ek inch muskurahaT

kabhi kabhi ji chahta hai ki jiyun
bahut dinon tak
yahan tak ki
jine ka saliqa kho baithun
yahan tak ki
daudti bhagti zindagi ke tempo par
uthne wale meter ki parwah karna
fuzul sa lagne lage
jis tarah
fuzul sa lagne lagta hai
baisakhi ka sahaara le kar jina
phir bhi
jiye jata hun
ki kabhi kabhi jina padta hai yahan
mahz ek inch muskurahat ki khatir

faza-e-nam mein sadaon ka shor ho jae

faza-e-nam mein sadaon ka shor ho jae
wo muskura de zara sa to bhor ho jae
kabhi jo utrun main raqs-e-sukhan ke sahra mein
to apna haal bhi manind-e-mor ho jae
wo mai-kade se bhi nikle to pak-baz rahe
main us ki aankhon se pi lun to shor ho jae
nazar mein phul ho kaghaz pe ek sahra ho
to yun ghazal ka koi or-chhor ho jae
jo feal-e-asl ko main nazm karne baithun to
badan se lahr uthe por por ho jae
har ek raat wahi dish ho zaiqa bhi wahi
to phir mizaj-e-tarah-dar bor ho jae
ye shamiyana sukhan ka qarar-e-jaan thahra
yahan qayam kare jo pator ho jae
muraqiba mein koi aage chham se itrae
to phir faqir ke dil mein bhi chor ho jae
magar ye dil ki kisi aur ka nahin rakhta
dimagh kahta hai tu meri aur ho jae
wo ek badan ki jo sar-chashma-e-tasawwur ho
to pa-barahna safar mein bhi zor ho jae
jo sun le 'qasmi' teri ghazal to patthar bhi
majal hai ki wo itna kathor ho jae

ham-martaba na samjho rutba mera to jaano

ham-martaba na samjho rutba mera to jaano
shan-e-zaman raho tum mujh ko gada to jaano
yun to nikal dega sandal-badan ka kas-bal
bose ki kar de khwahish puri mua to jaano
ab se bhi sikh lo tum panw zamin pe dharna
kaghaz qalam uthaya tum par likha to jaano
shishe pe pa-barahna chalna nahin hai aasan
kirchen chubhen to jaano talwa chhila to jaano
mue ne munh ki khai phir bhi ye zor zori
ye rekhti hai bhai tum rekhta to jaano
ghazi-miyan hain chhote lekin badi si dum hai
ye dum phansi to jaano kuchh bhi hua to jaano
kahte hain 'qasmi' bhi bachpan ka hai chatora
hatthe chadhegi jab bhi wo dilruba to jaano

izhaar-e-tashakkur

hunar-mand hathon ki mitti se
main ne banaya
jo bahte hue paniyon pe makan
to sach ye
zamane ko kadwa laga
main ki mazdur tha
ek majbur tha
koi nayab gauhar na tha
main ki aazar na tha
ye to achchha hua
ai khuda
tu ne rakkhin salamat meri ungliyan

manzar yun tha

sham rukhsat ho chuki thi
ehsas ke talwon ko sahla kar
kitna sukun mila tha
tab nange panw
ghas par chalne ko bada dil chaha
ki achanak
raat aai
siyah kafan mein apna munh chhupae
aur
be-tartib shab-o-roz ke darmiyan
tangi hui algani par
majbur zindagi
apne kartab dikhlane lagi
aur raat
jis tarah
aasman par aawara baadalon ke tukde
chandni se athkheliyan karte hue
sharminda ho jate hain
raat usi tarah
mere jism ke nasheb-o-faraaz se guzarti hui
sharminda ho gai
sham rukhsat ho chuki thi