may yaum-ul-hisab

By

mujhe be-rahm hasti ke ziyan-khane mein kyun bheja gaya
kyun halqa-e-zanjir mein rakh di gain be-tabiyan meri
har ek manzar meri nazron ka juya tha
farozan shakh-saron par hujum-e-rang-o-bu
udta hua bar-rawan
simab-pa maujen
saba ka raqs-e-be-parwa
shab-e-mahtab ka afsun
mah-o-anjum ke raqsan daere
ru-e-shafaq
taban ufuq
dariyaon ki raftar
shab ke jagte asrar
sahra ka munawwar sina-e-uryan
tilism-e-be-karan ke khwab-gun sae
meri raaton mein misl-e-barq lahrae
sitaron ki tajalli mein tha harf-e-kun ka afsana
bada faiyyaz tha fitrat ka kashana
kai sahra mere gam-e-tamanna ke shanasa the
wo harf-o-saut ki wadi
wo zauq-e-sher ka jada
wo irfan ke gurezan aastanon par jabin-sai
wo danish ki pazirai
wo mani ki ghaneri chhanw mein
zehn-e-rasa ka kashf wo
asrar ke parde ke pichhe
dil ki mahshar-khez aawazen
dil ki mahshar-khez aawazen
wo gham-ha-e-nihani se farozan zauq-e-binai
wo daman ka har ek khar-e-mughilan se ulajhna
tul-o-arz dasht-o-dariya par kar jaana
wo har zarre mein dharti ki sada sunna
wo har qatre ke aaine mein
nur-e-husn-e-mutlaq ka larazna
dil-e-nazar harf-o-hunar ka ek ho jaana
takallum justuju raftar-o-gham ka muddaa pana
koi isa-nafas deta tha nam-e-zist nazrana
larazta iltihab aagahi se tha meri nazron ka paimana
gurezan saaton ke karwan ko kis ne pakda hai
nazar mahw-e-maal-e-dosh-o-farda hai
kai diwar-o-saqaf-o-saiban ke munjamid chehre
kai unchi fasilen rah mein hail
kai be-faiz kawish-ha-e-tanhai
kai be-mehriyan paikar be-mafhum pur-mail
kai tiron ne meri khema-gah-e-shaq ko cheda
kai tarkash hue is jism par khali
hui jati hai razm-e-zindagani muzmahil ghayal
nishat-o-dard ki wo khosha-chini chhod di hum ne
anan-e-husn-e-imkan tod di hum ne
sukun sham hai
bujhne lage sare ayagh-e-garm-raftari
shikasta-tar hasti ki tarah larzan hain
gird-o-pesh ke shab-tab nazare
wo saat aan pahunchi hai
nigah-e-wapsin ke muntazir hain tutte tare
mujhe shayad himala ki falak-paimaiyan aawaz deti hain
main apni maut se
in barf-zaron ki darakhshanda mayyat mein milungi
tod dungi halqa-e-zanjir mahjuri

kab se mahw-e-safar ho

By

sajida kun yugon ki masafat samete hue
is bayaban mein yunhi bhatakti rahogi
in bagulon ke hamrah yun raqs karti rahogi
kitne sahraon mein tum ne phode hain panw ke chhaale
kitni bedar raaton se manga hai tum ne khiraj-e-tamanna
sajida kuchh kaho
hijr ki kin zamanon mein ashkon ki mala piroi
kin hisabon chukaya qarz-e-junun
kaun se marhalon se guzar kar bana ruh ka pairahan
kis tarah jaan se guzre hain tufan-e-gham
kis tarah nand aandhi ki yalghaar mein
tum ne apni rida ko sambhaala
kaise yakh-basta tanhaiyon mein
jashn-e-ruh-o-dil-o-jaan manaya
shola-e-arzu mein
kaise harf-o-nawa ko tapaya
jagti raat ki tirgi ko
kis tarah matla-e-nur-e-yazdan banaya
kitne sajdon se apni jabin ko sajaya
sajida
dard ke raston par
kab se mahw-e-safar ho
tum ne in rahguzaron ki banjar zamin mein
kitne raftar-o-guftar ke gul khilae
is aqubat-kada ki siyahi mein
kitne charagh-e-tamanna jalae
sajida
is tag-o-dau se tum ne
kya kabhi chehra-e-zindagi ko sanwara
kya kisi dil mein koi sitara utara
kya zamane ki raftar badli
kya kisi tapte sahra ke zarron ko kundan banaya
kitne zakhmon pe insan ke marham lagaya
zulm ki dastan ko kabhi harf-e-shirin banaya
sajida
sham hai zindagi ki
thak ke so jaun sab haw bhul jao
kadi dhup ke kos-dar-kos
agle zamanon ke naqsh-e-qadam hain
rang-o-mausam badalne laga hai
tum masiha nahin
thak ke so jao
raqs-e-junun bhul jao

