-o-haram se kya matlab
jagah huzur ke milne ki dhund li main ne
jahan chala diya saghar ka daur ai waiz
wahin pe gardish-e-ayyam rok di main ne
balaen lene pe aap itne ho gae barham
huzur kaun si jagir chhin li main ne
duaen do mujhe dar dar junun mein phir phir kar
tumhaari shohraten kar din gali main ne
jawab us ka to shayad falak bhi de na sake
wo bandagi jo teri rahguzar mein ki main ne
wo jaane kaise pata de gae the gulshan ka
na chhoda phul na chhodi kali kali main ne
'qamar' wo nind mein the un ko kya khabar hogi
ki un pe shab ko lutai hai chandni main ne

sawal chhoD ki haalat ye kyun banai hai

By

sawal chhod ki haalat ye kyun banai hai
use na sun jo kahani suni-sunai hai
patanga shama pe marta hai kya burai hai
use kisi ne bhi roka hai jis ki aai hai
hanse hain gul na kali koi muskurai hai
huzur kaise ye kah dun bahaar aai hai
zarur koi alamat qaza ki pai hai
mujhe azizon ne surat teri dikhai hai
na jaane hijr ki raat aur meri siyah-bakhti
kahan kahan ke andhere samet lai hai
lahad se kab uthen dekho musafiran-e-adam
safar hai dur ka raste mein nind aai hai
asir kya kahen sayyaad ye to samjha de
qafas mein bu-e-chaman puchhne ko aai hai
mujhe na chhed qayamat hai meri aahon mein
khuda rakhe teri mahfil saji-sajai hai

raaz-e-dil kyun na kahun samne diwanon ke

By

raaz-e-dil kyun na kahun samne diwanon ke
ye to wo log hain apnon ke na beganon ke
wo bhi kya daur the saqi tere mastanon ke
raste rah taka karte the mai-khanon ke
baadalon par ye ishaare tere diwanon ke
tukde pahunche hain kahan ud ke garebanon ke
raste band kiye dete ho diwanon ke
dher lag jaenge basti mein garebanon ke
na azan deta na hushiyar barahman hota
dar to us shaikh ne khulwae hain but-khanon ke
aap din-raat sanwara karen gesu to kya
kahin haalat badalte hain pareshanon ke
mana kar girya-e-shabnam pe na ye phul hansen
lale pad jaenge ai baad-e-saba jaanon ke
kya zamana tha udhar sham idhar hath mein jam
subh tak daur chala karte the paimanon ke
wo bhi kya din the udhar sham idhar hath mein jam
ab to raste bhi rahe yaad na mai-khanon ke
aaj tak to meri kashti ne na pai manzil
qafile sainkadon gum ho gae tufanon ke
khak-e-sahra pe lakiren hain unhen phir dekho
kahin ye khat na hon likkhe hue diwanon ke
dekhiye charkh pe tare bhi hain kya be-tartib
jaise bikhre hue tukde mere paimanon ke
hath khali hain magar mulk-e-adam ka hai safar
hausle dekhiye un be-sar-o-samanon ke
sar jhukae hue baithe hain jo kabe mein 'qamar'
aise hote hain nikale hue but-khanon ke

kisi surat sahar nahin hoti

By

kisi surat sahar nahin hoti
raat idhar se udhar nahin hoti
khauf sayyaad se na barq ka dar
baat ye apne ghar nahin hoti
ek wo hain ki rose aate hain
ek hum hain khabar nahin hoti
ab main samjha hun kat kar shab-e-gham
zindagi mukhtasar nahin hoti
kitni paband-e-waza hai shab-e-gham
kabhi ghairon ke ghar nahin hoti
kitni sidhi hai rah-e-mulk-e-adam
hajat-e-rahbar nahin hoti
sun liya hoga tum ne haal-e-mariz
ab dawa kargar nahin hoti
arsh milta hai meri aahon se
lekin un ko khabar nahin hoti