mili jo dil ko KHushi to KHushi se ghabrae

mili jo dil ko khushi to khushi se ghabrae
hum ajnabi ki tarah zindagi se ghabrae
wo aur kuchh hai magar kaenat-e-hosh nahin
ek aadmi hi agar aadmi se ghabrae
kabhi kabhi to teri dosti mein hum ai dost
khud apne aalam-e-awargi se ghabrae
jala liye hain usi waqt aansuon ke charagh
shab-e-firaq mein jab tirgi se ghabrae
wahi to bazm se saqi ki uth gae mahrum
jo mai-kade mein kabhi tishnagi se ghabrae
fareb-e-gesu-e-pur-kham ho ya ho sham-e-hayat
wo shams kya ki kisi tirgi se ghabrae

mere etimad ko gham mila meri jab kisi pe nazar gai

mere e'timad ko gham mila meri jab kisi pe nazar gai
isi justuju isi karb mein meri sari umr guzar gai
kabhi ban ke ishq ki raaz-dan kabhi ho ke aah ki dastan
kai tarah tere huzur tak mere haal-e-dil ki khabar gai
mujhe mere haal pe chhod do mere dosto ye karam karo
meri umr-e-rafta ko do sada mujhe dard de ke kidhar gai
kabhi mai-kashon se khulus tha teri chashm-e-shisha-nawaz ko
magar ab ye dur hai saqiya ki nazar se qadr-e-bashar gai
mujhe zabt-e-gham ka na de sabaq zara apne haal pe kar nazar
meri uljhanon ke khayal se teri zulf bhi to bikhar gai
ye to waqt waqt ki baat hai koi ro diya koi hans diya
meri wardat-e-dil-o-nazar meri zindagi pe guzar gai
kise dhundte ho nagar nagar kise shahr shahr ho puchhte
tumhein shams' jis ki talash hai wo nigah-e-aina gir gai

bahaar-e-zist ki mahrumiyan are tauba

bahaar-e-zist ki mahrumiyan are tauba
dil-e-shagufta ki nakaamiyan are tauba
visal-e-yar ki hasrat are maaz-allah
firaq-o-shauq ki betabiyan are tauba
payam-e-dawat-e-mai nim-baz aankhon se
nigah-e-naz ki ranginiyan are tauba
khuda ne ishq ko majburiyon ka gham de kar
likhin nasib mein barbaadiyan are tauba
hamari aankh se aansu bhi shams' bah na sake
dil-e-gharib ki majburiyan are tauba

na koi apna gham hai aur na ab koi KHushi apni

na koi apna gham hai aur na ab koi khushi apni
tumhin kah do ki hum kaise guzaren zindagi apni
fareb-e-ham-safar hai aur rah-e-gham ka sannata
munasib hai ki khud ho ai junun ab rahbari apni
ujala mahfilon mein kar ke bhi aansu hi hath aae
na ras aai kabhi khud shama ko bhi raushni apni
guzarish hai ki ai mabud mujh ko zabt-e-gham de de
na kar de fash raaz-e-arzu ko bekasi apni
tadap jaega har dil shams' ka jab nam aaega
numayan yun bhi hogi dastan-e-gham kabhi apni

manzil-e-ishq ke rahbar kho gae

manzil-e-ishq ke rahbar kho gae
mere hamdam mere ham-safar kho gae
inqilab-e-zamana ne karwat jo li
zikr ek do ka kya ghar ke ghar kho gae
ho gai khatm rasm-e-mulaqat bhi
wo nazare wo sham-o-sahar kho gae
hum ne har gam par sath chaha magar
qafile har nae mod par kho gae
main jo daman mein laya tha aansu tere
dagh hain un ke lal-o-gohar kho gae
baat ye raaz ki hai ki sab rah-rau
rafta rafta har ek mod par kho gae
jab mukammal hui shams ki dastan
maslahat hai ki ahl-e-nazar kho gae

kisi ke wada-e-farda mein gum hai intizar ab bhi

kisi ke wada-e-farda mein gum hai intizar ab bhi
khuda jaane hai kyun ek be-wafa par eatibar ab bhi
kabhi ki thi tamanna lala-o-gul ki nigahon ne
rulati hai lahu ke rang mein fasl-e-bahaar ab bhi
tere qaul-o-amal mein farq milta hai mujhe zahid
zaban par lafz-e-tauba hai nigah mein hai khumar ab bhi
khizan ke baad is ummid par gulshan nahin chhoda
ye mumkin hai ki chal jae hawa-e-khush-gawar ab bhi
hamare dil ko jis ne shams' virani inayat ki
usi ko yaad karti hai nigah-e-be-qarar ab bhi