wo but mubtala-talab mehr-talab wafa-talab

wo but mubtala-talab mehr-talab wafa-talab
ye dil aashna-talab jaur-talab jafa-talab
yaad nahin unhen zara tira-dilon ka khun-baha
hain teri chashm-e-dast-o-pa surma-talab hina-talab
basta-e-intishaar hain talib-e-zulf-e-yar hain
us ke siyahkar hain ranj-talab bala-talab
rahti hai dil mein muttasil aatish-e-ranj mustaqil
roz-e-awwal se hai ye dil gham-talab aashna-talab
raat-din us ka dagh-e-ah rakhta hai mere dil se rah
'mehr' hain jaise mehr-o-mah nur-talab ziya-talab

wo bazm-e-ghair mein ba-sad-waqar baiThe hain

wo bazm-e-ghair mein ba-sad-waqar baithe hain
hum un ke ghar hama-tan intizar baithe hain
shabih-e-zulf-e-pareshan jo hum banane lage
ruke hain uljhe hain bigde hain yar baithe hain
jise khayal kiya ishq se nahin khali
tamam talib-e-didar-e-yar baithe hain
hum us ki bazm mein hain sang-e-farsh ke manind
ye jabr baithe hain be-ikhtiyar baithe hain
wo rashk-e-mehr hai ai 'mehr' charkh-e-chaarum par
hum iztirab mein kyun zarra-dar baithe hain

tur-e-dil KHarab bana par bigaD gaya

tur-e-dil kharab bana par bigad gaya
go shisha-e-sharab bana par bigad gaya
lipta jo us se khwab mein main aankh khul gai
kaam ai qusur-e-khwab bana par bigad gaya
har-chand misl-e-khana-e-duniya-e-be-sabaat
main khanuman-kharab bana par bigad gaya
mumkin hui na tere pasine se hamsari
kis kis tarah gulab bana par bigad gaya
pursish ke sath afw bhi ai 'mehr' tha sharik
daftar dam-e-hisab bana par bigad gaya

thi nazare ki ghat aankhon mein

thi nazare ki ghat aankhon mein
kat gai sari raat aankhon mein
dekho un aankhon ki sukhan-goi
hai shararat ki baat aankhon mein
talkh baaten hain mithi nazren hain
zahar munh mein banat aankhon mein
rona qismat mein hai marun kyunkar
hai ye aab-e-hayat aankhon mein
wo jo dekhe jiyun na dekhe marun
hai hayat-o-mamat aankhon mein
dekhiye chashm-e-afw-e-rahmat se
'mehr' ki hai najat aankhon mein

sine mein aag aankh su-e-dar lagi rahe

sine mein aag aankh su-e-dar lagi rahe
kaam intizar-e-yar mein ai dil yahi rahe
pahlu ke sath chaak-e-jigar bhi zarur hai
khanjar ke sath ek qarauli lagi rahe
dawat mah-e-siyam ki lazim hai zahido
das bis rose mashghala-e-mai-kashi rahe
ai tifl dar hai chashm-e-bad-e-pir-e-charkh ka
haikal zarur tere gale mein padi rahe
so lutf-e-wasl uthaenge ek aur le ke nind
ehsan hai jo murgh-e-sahar chup abhi rahe
tin aasmanon se nahin chhupta hai aaftab
kab ek naqab se teri surat chhipi rahe
aao na mere ghar to na jao kisi ke ghar
meri khushi rahe na tumhaari khushi rahe
sone ke waqt ai gul-e-tar itr kya zarur
teri gali mein raat ko champa-kali rahe
hukm-e-sharab de to dua dun ki ai faqih
maston ke hath se teri izzat bachi rahe
ye gharra-e- se wafur-e-sharab ho
khali ke baad tak bhi tabiat bhari rahe
khali na koi sher ho bandish ke nur se
ai 'mehr' aalam-e-ghazal-e-'anwari' rahe