shab ka safar

By

aakhirash aa gai wo shab ai dil
subh se intizar jis ka hai
meri tanhai ki rafiq ye shab
kaun kahta hai ki tarik hai shab
mere har dard se paiwand bane
aarzuon ki ek rida aisi
jis ki zambil mein main ne apne
dil jigar zehn bichha rakkhe hon
apne mashuq ke is aanchal mein
kitne arman chhupa rakkhe hain
kitne ehsas saja rakkhe hain
mere andar ka karb uthae ye shab
kahkashan ban ke jagmagati hai
ruh burraq ban si jati hai
jis pe baitha main apni duniya ke
aasmanon ki sair karta hun
raat se subh ko utarta hun
subh hoti hai raat aane ko
raat ko intizar rahta hai
meri tanhai ki rafiq ye shab
meri jaanan amiq ye shab
reshmi aswadi atiq ye shab
kaun kahta hai ki tarik hai shab
shab tera intizar rahta hai

KHwab-farosh

By

phir usi shahr mein aae ho palat kar ki jahan
chand hote hain jo tum ne dikhae the khwab
chand din hote hain jab tum ne sajae the gulab
jin mein khushbu bhi thi aur rang bhi manind-e-shahab
tum gae khwab rahe aur zamane ke azab
dhundte rah gae lab kitne sawalon ke jawab
ab jo aae ho to itna sa karam kar jaana
ab ke bimar se khwabon ki mahak mat lana
ab jo dikhlana to kuchh khwab nae dikhlana
aise kuchh khwab zaminon ko jo shadab karen
aise kuchh khwab jo shahron ko bhi shadab karen
aise kuchh khwab jo taqdir khayalat ke hon
aise kuchh khwab jo miras hon insanon ki
tum jo aisa na karoge to wahi gham honge
rabt-e-baham ke na asbab faraham honge
mutmain khud se kahin tum na kahin hum honge

jogi

By

main ruh hun is virane ki
jo khak bagula phirti hai
ek chehra is afsane ka
be-kar jo tadpa karta hai
ek lasha un armanon ka
be-dam jo bikta rahta hai
main basti basti nagar nagar
betab tamannaen le kar
khali jholi gadla daman
har gali gali phailae hue
be-khwab si suni aankhon ko
kuchh khwab nae dikhlata hun
tute barbat se nikli hui
kuchh dhunen unhen sunwata hun
is aas mein dhundhta rahta hun
ki shayad inhin tanon se kahin
lai phute nae afsane ki
girdab ki tarah se ubal pade
suni dharti armanon ki

buDhapa

By

yun guman ho raha hai mere nadim
jaise ab gulsitan mein rang nahin
jaise ab dil mein kuchh umang nahin
aasman badliyon ki zad mein hai
zard-alud hain fazaen bhi
surkh suraj ki kapkapati kiran
chhu rahi hai ufuq ke sae ko
phailti ja rahi hai shab ki lakir
sehn-e-zindan ke chaar-payon par
dubti meri khwabida aankhen
dekhti jati hain purane khwab
guzre ayyam ke adhure khwab
zindagi se bhare sisakte khwab
dast-o-bazu hain kitne pazh-murda
nabz-e-hasti hai kitni aahista
ek dil hai ki dhadke jae hai
jaise girdab ta-safina koi

shab-e-daraaz tujhe kuchh KHabar gai ki nahin

By

shab-e-daraaz tujhe kuchh khabar gai ki nahin
sahar qarib se chhu kar guzar gai ki nahin
chaman mein jao zara aur phir batao hamein
gulon ke chehre se zardi utar gai ki nahin
tumhaare shahr mein kyun aaj hu ka aalam hai
saba idhar se guzar kar udhar gai ki nahin
pata karo mere mashuq ki gali ja kar
bahaar bhi wahin ja kar thahar gai ki nahin

kash paDte na in azabon mein

By

kash padte na in azabon mein
dhundte hain tumhein sarabon mein
kabhi kanton kabhi gulabon mein
kho gae hum ye kin azabon mein
nashsha-e-yar ka nasha mat puchh
aisi masti kahan sharabon mein
us ka jalwa dikhai deta hai
sare chehron pe sab kitabon mein
samne hon to aankh khulti nahin
jagte hain hum un ke khwabon mein