apna duniya se safar Thahra hai

apna duniya se safar thahra hai
gosha-e-qabr mein ghar thahra hai
hijr mein zist ko kahte hain maut
nafa ka nam zarar thahra hai
dil mera us ka taraf-dar hua
jo idhar tha wo udhar thahra hai
aur andher hua chahta hai
surma manzur-e-nazar thahra hai
likh hawa-o-hawas-e-wasl ai dil
qasid-e-baad-e-saba thahra hai
dekhen donon mein hawa kis ki bandhe
abr ai dida-e-tar thahra hai
ghar jo us mah ka bana hai ai 'mehr'
dil mera mah-e-nigar thahra hai

apni aankhon se jo wo ojhal hai

apni aankhon se jo wo ojhal hai
dil tadapta hai jaan bekal hai
phuljadi hai izar-band nahin
naf se panw tak jhala-jhal hai
na chhalawe mein hai na bijli mein
teri raftar mein jo chhalbal hai
nazuki mein safa mein bu mein wo jism
phul hai aaina hai sandal hai
dor tar-e-shuaa hai ai 'mehr'
aaftab us pari ka takkal hai

be-jurm-o-be-gunah gharib-ul-watan kiya

be-jurm-o-be-gunah gharib-ul-watan kiya
hum ko watan se shah gharib-ul-watan kiya
ghurbat ki sham ulfat-e-gesu mein dekhiye
us dil ne hum ko aah gharib-ul-watan kya
us par na padti aankh na chhutta kabhi watan
bas tu ne ai nigah gharib-ul-watan kiya
dushman na yun ho dost ne jis tarah se hamein
ba-haalat-e-tabah gharib-ul-watan kiya
ai 'mehr' hum ko charkh ne gardish se roz-o-shab
manind-e-mehr-o-mah gharib-ul-watan kiya

hijr hai dil mein KHak uDti hai

hijr hai dil mein khak udti hai
sadr-e-mahfil mein khak udti hai
hai jo mah-e-siyam ai saqi
kya hi mahfil mein khak udti hai
wahi dil-juiyan hain baad-e-fana
par mere dil mein khak udti hai
wo jo aata nahin nahane ko
bahr-o-sahil mein khak udti hai
tere jalwe se nur ke badle
mah-e-kaamil mein khak udti hai
jis ko tujh se ghubar hai ai 'mehr'
us ki mahfil mein khak udti hai

humne jo uski midhaton se kan bhar diye

hum ne jo us ki midhaton se kan bhar diye
goya ki kan lal kiya kan bhar diye
kya kya jafaen us but-e-bad-kesh ki kahun
majlis mein saikdon hi musalman bhar diye
mamur ho gaya teri dawat se sab makan
itr aur pan phul se dalan bhar diye
khali latafaton se talawwun tera nahin
sanea ne tujh mein rang sab ai jaan bhar diye
ai 'mehr' husn-e-lutf-e-mazamin kuchh aur hai
yun to sabhon ne sheron se diwan bhar diye