aankh dikhlane laga hai wo fusun-saz mujhe

aankh dikhlane laga hai wo fusun-saz mujhe
kahin ab khak na chhanwae ye andaz mujhe
kaise hairan the tum aaine mein jab aankh ladi
aaj tak yaad hai is ishq ka aaghaz mujhe
samne aa nahin sakte ki hijab aata hai
parda-e-dil se sunate hain wo aawaz mujhe
tiliyan tod ke nikle sab asiran-e-qafas
magar ab tak na mili rukhsat-e-parwaz mujhe
par katar de are sayyaad chhuri pherna kya
mar dalegi yunhi hasrat-e-parwaz mujhe
zer-e-diwar-e-sanam qabr mein sota hun falak
kyun na ho tala-e-bedar par ab naz mujhe
be-dhadak aae na zindan mein nasim-e-wahshat
mast kar deti hai zanjir ki aawaz mujhe
parda-e-hijr wahi hasti-e-mauhum thi 'yas'
sach hai pahle nahin malum tha ye raaz mujhe

aap mein kyunkar rahe koi ye saman dekh kar

aap mein kyunkar rahe koi ye saman dekh kar
sham-e-ismat ko bhari mahfil mein uryan dekh kar
dil ko bahlate ho kya kya aarzu-e-kham se
amr-e-na-mumkin mein goya rang-e-imkan dekh kar
kya ajab hai bhul jaen ahl-e-dil apna bhi dard
husn-e-mastana ko aakhir mein pashiman dekh kar
dhundte phirte ho ab tute hue dil mein panah
dard se khali dil-e-gabr-o-musalman dekh kar
dil jala kar wadi-e-ghurbat ko raushan kar chale
khub sujhi jalwa-e-sham-e-ghariban dekh kar
imtiyaz-e-surat-o-mani se begana hua
aaine ko aaina hairan ko hairan dekh kar
pairahan mein kya sama sakta habab-e-jaan-ba-lab
hasti-e-mauhum ka khwab-e-pareshan dekh kar
sabr karna sakht mushkil hai tadapna sahl hai
apne bas ka kaam kar leta hun aasan dekh kar
aur kya hoti 'yagana' dard-e-isyan ki dawa
kya ghazal yaad aai wallah fard-e-isyan dekh kar

aap se aap ayan shahid-e-mani hoga

aap se aap ayan shahid-e-mani hoga
ek din gardish-e-aflak se ye bhi hoga
aankhen banwaiye pahle zara ai hazrat-e-qais
kya inhin aankhon se nazzara-e-laili hoga
shauq mein daman-e-yusuf ke udenge tukde
dast-e-gustakh se kya dur hai ye bhi hoga
lakhon is husn pe mar jaenge dekha-dekhi
koi ghash hoga koi mahw-e-tajalli hoga
husn-e-zati bhi chhupae se kahin chhupta hai
sat pardon se ayan shahid-e-mani hoga
hosh udenge jo zamane ki hawa bigdegi
chaar hi din mein khizan gulshan-e-hasti hoga
aur umdega dil-e-zar jahan tak chhedo
ye bhi kya koi khazana hai ki khali hoga
dil dhadakne laga phir subh-e-judai aai
phir wahi dard wahi pahlu-e-khali hoga
ye to farmaiye kya hum mein rahega baqi
dil agar dard-e-mohabbat se bhi khali hoga
ek chullu se bhi kya 'yas' rahoge mahrum
bazm-e-mai hai to koi sahab-e-dil bhi hoga

adab ne dil ke taqaze uThae hain kya kya

adab ne dil ke taqaze uthae hain kya kya
hawas ne shauq ke pahlu dabae hain kya kya
na jaane sahw-e-qalam hai ki shahkar-e-qalam
bala-e-husn ne fitne uthae hain kya kya
nigah dal di jis par wo ho gaya andha
nazar ne rang-e-tasarruf dikhae hain kya kya
isi fareb ne mara ki kal hai kitni dur
is aaj kal mein abas din ganwae hain kya kya
pahad katne wale zamin se haar gae
isi zamin mein dariya samae hain kya kya
guzar ke aap se hum aap tak pahunch to gae
magar khabar bhi hai kuchh pher khae hain kya kya
buland ho to khule tujh pe zor pasti ka
bade-badon ke qadam dagmagae hain kya kya
khushi mein apne qadam chum lun to zeba hai
wo laghzishon pe meri muskurae hain kya kya
khuda hi jaane 'yagana' main kaun hun kya hun
khud apni zat pe shak dil mein aae hain kya kya

agar apni chashm-e-nam par mujhe iKHtiyar hota

agar apni chashm-e-nam par mujhe ikhtiyar hota
to bhala ye raaz-e-ulfat kabhi aashkar hota
hai tunuk-mizaj sayyaad kuchh apna bas nahin hai
main qafas ko le ke udta agar ikhtiyar hota
ye zara si ek jhalak ne dil o jaan ko yun jalaya
teri barq-e-husn se phir koi kya do-chaar hota
aji tauba is gareban ki bhala bisat kya thi
ye kaho ki hath uljha nahin tar-tar hota
wo na aate fatiha ko zara mud ke dekh lete
to hujum-e-'yas' itna na sar-e-mazar hota