daur-e-uftadgi

By

naghmagi git harf-o-nawa
nala-e-shauq saut-o-sada
ek bahri siyasat ke darbar mein
sar-nigun pa-ba-zanjir lae gae
sara simab naqd-o-nazar
sab tilismat-e-harf-o-hunar
parda-e-sehr-o-asrar se tut kar
maqtal-e-arzu ban gae
wo tarab-zar dil-e-qasr-e-gham
raat-bhar jagti aagahi yani
aqlim-jaan
mashinon ke khandaraat mein kho gae
wo jo aahang-e-alam tha
khwabon ka maskan tha aur harf-o-mani ki tathir tha
apni bedariyon ki saza katne ke liye
sang-o-ahan mein dhaala gaya
sajda-e-haq
tamanna ke aafaq tak dard ke qafile
kaba-e-nur tak aabla-pai ke silsile
zar-e-maghrib ki mizan mein tul gae
hum ki is dasht mein aabla-pa the sadiyon se
is rah ke sang-e-mil
apne qadmon ke hamraaz the
hum bhi is daur-e-uftadgi mein
bas
tamasha-e-ahl-e-karam dekhte rah gae

wo pal ye ghaDi

By

salman ke nam
wo pal
jab tumhein kokh se jan ke
ummid-o-imkan ka tara samajh kar
main ne aaghosh mein bhar liya tha
wo pal
surkh kaliyon ko jab
apne sine ki dhaara se sincha tha
aur apni hi tishnagi ka mudawa kiya tha
ek nanhe se chehre ke
nazuk khadd-o-khal mein dub kar
jab meri ruh parwan chadhne lagi thi
wo pal
jab meri shab guzari ki
mehnat-kashi mein
tumhaari numu ki guhar-bar aasudgi thi
wo pal
rahat-e-maujud-o-imkan
jab meri god mein so gai thi
wo pal
jab meri aatma
aur parmatma
ek madhur rup mein dhal gae the
mere aangan mein
masum si raushni thi
wo pal
waqt ki rahguzar mein
bahut dur pichhe kahin rah gaya hai
ghubar-e-safar ke dhundlakon mein
nazron se ojhal hua hai
aur ab
jab ki tum aae ho
apne hi ghar mein mehman ban ke
tumhein dur jaana hai
masruf ho
waqt thoda hai
aage meri zindagi ki dagar par
saat-e-wapsin muntazir hai
is ghadi
garche meri ghadi apni raftar se chal rahi hai
magar
meri aankhon ki sukhi nami
purane kiwadon ki chaukhat mein
na jaane kyun
jazb hone lagi hai
aur
is ghar ke diwar-o-dar apni apni jagah chup khade hain

kaliyan nila aasman zanjiren

By

aurat ke nam
mere ehsas ki wadi mein kaliyan muskuraati hain
magar main chun nahin sakti
main lamhon mein safar karti hun
tabinda ufuq ke us kinare tak
jahan aakash dharti ke labon ko chumta hai
sans leta hai
mere hathon ki rekhaon mein
jaane kaisi zanjiren padi
roz-e-awwal se
main ye zanjir-e-ahan tod kar
roz-e-abad tak ja nahin sakti
main kaliyan chun nahin sakti
mere jazbon ke nakhlistan mein sabza sar uthata hai
hawa dhime suron mein gungunati hai
fazaen raqs karti hain
khuda aawaz deta hai
main sar nihuda ke sunti hun
dayar-e-ruh mein ek an-suna naghma machalta hai
main is naghme ko lab tak la nahin sakti
mere tapte badan par
sabz shakhon ki phuwaren sukh jati hain
meri aankhon ki jhilon mein
munawwar lajawrdi aasman ka aks hota hai
ufuq ke par ek khidki si khulti hai
sawad-e-waqt ki sari tanaben tut jati hain
magar yakh-basta diwaren
mujhe har samt se yun gher leti hain
main parwaz-e-tamanna kar nahin sakti
meri aankhon ko nila aasman hasrat se takta hai
kai umren guzar aai
kai duniyaen chhan aai
kai sahraon mein naqsh-e-qadam chhode
kai dariya lahu ke par kar aai
kai aatish-kadon mein jazb-e-dil kundan bana aai
magar ab bhi meri zanjir-e-ahan khadkhadati hai
mujhe jab jab bhi nila aasman hasrat se takta hai
main apni aatish-e-dil se jala deti hun
is zanjir ki kadiyan
sitaron tak pahunchti hun
madar-e-nur mein mahtab ki ham-raqs hoti hun

wafa-o-mehr-o-altaf-o-karam the ham-inan kya kya

By

wafa-o-mehr-o-altaf-o-karam the ham-inan kya kya
hue hain apne hi dil se magar hum bad-guman kya kya
par-e-parwaz nila aasman manzil sitaron ki
kate shahpar to yaad aane lagin jaulaniyan kya kya
ye apna dil jo ab aaseb-e-khamoshi ka maskan hai
kabhi guzre the is suni dagar se karwan kya kya
sukut-e-nim-shab ki aahaten aur raat ka jadu
ye manzar sath le aaya teri dildariyan kya kya
jahan ahl-e-nazar ahl-e-hunar ki hukmarani thi
wahan minqar-e-zer-e-par hain baithe nukta-dan kya kya
ab apne ghar ka bhi ahwal lab par la nahin sakte
kiya karte the hum ahwal-e-alam ka bayan kya kya
ajab tira-shabi se ab rah-o-rasm-e-junun thahri
hue nisyan ke parde mein mah-o-anjum nihan kya kya