zombie

By

main ek
zombie ke jaisa hun
ba-zahir
to main
zinda hun
magar
andar se murda hun
koi ehsas
insani nahin
ab
meri mitti mein
na hansta hun
na rota hun
na koi
zakhm dukhta hai
na mujh ko
dard hota hai
meri sansen to chalti hain
magar
un ko
nahin mahsus kar sakta
mere sine mein
dil to hai
magar dhadkan nadarat hai
main ek
zombie ke
jaisa hun
meri jaanan
meri haalat tumhein
achchhi tarah malum hogi na
ye wirus
jism mein mere
tumhin ne hi to dala hai

ye dukh kam kyun nahin hota

By

ye dukh kam kyun nahin hota
meri jaanan
hamein bichhde to
kitne
din
mahine
sal
guzre hain
magar ye chot
gahri hai
magar ye zakhm
taze hain
ye dukh kam kyun nahin hota
meri jaanan
agar main sath
do panchhi bhi baithe dekhta hun to
mere mazi ka har manzar
meri aankhon ke doron mein
ubharta hai
tadapta hai
meri aankhon ki putli dub jati hai
ye dukh kam kyun nahin hota
meri jaanan
wo sare log
jin ki wajh se
hum log bichhde the
mukammal zindagi kar ke
wo sab qabr mein soe hain
tumhaara dukh mere sine mein lekin
ab bhi zinda hai
jawan hota hi jata hai
ye dukh kam kyun nahin hota
meri jaanan
ab itni muddaton mein
tum bhi shayad
bhul baithi ho
mere sab dost rishta-dar
lakhon mil aage hain
safar mein zindagi ke
magar main rah gaya kirdar
tanha
is kahani mein
ye dukh kam kyun nahin hota
meri jaanan

taKHliq

By

wo mujh se kahti thi
mere shair
ghazal sunao
jo an-suni ho
jo an-kahi ho
ki jis ke ehsas
an-chhue hon
hon sher aise
ki pahle misre ko
sun ke
man mein
khile tajassus
ka phul aisa
misal jis ki
adab mein sare
kahin bhi na ho
main us se kahta tha
meri jaanan
ghazal to koi ye kah chuka hai
ye moajiza to
khuda ne mere
dua se
pahle hi kar diya hai
tamam aalam ki
sab se pyari
jo an-kahi si
jo an-suni si
jo an-chhui si
hasin ghazal hai
wo mere pahlu mein
jalwa-gar hai

rog

By

mujhe malum hai
mujh se
mere is rog se
mere
sabhi apne pareshan hain
meri
timar-dari se
meri biwi
mere bachche
bahut tang aa chuke hain ab
ye bilkul
saf likkha hai
sabhi chehron pe ke
wo ab
bahut
be-rabt hain mujh se
magar ye farz-e-akhir hai
nibhana hai
zamana hai
dikhana hai
sabhi tayyariyan
lag-bhag
mukammal ho chuki hongi
dawaon ke sabhi
kharche ke
mere final bil par
bhi discuss
ho chuki hogi
bade bete ne
chhote ko
kafan ki zimmedari
saunp di hogi
kahan se
kaise lana hai
wo khud
masruf hoga
baad marne ke
mere
jo kaam hone hain
unhen anjam dene mein
jagah bhi qabr ki
lag-bhag
muqarrar
ho gai hogi
faqat
ab muntazir hain sab
ki
kis lamha
qaza aae
kate zanjir
jis se
main ne
sab ko bandh rakkha hai

parfum

By

tere parfum ki khushbu
meri jaanan
hamare wasl par pahle
gale lagne se
mere fawourite
sweater pe
mere sath aai thi
ye tere pyar ki
tan pe mere
pahli nishani thi
jise ab tak
hifazat se
meri sari
mohabbat se
saja ke main ne rakkha hai
ye khushbu chhut na jae
isi dar se
dobara
main ne us sweater ko
pahna hai
na dhoya hai

nostalgia

By

wo jab naraaz hoti thi
to apne garden
mein ja ke mujh ko
phone
karti thi
satane ke liye mujh ko
wo kahti thi
bahut banne lage ho tum
maza tum ko chakhaungi
tumhaari wo jo gudiya hai mere andar
main us ki
ungliyon mein saikdon kante
chubhaungi
rulaungi
main kahta tha
agar tum ne
meri pyari si gudiya ko
rulaya to
qasam se main
tumhaara wo jo babu hai
mere andar
main us ki
jaan le lunga