zaruri baat

By

nili nili sham ki khamoshiyon ke beach
kya sargoshiyan si karte hain shakhon se ye patte
jhuka hai gul kali ke rukh pe sari khushbuen le kar
bikhere zulf suraj ki taraf chal di hai ek badli
hawa athkheliyan karti hai ruk ruk kar darakhton se
zamin ko aasman ne le liya apni panahon mein
tum aa jate agar ghar aaj jaldi
mujh ko bhi tum se zaruri baat karna thi

sharmili KHamoshi

By

sham ki sharmili chup ko
ruh mein mahsus karte
kaam mein masruf hain hum dopahar se
dil ki aankhen dekhti hain gahri gahri sabz shakhon ko
jo baithi hain khamoshi se
kiye kham gardanen apni
kisi dulhan ki surat
sar pe odhe aasman ki surmai chunari
sitare jis mein tanke ja rahe hain
hum apne is tasawwur par khud hi muska rahe hain

sham ki barish

By

kaun se koh ki aad mein li khurshid ne ja kar aaj panah
chou-tarfa yalghaar si ki hai abr ne bhi ta-hadd-e-nazar
dhime chalte kale baadal udti si ujli badli
raqsan raqsan jhalak dikha kar rah jati hai barq kabhi
patton ke jhurmut mein sae kajlae sharmae se
phul halimi se sar kham aur kaliyan kuchh sharmai sin
danista barish mein udte phirte aawara tair
yahan wahan baithe kitne bhigin chup-chap se khush ho kar
bijli ki manus kadak shah-zor garaj ye baadal ki
ab ke hum ne kitni dhupen is mausam ki rah taki

sham ka sahar

By

abhi parchhaiyan unche darakhton ki
juda lagti hain rang-e-asman se
zara pahle gaya hai ek parinda bagh ki jaanib
udhar se aane wale ek tayyare ki rangin batiyan
raushan nahin utni
wo nikli hain sabhi chamgadaden apne thikanon se
bada mubham sa aaya hai nazar zohra falak ke beach
t kozi ke niche hai garm ab bhi bacha pani
kisi ne mujh ko andar se nahin aawaz bhi di
main
zara baramde mein aur rah lun
fusun mein sham ke prawasi bah lun

shafaq-gun sabza

By

badi taklif thi tahrir ko manzil pe lane mein
tanaw ka ajab ek jal sa phaila tha chehre par
khinche the abruon mein sidhe khat
peshani par aadi lakiren thin
khamida hote gahe lab
kabhi mizhgan ulajh padti thin baham
gira kar parda-e-chashm apni aankhon par
gharq ho jati sochon mein
ki afsane mein diwane ka kya anjam likkhun
aur usi mein dopahar dhal gai
nazar khidki ki jaanib jab uthi to
dekha sham aati hai azmat se
shajar patte ajab se nur mein raushan hain
shamil hain bahut se rang jis mein
qurmuzi kirnon ne
sabze ko shafaq-gun sa munakis kar ke
malakuti faza mein dhaal kar
meri nigahon tak badi ujlat se laya hai
main us ko dekhne mein gar na kuchh pal khud ko gum karti
to mathe ke shikan chehre pe chhaya ye tanaw
be-sukun aankhen
sabhi mil kar mere dil ko bujha dete