aurat

By

tabish-e-khurshid nur-e-mah pani ki jhalak
khanda-e-qulqul sada koyal ki ghunchon ki chatak
larzish-e-simab bijli ki tadap shakhon ka loch
aql ki tezi tabiat ki upach shaer ka soch
iztirab-e-mauj kanton ki khalish nagan ke bal
tir ki surat kaman ka ijz shamshiron ke phal
aab moti ki chamak kundan ki hire ki damak
ashrafi ka rup taksali mahasil ki khanak
daman-e-kohsar ke manzar nawa-e-abshaar
shor-e-dariya karwaten lahron ki sahil ka qarar
zamzame ka itr kaif-e-naghma lai ki pukhtagi
shorish-e-mai, laghzish-e-mai-nosh, josh-e-be-khudi
aahu-e-ram-khurda ki wahshat kharare teziyan
gae ki sanjidgi jugnu ki aatish-reziyan
wadi-e-kashmir ki nuzhat gulon ka rang-o-bu
sarw ka qad kabk ki raftar qamri ka gulu
zulmat-e-sham-e-awadh subh-e-banaras ka nikhaar
aagre ke taj ki azmat himala ka waqar
somnati rifaten bhaarat ki tahzib-e-qadim
patli-putra ki shohrat magdh ki shan-e-azim
dil-paziri-e-azan dildari-e-naqus-e-dair
sehan-e-masjid ka taqaddus partaw-e-fanus-e-dair
harbhajan ka faiz husn-e-e'tiqad-e-barhaman
kumbh ke mele ki zinat waqat-e-gang-o-jaman
barbat o chang o sarod o arghanun ke zer-o-bam
dil-kashi pardon ki aawazon ke jadu tal sam
talkhi-e-anjam jab sab koshishen nakaam hon
khushnuma sebon ki halki turshiyan jab kham hon
dekh kar ye iqtibas-e-kar-gah-e-ins-o-jaan
kar-pardazan-e-qudarat mein huin sargoshiyan
ek bola imtizaj un ka qayamat saz hai
dusra kahne laga khamosh koi raaz hai
ye anasir ek muddat tak rahe garm-e-amal
aakhiri tahrik-e-ismat se hue aapas mein hal
subh-dam jab gosha gosha matla-e-anwar tha
zarra zarra aalam-e-nairang ka sarshaar tha
is murkkab ko usuli junbishen hone lagin
ye hayula irtiqai manzilen tai kar gaya
shah-par-e-parwaz iffat se bulandi par gaya
e'tidal-e-unsuri par pa liya jab iqtidar
ain-fitrat ke mutabiq shakl ki ek ikhtiyar
aai aaza mein gudazi aur garmi jism mein
aai rukhsaron pe surkhi aur narmi jism mein
paya-e-takmil ko pahuncha junhi ye shahkar
dast-e-qudrat ne tatoli nabz us ki bar bar
bistar-e-nikhat pe ye putli jo mahw-e-khwab thi
mast angdai ke hathon jag uthi sharma gai
dekh kar shair ne us ko nukta-e-hikmat kaha
aur be-soche zamane ne use aurat kaha

kabhi talash na zae na raegan hogi

By

kabhi talash na zae na raegan hogi
agar hui bhi to az-rah-e-imtihan hogi
agar mumaniyat-e-sair-e-gulistan hogi
to phir bahaar hamein ru-kash-e-khizan hogi
usul ye to nahin hai ki na-murad rahen
faza kabhi na kabhi hum pe mehrban hogi
jahan-e-dard mein insaniyat ke nate se
koi bayan kare meri dastan hogi
mai-e-nashat-o-tarab jis ka hum se wada tha
jabhi hui na faraham to ab kahan hogi
bayan-e-gham to bahut sahl hai pa lazzat-e-gham
siwa-e-ijz-e-bayan kis tarah bayan hogi
agar ghalat hai jo kuchh us ne mujh se aa ke kaha
to ye jasarat-e-tahrif-e-raazdan hogi
pata chala ki basarat-fareb hain jalwe
main is khayal mein tha aql pasban hogi
wahan wahan gham-e-haalat raushni denge
meri ghazal ki rasai jahan jahan hogi
piyo piyo ki subuhi se fasla na rahe
numud-e-subh ki taqrib mein azan hogi
nashemanon ki mukhalif na thi bahaar-e-chaman
magar shararat-e-ima-e-baghban hogi
to kya kasafat-e-uryani-e-ghazal ai 'shad'
adab ki khak udane se kuchh ayan hogi

shofer

By

khat khat kaun? sabiha! kaise? yunhi, koi kaam nahin
pichhli raat bhyanak garage kya kuchh ho anjam nahin
mera zimma main bhugtungi tum par kuchh ilzam nahin
hum hain us akhlaq ke pairaw, hum hain us tahzib ke log
jis mein iffat ek mafruza ismat jis mein 'zehni rog
jazbon par pahre bithlana kya sauda-e-kham nahin?
do bachchon ke bap to kya hai? dil ka ho insan jawan
tum bhi aise ban jao na jaise manjhle bhai jaan
sali aur salaj par lattu, biwi se hammam nahin
un se wo tahzib se unchi, chhote bhai se waqti chah
shauhar aae na aae lekin dewar ki takti hain rah
khwahish ki takmil bhi jari, shadi bhi nakaam nahin
naukar aur namak aur mazhab in tawilon se baz aao
mardon ki aisi neki par aa jata hai mujh ko taw
aurat ke honton par thappa ab maqbul-e-am nahin
hafta bhar mein ek din aisi laghzish koi aib nahin
zahir hai papa mammy ko hasil ilm-e-ghaib nahin
kali raaton ki baaton se waqif subh-o-sham nahin
jati hun, ghabraate kyun ho? kya andhiyari ghor nahin?
do dil raazi ke bare mein qazi ka kuchh zor nahin
lo ye das ka note tumhaari ujrat hai inam nahin