kal hi ki baat nahin hoti

By

dahliz par jo khwab tuta hai
wo kal ka to nahin tha
wo to na-jaane kitne salon se
naniyon dadiyon ne alhad aankhon mein jaga rakkha tha
ye jo diwar par lagi taswir achanak dhadam se niche gir gai hai
ye kal hi to nahin tangi gai thi
ye to us aaine mein salon se nazar aa rahi thi jo ladkiyan takiye ke niche
is ummid par rakh kar soti thin ki
is raat ke khwab mein un ke dulha ki shabih ubhregi
ye jo taswir gir kar tut gai hai ye sadiyon ki shabih ko bhi tod gai hai
ye jo kal dekhte hi dekhte aasman par ek baadal ka rang kala siyah pad gaya tha
ye baadal sirf kal hi to nahin aasman par aaya tha
ye collage ke aasman par nile rang mein na-jaane kitne salon se ruka hua tha
ye jo kal mohabbat aur e'timad ki tahrir dekhte hi dekhte kaghaz se ghaeb ho gai
wo sirf kal hi to nahin likhi gai thi
na-jaane kab se mohabbat ki kahaniyan likhne wale use safhat par utar rahe the
kal jo mere darwaze ke samne khadi sadak yakayak kahin aur mud gai
aur phir nazron se ojhal ho gai ye saneha sirf kal ka to nahin
us sadak ne to salon se rasta badalne aur ghaeb hone ki than rakhi thi
khwab taswir tahrir baadal aur sadak un ke tutne aur badalne ki baat
kal hi ki baat nahin hoti

apna saya

By

jismon ke kho jaane
aur ruon ke badalne ke karb ne mujhe tamam-umr
andesha-e-ziyaa mein hi mubtala rakha
kal ke din ne mujh mein base sab khauf mar diye
chehre se naqab utra to sachchai sina tane mere samne aa khadi hui
khud se bichhdi hui thi ab khud se aa mili hun
mera saya mujh mein nau phata ho kar jag gaya hai aur
wo mera hath thame baitha hai
ab wahi mor-pankh wahi jhil wahi murghabi ke bachche
akhrot khati gilahri aur rang bikherti titli
mera saya
yahi sab murda manazir ko mere andar hanut kar ke baith gaya hai
ab apne hi sae ki panah mein hun
jis ke na badalne ka dar na bichhadne ka wahm
ek sa bas mujh mein hi rahega
mera hi rahega
is liye
ab tanhai se dar nahin lagta
ab judai se dar nahin lagta
ab main apni panah mein hun

ab Dar nahin lagta

By

ek dar tha tanhai ka
ek dar tha judai ka
jo musalsal mere sath rahta tha
kal ka din jo guzar gaya
bahut bhaari lagta tha
lagta tha kisi aise din ka bojh utha na paungi
aadhe-adhure raste mein hi mar jaungi
magar kal ka din bhi aa hi gaya
aur ret ka wo gharaunda sath hi baha le gaya
jis mein rakhe the main ne
rang-ba-rang ke pyare patthar
titliyon ke par aur mor ke pankh
phulon ke sab rang
aur aasman ki dhanak
gilahri ka adh khaya akhrot
man ke paron tale baithe murghabi ke bachche
us gharaunde par utri dhup jis ne mujh se mera saya juda kar diya tha
kal jab wo sab be-rahm waqt ki maujon ke sath bah gaya
aur chaar-su qabr jaisa andhera phail gaya
to safed dhup jate jate ek ehsan kar gai
wo mujh ko mera saya lauta gai
aur main marte marte bach gai warna
main to aise kal mein mar hi jati
aawazon ke bichhadne se