yahan daraKHt the saya tha kuchh dinon pahle

yahan darakht the saya tha kuchh dinon pahle
ajib khwab sa dekha tha kuchh dinon pahle
ye kya hua ki ab apna bhi eatibar nahin
hamein to sab ka bharosa tha kuchh dinon pahle
hamare khun rag-e-jaan ki lala-kari se
jo aaj bagh hai sahra tha kuchh dinon pahle
usi ufuq se naya aaftab ubhrega
jahan charagh jalaya tha kuchh dinon pahle
abhi qarib se guzra hai ajnabi ki tarah
wo ek shakhs jo apna tha kuchh dinon pahle
jinhen darida-dahan kah ke hont site ho
unhen sukhan ka saliqa tha kuchh dinon pahle

tazkira un ka hi jo rang badal jate hain

tazkira un ka hi jo rang badal jate hain
baat sayon ki nahin sae to dhal jate hain
aap zahmat na karen pursish-e-haal-e-dil ki
munh se naguftani jumle bhi nikal jate hain
itna khush-fahm na ho ai dil-e-pazh-murda ki ab
wo shagufe jo na khil paen kuchal jate hain
kuchh diye khun rag-e-jaan se hue hain raushan
kuchh diye tundi-e-sahba se bhi jal jate hain

jal kar un aankhon mein aansu jab kajal ban jate hain

jal kar un aankhon mein aansu jab kajal ban jate hain
dil se uth kar reg bagule dal baadal ban jate hain
koi sachchi baat zaban par jab bhi kabhi aa jati hai
wo sahra ho ya gulshan ho sab maqtal ban jate hain
jab bhi zehn mein jag uthti hai in honton ki shirini
kaise kaise talkh masail jaan ghazal ban jate hain
us se ziyaada kya hoga arbab-e-mohabbat ka izhaar
wo bekal ho jate hain to sab bekal ban jate hain
hum ne sadiyon ki diwaron mein jo rakhne dale the
un se guzarne wale lamhe taj-mahal ban jate hain

jahan sarab nahin thi wahan sarab mile

jahan sarab nahin thi wahan sarab mile
haqiqaton ko tatola gaya to khwab mile
har ek samt se aawaz-e-bazgasht aai
is aarzu mein pukara tha kuchh jawab mile
hamein bahaar ke aasar ki tawaqqoa thi
rukh chaman pe nishanat-e-inqalab mile
kahaniyon ki kitabon mein ab milen to milen
wo khush-nazar jinhen zarron mein aaftab mile