nazr-e-collage

By

ai sar-zamin-e-pak ke yaran-e-nek-nam
ba-sad khulus shair-e-awara ka hai nam
ai wadi-e-jamil mere dil ki dhadkanen
aadab kah rahi hain teri bargah mein
tu aaj bhi hai mere liye jannat-e-khayal
hain tujh mein dafn meri jawani ke chaar sal
kumlae hain yahan pe meri zindagi ke phul
in raston mein dafn hain meri khushi ke phul
teri nawazishon ko bhulaya na jaega
mazi ka naqsh dil se mitaya na jaega
teri nashat-khez faza-e-jawan ki khair
gul-ha-e-rang-o-bu ke hasin karwan ki khair
daur-e-khizan mein bhi teri kaliyan khili rahen
ta-hashr ye hasin fazaen basi rahen
hum ek khar the jo chaman se nikal gae
nang-e-watan the hadd-e-watan se nikal gae
gae hain is faza mein wafaon ke rag bhi
naghmat-e-atishin se bikheri hai aag bhi
sarkash bane hain git baghawat ke gae hain
barson nae nizam ke naqshe banae hain
naghma nashat-e-ruh ka gaya hai barha
giton mein aansuon ko chhupaya hai barha
masumiyon ke jurm mein badnam bhi hue
tere tufail morid-e-ilzam bhi hue
is sar zamin pe aaj hum ek bar hi sahi
duniya hamare nam se bezar hi sahi
lekin hum in fazaon ke pale hue to hain
giryan nahin to yan se nikale hue to hain

jawahar-lal nehru

By

jism ki maut koi maut nahin hoti hai
jism mit jaane se insan nahin mar jate
dhadkanen rukne se arman nahin mar jate
sans tham jaane se elan nahin mar jate
hont jam jaane se farman nahin mar jate
jism ki maut koi maut nahin hoti hai
wo jo har din se munkir tha har ek dharm se dur
phir bhi har din har ek dharm ka gham-khwar raha
sari qaumon ke gunahon ka kada bojh liye
umr-bhar surat-e-isa jo sar-e-dar raha
jis ne insanon ki taqsim ke sadme jhele
phir bhi insan ki ukhuwwat ka parastar raha
jis ki nazron mein tha ek aalami tahzib ka khwab
jis ka har sans nae ahd ka meamar raha
jis ne zardar-e-maishat ko gawara na kiya
jis ko aain-e-musawat pe israr raha
us ke farmanon ki elanon ki tazim karo
rakh taqsim ki arman bhi taqsim karo
maut aur zist ke sangam pe pareshan kyun ho
us ka bakhsha hua sah-rang-e-alam le ke chalo
jo tumhein jada-e-manzil ka pata deta hai
apni peshani par wo naqsh-e-qadam le ke chalo
daman-e-waqt pe ab khun ke chhinte na paden
ek markaz ki taraf dair-o-haram le ke chalo
hum mita dalenge sarmaya-o-mehnat ka tazad
ye aqida ye irada ye qasam le ke chalo
wo jo hamraaz raha hazir-o-mustaqbil ka
us ke khwabon ki khushi ruh ka gham le ke chalo
jis ki maut koi maut nahin hoti hai
jism mit jaane se insan nahin mar jate
dhadkanen rukne se arman nahin mar jate
sans tham jaane se elan nahin mar jate
hont jam jaane se farman nahin mar jate
jism ki maut koi maut nahin hoti hai

wirsa

By

ye watan teri meri nasl ki jagir nahin
sainkadon naslon ki mehnat ne sanwara hai ise
kitne zehnon ka lahu kitni nigahon ka araq
kitne chehron ki haya kitni jabinon ki shafaq
khak ki nazr hui tab ye nazare bikhre
pattharon se ye tarashe hue asnam-e-jawan
ye sadaon ke kham-o-pech ye rangon ki zaban
chimniyon se ye nikalta hua pur-pech dhuan
teri takhliq nahin hai meri takhliq nahin
hum agar zid bhi karen us pe to tasdiq nahin
ilm suli pe chadha tab kahin takhmina bana
zahr sadiyon ne piya tab kahin naushina bana
sainkadon panw kate tab kahin ek zina bana
tere qadmon ke tale ya mere qadmon ke tale
nau-e-insan ke shab-o-roz ki taqdir nahin
ye watan teri meri nasl ki jagir nahin
sainkadon naslon ki mehnat ne sanwara hai ise
tera gham kuchh bhi sahi mera alam kuchh bhi sahi
ahl-e-sarwat ki siyasat ka sitam kuchh bhi sahi
kal ki naslen bhi koi chiz hain hum kuchh bhi sahi
un ka wirsa hun khandar ye sitam ijad na kar
teri takhliq nahin tu ise barbaad na kar
jis se dahqan ko rozi nahin milne pati
main na dunga tujhe wo khet jalane ka sabaq
fasl baqi hai to taqsim badal sakti hai
fasl ki khak se kya mangega jamhur ka haq
pal salamat hai to tu par utar sakta hai
chahe tabligh baghawat ke liye hi utre
warna 'ghaalib' ki zaban mein mere hamdam mere dost
dam har mauj mein hai halqa-e-sad-kaam-e-nahang
soch le phir koi tamir girane jaana
teri tamir se hai jang ki takhrib se jang
ahal-e-mansab hain ghalat-kar to un ke mansab
teri taid se dhaale gae to mujrim hai
meri taid se dhaale gae main mujrim hun
patriyan rail ki sadkon ki basen phone ke tar
teri aur meri khataon ki saza kyun bugten
un pe kyun zulm ho jin ki koi taqsir nahin
ye watan teri meri nasl ki jagir nahin
sainkadon naslon ki mehnat ne sanwara hai ise
tera shikwa bhi baja meri shikayat bhi durust
rang-e-mahaul badalne ki zarurat bhi durust
kaun kahta hai ki haalat pe tanqid na kar
hukmaranon ke ghalat dawon ki tardid na kar
tujh ko izhaar-e-khayalat ka haq hasil hai
aur ye haq koi tarikh ki khairaat nahin
tere aur mere rafiqon ne lahu de de kar
zulm ki khak mein is haq ka shajar boya tha
salha-sal mein jo barg-o-samar laya hai
apna haq mang magar un ke taawun se na mang
jo tere haq ka tasawwur hi fana kar dalen
hath utha apne magar un ke jilau mein na utha
jo tere hath tere tan se juda kar dalen
khwab-e-azadi insan ki ye tabir nahin
ye watan teri meri nasl ki jagir nahin
sainkadon naslon ki mehnat ne sanwara hai use

