hain ab to hile-bahane ke qil-o-qal ke din

By

hain ab to hile-bahane ke qil-o-qal ke din
bhula ke rakh diye tu ne meri majal ke din
ki dukh ne kucha-e-shab par kar liya shayad
tulua hone lage is liye malal ke din
har ek lafz pasheman pas-e-ghubar-e-sukut
jawab ki wo hon raaten ki phir sawal ke din
charagh-e-saut-o-sada aaj kuchh munawwar hai
visal-e-shab ke qarin hain mere ghazal ke din
ye intizar ki ghadiyan ye shab ka sannata
us ek shab mein bhare hain hazar sal ke din

zahr ke tir mere chaaron taraf khinchta hai

By

zahr ke tir mere chaaron taraf khinchta hai
kya ajab shakhs hai apnon pe hadaf khinchta hai
phir wahi dil mein udasi ke umadte baadal
phir wahi silsila-e-khak-o-khazaf khinchta hai
phir wahi qahr wahi fitna-e-dajjal ke din
phir wahi qissa-e-ashab-e-kahaf khinchta hai
kaun si soi hui pyas ka rishta jaga
aaj kyun mujh ko ye sahra-e-najaf khinchta hai
kaun se log the zulmat ke sahraon mein
ki jinhen martaba-e-izz-o-sharf khinchta hai

ye martaba koshish se mayassar nahin hota

By

ye martaba koshish se mayassar nahin hota
har fateh-e-ayyam sikandar nahin hota
har rose nai jang hai har rose nai jehd
kab apne muqabil koi lashkar nahin hota
be-soche hue kaam to ho jate hain sare
jo sochte hain hum wahi aksar nahin hota
har pal wahi wahshat hai wahi raqs-e-sitam-nak
kis lamha yahan fitna-e-mahshar nahin hota
aa lete hain jazbaat ko chupke se kisi pal
un hadson ka waqt muqarrar nahin hota
aawara hain is aankh se us aankh talak khwab
jaise ki musafir ka koi ghar nahin hota

ye khet sabza shajar rahguzar sannaTa

By

ye khet sabza shajar rahguzar sannata
uga hai dur talak be-shumar sannata
hamare khwab koi aur dekh leta hai
hamari aankh khala intizar sannata
wo kushta-e-rah-e-saut-o-sada hua shayad
wo ek lafz tha jis ka hisar sannata
hai lafz lafz mein bujhte makalmon ka dhuan
sukut-e-ishq hai ya be-qarar sannata
kabhi to chhed koi saz koi naghma-e-jaan
kabhi to apne badan se utar sannata

wo ek wajud zamin par bhi aasman ki tarah

By

wo ek wajud zamin par bhi aasman ki tarah
mere hudud se bahar hai la-makan ki tarah
wo ek khayal koi bahr-e-be-karan jaise
meri nazar kisi bosida baadban ki tarah
azal se sar pe khadi dopahar ka manzar hai
so ab ye dhup bhi lagti hai saeban ki tarah
main harf harf use hi sametna chahun
magar wo phailta jata hai dastan ki tarah
mere badan mein koi shai yugon yugon se 'qamar'
bikhar rahi hai kisi reg-e-raegan ki tarah