naya lahja ghazal ka misra-e-sani mein rakkha hai

By

naya lahja ghazal ka misra-e-sani mein rakkha hai
hua ko mutthiyon mein aag ko pani mein rakkha hai
na jaane kya samajh kar chakh liya tha dana-e-gandum
abhi ek bhul ne ab tak pashemani mein rakkha hai
watan se dur hun mein rizq ki khatir mere maula
magar basti ko teri hi nigahbani mein rakkha hai
safar mein bhi daramai anasir kaam aae hain
zaban ki chashni se sab ko hairani mein rakkha hai
ghazal kahne ka mausam 'qasmi' ab ho gaya rukhsat
sukun-e-qalb to us ki sana-khwani mein rakkha hai
mohazzab shahr ke lambe safar se lut aaya hun
saliqa zindagi ka ghar ki virani mein rakkha hai

tilism-e-safar

By

ek dahshat-zada
nim tarik jangal mein
aql-o-khirad ki zarurat nahin
shairi aur fiction ki
parchhaiyon ka main pichha karun
aur sapne bunun
aisi aadat nahin
nim tarik jangal ke
lambe safar pe jo nikle ho tum
to sun lo
nim tarik jangal mein chaaron taraf
abul-haul se wasta bhi padega tumhaara
kai shakl mein
warghalaengi tum ko chudelen
azdahon ke ilaqon se
guzroge tum
jism nila bhi hoga tumhaara
magar aankh ki putliyon mein
zindagi ka sawera munawwar rahega
ye alag baat tum
raqs-e-iblis ke daere mein rahoge
nim tarik jangal ke
sare bhayanak darindon se tanha
nihatte ladoge
tum na hargiz daroge
istifada karoge mere tajrabon se
to paoge manzil
samundar ki maujen
ulajhti hain barson bhanwar se
to pati hain manzil
nim tarik jangal
raqs-e-iblis
kali chudelen
khauf-za jis qadar ho
tilism-e-safar
us ko manzil ki mearaj samjho

sarabon ka safar

By

dasht-e-imkan mein jari hai
sarabon ka safar
ek sahra-e-junun
hadd-e-nazar hai hail
shakh-e-zaitun pe
aawaz ka panchhi ghayal
daur-e-pazeb ki chham chham hai
chamakti shai hai
rah-guzar koi nahin
dhund ke manzar ke siwa
ek teri yaadon ke siwa
har taraf ret ke utthe hain bagule
hatim
naqsh-e-pa koi nahin
khun ke qatron ke so
ek sadi bit gai
ek zamana guzra
ab yaqin kaise ho
hont tishna hain mere
khushk gila hai ab bhi
har taraf karb-o-bala hai ab bhi
dasht-e-imkan mein jari hai
sarabon ka safar

naya aadam

By

barson ki riyazat ke baad
zindagi ke tamam numayan usulon ke
faulad bante hue se daeron ko
tod kar
thik dil ke bichon-bich
ek inch chhed karne ki kaamyab training
hum ne le li hai
aur ab to
jis thaali mein khate hain
us mein chhed karne ka gur bhi hamein aa gaya hai
mana ki darindon ke bhi
shikar karne ke apne usul hote hain
thande aur garm gosht ki
unhen bhi tamiz hoti hai
ek hum hain
ki kis darja kamtar ho gae hain
phir bhi hamari afzaliyat
har jagah barqarar hai
ki hum ashraf-e-makhluq kahlate hain
lekin aaj
hamein ye e'tiraf karna hi padega ki
concrete ke bane is jangal mein
haiwan-e-natiq se kahin behtar
ye jangali suar hote hain

manzar yun tha

By

sham rukhsat ho chuki thi
ehsas ke talwon ko sahla kar
kitna sukun mila tha
tab nange panw
ghas par chalne ko bada dil chaha
ki achanak
raat aai
siyah kafan mein apna munh chhupae
aur
be-tartib shab-o-roz ke darmiyan
tangi hui algani par
majbur zindagi
apne kartab dikhlane lagi
aur raat
jis tarah
aasman par aawara baadalon ke tukde
chandni se athkheliyan karte hue
sharminda ho jate hain
raat usi tarah
mere jism ke nasheb-o-faraaz se guzarti hui
sharminda ho gai
sham rukhsat ho chuki thi