umid

By

wo subh kabhi to aaegi
un kali sadiyon ke sar se jab raat ka aanchal dhalkega
jab dukh ke baadal pighlenge jab sukh sagar chhalkega
jab mera jhum ke nachega jab dharti naghme gaegi
wo subh kabhi to aaegi
jis subh ki khatir jag jag se hum sab marmar ke jite hain
jis subh ke amrit ki dhun mein hum zahr ke pyale pite hain
in bhuki pyasi ruhon par ek din to karam farmaegi
wo subh kabhi to aaegi
mana ki abhi tere mere armanon ki qimat kuchh bhi nahin
mitti ka bhi hai kuchh mol magar insanon ki qimat kuchh bhi nahin
insanon ki izzat jab jhute sikkon mein na toli jaegi
wo subh kabhi to aaegi
daulat ke liye jab aurat ki ismat ko na becha jaega
chahat ko na kuchla jaega ghairat ko na becha jaega
apne kale kartuton par jab ye duniya sharmaegi
wo subh kabhi to aaegi
bitenge kabhi to din aakhir ye bhuk ke aur bekari ke
tutenge kabhi to but aakhir daulat ki ijara-dari ke
jab ek anokhi duniya ki buniyaad uthae jaegi
wo subh kabhi to aaegi
majbur budhapa jab suni rahon ki dhul na phankega
masum ladakpan jab gandi galiyon mein bhik na mangega
haq mangne walon ko jis din suli na dikhai jaegi
wo subah kabhi to aaegi
faqon ki chitaon par jis din insan na jalae jaenge
sine ke dahakte dozakh mein arman na jalae jaenge
ye narak se bhi gandi duniya jab sowarg batai jaegi
wo subh kabhi to aaegi

tulu-e-ishtirakiyat

By

jashn bapa hai kutiyaon mein unche aiwan kanp rahe hain
mazduron ke bigde tewar dekh ke sultan kanp rahe hain
jage hain iflas ke mare uthe hain be-bas dukhiyare
sinon mein tufan ka talatum aankhon mein bijli ke sharare
chauk chauk par gali gali mein surkh pharere lahraate hain
mazlumon ke baghi lashkar sail-sifat umde aate hain
shahi darbaron ke dar se fauji pahre khatm hue hain
zati jagiron ke haq aur mohmal dawe khatm hue hain
shor macha hai bazaron mein tut gae dar zindanon ke
wapas mang rahi hai duniya ghasab-shuda haq insanon ke
ruswa-bazari khatunen haqq-e-nisani mang rahi hain
sadiyon ki khamosh zabanen sahr-e-nawai mang rahi hain
rondi kuchli aawazon ke shor se dharti gunj uthi hai
duniya ke ina-e-nagar mein haq ki pahli gunj uthi hai
jama hue hain chaurahon par aa ke bhuke aur gadagar
ek lapakti aandhi ban kar ek bhabakta shoala ho kar
kandhon par sangin kudalen honton par bebak tarane
dahqanon ke dil nikle hain apni bigdi aap banane
aaj purani tadbiron se aag ke shoale tham na sakenge
ubhre jazbe dab na sakenge ukhde parcham jam na sakenge
raj-mahal ke darbanon se ye sarkash tufan na rukega
chand kirae ke tinkon se sail-e-be-payan na rukega
kanp rahe hain zalim sultan tut gae dil jabbaron ke
bhag rahe hain zill-e-ilahi munh utre hain ghaddaron ke
ek naya suraj chamka hai ek anokhi zau-bari hai
khatm hui afrad ki shahi ab jamhur ki salari hai

tu hindu banega na musalman banega

By

tu hindu banega na musalman banega
insan ki aulad hai insan banega
achchha hai abhi tak tera kuchh nam nahin hai
tujh ko kisi mazhab se koi kaam nahin hai
jis ilm ne insanon ko taqsim kiya hai
is ilm ka tujh par koi ilzam nahin hai
tu badle hue waqt ki pahchan banega
insan ki aulad hai insan banega
malik ne har insan ko insan banaya
hum ne ise hindu ya musalman banaya
qudrat ne to bakhshi thi hamein ek hi dharti
hum ne kahin bhaarat kahin iran banaya
jo tod de har band wo tufan banega
insan ki aulad hai insan banega
nafrat jo sikhae wo dharam tera nahin hai
insan ko jo raunde wo qadam tera nahin hai
quran na ho jis mein wo mandir nahin tera
gita na ho jis mein wo haram tera nahin hai
tu amn ka aur sulh ka arman banega
insan ki aulad hai insan banega