aap dil ja kar jo zaKHmi ho to mizhgan kya kare

aap dil ja kar jo zakhmi ho to mizhgan kya kare
koi rakh de panw khud khar-e-mughilan kya kare
raat-din hai sanat-e-haq kis tarah badlen sanam
ru-e-zeba kya kare zulf-e-pareshan kya kare
ruh ghabra ke chali dekha jo hum ko muztarib
mezban ho jab pareshan rah ke mehman kya kare
dam nahin tan se nikalta kat chuka bilkul gala
sakht-jaani ko hamari tegh-e-jaanan kya kare
tira-bakhti se hai shikwa muflisi se hai gila
raushni mumkin nahin sham-e-ghariban kya kare
zakhm-e-dil gahra bahut hai kis tarah tanka lage
yan rafu ki ja nahin tar-e-gareban kya kare
apni wahshat se hai shikwa dusre se kya gila
hum se jab baitha na jae ku-e-jaanan kya kare

agar dila gham-e-gesu-e-ya baDh jata

agar dila gham-e-gesu-e-ya badh jata
shab-e-firaq mein aur intishaar badh jata
jo shauq-e-jumbish-e-mizhgan-e-yar badh jata
tera maza khalish-e-nok-e-khar badh jata
jo meri chashm ke parde sharik ho jate
kamal-e-daman-e-abr-e-bahaar badh jata
watan mein hum na hue khak shukr ki ja hai
ghubar-e-khatir-e-ahl-e-dayar badh jata
dikhai kyun na mujhe aa ke garmi-e-raftar
bala se aap ki mera bukhar badh jata

agar gul ki koi pati jhaDi hai

agar gul ki koi pati jhadi hai
to sau sau bar bulbul gir padi hai
nazar kya jae su-e-shisha-o-jam
hamari aankh saqi se ladi hai
ye hai josh-e-bahaar un ke chaman mein
ki har ek shakh phulon ki chhadi hai
suni rifat sulaiman ki to bole
hamari ek anguthi gir padi hai
tumhaari zulf se kam hai shab-e-hijr
magar roz-e-qayamat se badi hai
ek aane ka hai ek jaane ka hangam
ye qissa zindagi ka do-ghadi hai
nahin hatti tumhaare chehre se zulf
ye shayad bosa lene par adi hai
hazaron dagh lakhon hasraten hain
hamare dil ki bhi basti badi hai
hua kya jild-e-khak apna tan-e-zar
jahan hum the wahan mitti padi hai
mare hain dar pe hum wo puchhte hain
ye kis ki lash raste mein padi hai
jo dekhi hai nigah-e-mast-e-saqi
to bijli ladkhada ke gir padi hai
jo apna mal hoga khair hoga
'rashid' ab to hamein dil ki padi hai