ye sadma usko pagal kar gaya tha

ye sadma us ko pagal kar gaya tha
wo apne aaine se dar gaya tha
koi bhi sar nahin tha us ke qabil
abas us shahr mein patthar gaya tha
jahaalat ke hawale padhte padhte
kitabon se mera ji bhar gaya tha
pilata kaun us pyase ko pani
koi masjid koi mandar gaya tha
wo kis mitti ka tha nafrat ke ghar mein
wo odhe pyar ki chadar gaya tha
mera ehsas to tere karam se
mere marne se pahle mar gaya tha
na nikla phir wo sari umr ghar se
zara si der ko bahar gaya tha
tu phir luta hai kis ne qafile ko
udhar to sirf ek rahbar gaya tha
wahan phir pair kab rakkha kisi ne
jahan raste mein mera sar gaya tha

umr-bhar KHun se likkha hai jis afsane ko

umr-bhar khun se likkha hai jis afsane ko
kitna kam rang hai us shokh ke nazrane ko
khilti rahti hain tere pyar ki kaliyan har-su
bagh nilam na kar den mere virane ko
mai se raghbat to mujhe bhi hai magar bas itni
nachte dekh liya dur se paimane ko
aur marta kahin ja kar tere dar se lekin
hosh itna bhi kahan tha tere diwane ko
kya khabar thi ye tera dar ye tera kucha hai
main to bas baith gaya tha zara sustane ko
shama jalne ki ijazat nahin deti 'akhtar'
shauq bujhne nahin deta mere parwane ko

teri yaadon ko bula kar tere gesu ki tarah

teri yaadon ko bula kar tere gesu ki tarah
pahne rahte hain dariche meri khushbu ki tarah
hae jab hijr ki shab mein tere boson ki mithas
phail jati hai mere honton pe jadu ki tarah
tu mere bagh se tode hue ghunche ki misal
main tere dasht mein bhatke hue aahu ki tarah
aasman bantta rahta hai nasibe 'akhtar'
din ko moti ki tarah raat ko aansu ki tarah

sirf un ke kuche mein jaan bichha ke chalte hain

sirf un ke kuche mein jaan bichha ke chalte hain
warna chahne wale sar utha ke chalte hain
kya gunah hua un se kyun teri gali ke log
apne ghar ke andar bhi munh chhupa ke chalte hain
han khuda bhi ho shayad koi apni basti ka
hukm us jagah sare nakhuda ke chalte hain
zakhm bhi nahin lagte khun bhi nahin bahta
tir us ki mahfil mein kis bala ke chalte hain
sham ko unhen 'akhtar' gulistan mein dekhenge
jab wo apni zulfon mein dil saja ke chalte hain

phenke hue be-kar khilaune ki tarah hun

phenke hue be-kar khilaune ki tarah hun
main bagh ke ujde hue goshe ki tarah hun
tu dil mein utarti hui khushbu ki tarah hai
main jism se utre hue kapde ki tarah hun
kuchh aur bhi din mujh ko samajhne mein lagenge
main khwab mein dekhe hue raste ki tarah hun
saya sa ye kis chiz ka hai mere watan par
main kyun kisi sahme hue qisse ki tarah hun
main man hun satai hui had darja bahu ki
aur bete pe aae hue ghusse ki tarah hun
ho jaen kabhi ja ke wahin sindh kinare
baaten koi do chaar jo pahle ki tarah hun
ab to kisi mahkar ki yaadon ka safar hai
aur main kisi bhule hue qisse ki tarah hun
jis mein koi dar hai na daricha na makin hai
us ghar pe lagae hue pahre ki tarah hun
kya hogi talafi mere nuqsan ki 'akhtar'
main qaid mein guzre hue arse ki tarah hun

kyun jeb mein mulla meri taqdir liye hai

kyun jeb mein mulla meri taqdir liye hai
kyun rah ka har mod koi pir liye hai
karta hai shab-o-roz jo sarkar ki tarif
ye shakhs bhi shayad koi jagir liye hai
sar ek bhi main ne yahan uncha nahin dekha
pagal hai jo ab hath mein shamshir liye hai
har ped se aati hai mere dost ki khushbu
har phul mere shokh ki taswir liye hai
ek ajnabi milta hai bade pyar se 'akhtar'
kya wo bhi koi hasrat dil-gir liye hai