ab band jo is abr-e-guhar-bar ko lag jae

ab band jo is abr-e-guhar-bar ko lag jae
kuchh dhup hamare dar-o-diwar ko lag jae
palkon pe sajae raho ummid ke jugnu
kya jaaniye kis ki dua bimar ko lag jae
suli pe bhi is baat ki koshish hai hamari
isar hamara tere mear ko lag jae
haq-goi se meri hi pareshan hai duniya
kya ho ye waba aur jo do-chaar ko lag jae
thodi si rahe jeb-e-kharidar kushada
thoda sa gahan raunaq-e-bazar ko lag jae

agar hamare hi dil mein Thikana chahiye tha

agar hamare hi dil mein thikana chahiye tha
to phir tujhe zara pahle batana chahiye tha
chalo hami sahi sari buraiyon ka sabab
magar tujhe bhi zara sa nibhana chahiye tha
agar nasib mein tarikiyan hi likkhi thin
to phir charagh hawa mein jalana chahiye tha
mohabbaton ko chhupate ho buz-dilon ki tarah
ye ishtihaar gali mein lagana chahiye tha
jahan usul khata mein shumar hote hon
wahan waqar nahin sar bachana chahiye tha
laga ke baith gae dil ko rog chahat ka
ye umr wo thi ki khana kamana chahiye tha

alfaz narm ho gae lahje badal gae

alfaz narm ho gae lahje badal gae
lagta hai zalimon ke irade badal gae
ye faeda zarur hua ehtijaj se
jo dho rahe the hum ko wo kandhe badal gae
ab khushbuon ke nam pate dhundte phiro
mahfil mein ladkiyon ke dupatte badal gae
ye sarkashi kahan hai hamare khamir mein
lagta hai aspatal mein bachche badal gae
kuchh log hain jo jhel rahe hain musibaten
kuchh log hain jo waqt se pahle badal gae
mujh ko meri pasand ka same to mil gaya
lekin ghazal ke sare hawale badal gae