kisi ke lab pe bhole-pan se mera nam hai shayad

kisi ke lab pe bhole-pan se mera nam hai shayad
meri bechaargi se phir kisi ko kaam hai shayad
ye halchal si machi hai aaj jo sare zamane mein
suna hai kuchh hamare waste paigham hai shayad
tumhein bhi ras aae ya na aae aaj ka aalam
tumhaara bhi hamari hi tarah anjam hai shayad
zamane ko nahin bhaya mera khamosh sa rahna
khamoshi bhi meri ab morid-e-ilzam hai shayad
na kali raat katti hai na raushan din guzarta hai
kisi se dil lagane ka yahi anjam hai shayad
asar karta agar nala to patthar mom ho jata
abhi jazb-e-mohabbat hi hamara kham hai shayad
faqat ruswaiyan likkhi hain 'shadan' ke muqaddar mein
rah-e-ulfat mein chalne ka yahi inam hai shayad

kahani meri barbaadi ki jis ne bhi suni hogi

kahani meri barbaadi ki jis ne bhi suni hogi
nazar mein us ke ek taswir-e-hairat khinch gai hogi
sata lo jis qadar chaho adaon se jafaon se
qasam khata hun gar hogi tumhin se dosti hogi
wafa ko bhi meri hamdam jafa hi jo samajhte hain
mujhe malum hai ek din unhen sharmindagi hogi
are nadan tujh ko kash ye malum ho jata
ki teri dushmani hi meri wajh-e-dosti hogi
bahaaron mein junun ne de diya mujh ko yaqin itna
meri dasht-e-junun mein bhi tumhaari rahbari hogi
shikan bistar ke kahte hain mariz-e-hijr ko hamdam
tadapne ki thakan se nind aakhir aa gai hogi
are 'shadan' mohabbat ke nirale taur hote hain
jise tum husn kahte ho wo wajh-e-be-khudi hogi

har ek baat pe kyun pech-o-tab hota hai

har ek baat pe kyun pech-o-tab hota hai
azizo jurm-e-mohabbat azab hota hai
faraaz-e-baam pe dekha hai jab kabhi un ko
nazar mein beach rukh-e-mahtab hota hai
faqat ye ishq-o-mohabbat ki hum pe aafat hai
ki jab bhi hota hai hum par itab hota hai
jahan pe zulm-o-sitam had se apni badhte hain
yaqin mano wahin inqalab hota hai
na anjuman mein thikana na apne ghar mein kahin
kharab bazm bhi khana-kharab hota hai
sawal-e-ajr-e-mohabbat pe wo bigad baitha
itab karta hai jab la-jawab hota hai
sambhal ke baith zara dil ko tham ai 'shadan'
kisi ka husn abhi be-naqab hota hai

dil ko nasib soz-e-gham-e-gulsitan kahan

dil ko nasib soz-e-gham-e-gulsitan kahan
hota to aaj hota ye dard-e-nihan kahan
zauq-e-bahaar hi hai na khauf-e-khizan mujhe
gum-sum hai apne haal mein tab-e-rawan kahan
jis se gulon ke zabt ka daman ho tar tar
hai andalib tera wo zauq-e-fughan kahan
ho jae ab na khatm fasana firaq ka
hain nur-e-subh raat ki nairangiyan kahan
le jaegi saba mera paigham tu magar
hoga subuk hawa se mizaj-e-garan kahan
le aae tod tod ke tare falak se hum
lekin nasib quwwat-e-husn-e-bayan kahan
'shadan' na dhundh arsa-e-ghurbat mein aasare
is mein chaman ki arzish-e-arz-o-saman kahan