zindagi ko shoabada samjha tha main

zindagi ko shoabada samjha tha main
pattharon ko aaina samjha tha main
dhup ki yurish thi har ek samt se
saya-e-diwar se lipta tha main
aaine hi aaine the har taraf
phir bhi apne aap mein tanha tha main
hadson se khelne ke bawajud
aaj bhi waisa hun kal jaisa tha main
rose zakhmi hota tha mera badan
pattharon ke shahr mein rahta tha main
umr-bhar apne taaqub mein 'zafar'
apne hi sae se bas uljha tha main

zindagi ko kar gaya jangal koi

zindagi ko kar gaya jangal koi
le gaya khushiyon ka meri pal koi
dhans raha hai har qadam mera yahan
rah mein darpesh hai daldal koi
koi kankar phenkne wala nahin
kaise phir ho jhil mein halchal koi
zindagi thi ek sahra ki tarah
zindagi ko kar gaya jal-thal koi
hosh bhi apna nahin rahta mujhe
kar raha kitna 'zafar' pagal koi

wo nahin uski magar jadugari maujud hai

wo nahin us ki magar jadugari maujud hai
ek sahar-alud mujh mein be-khudi maujud hai
saf-ba-saf dushman hi dushman hain mere chaaron taraf
hausla dekho ki phir bhi zindagi maujud hai
bujh gai hai bastiyon ki aag ek muddat hui
zehn mein lekin abhi tak shoalagi maujud hai
baad-e-sarsar chal rahi hai aur us ke bawajud
phir bhi shamon mein abhi tak raushni maujud hai
hai ajab eajaz ye us ki mohabbat ka 'zafar'
jagti aankhon mein khwab-e-zindagi maujud hai

sar-burida hua muqabil hai

sar-burida hua muqabil hai
sab ki aankhon mein khauf shamil hai
tha muhafiz kabhi yahi insan
aaj insaniyat ka qatil hai
bastiyan phunkna jalana ghar
kya yahi aadmi ka hamil hai
waqt kab us ka sath deta hai
rose farda se jo ki ghafil hai
jis ne bakhsha tha zindagi ko farogh
ab wo dahshat-garon mein shamil hai

sahra ka safar tha to shajar kyun nahin aaya

sahra ka safar tha to shajar kyun nahin aaya
mangi thin duaen to asar kyun nahin aaya
dekha tha jise hum ne kabhi shauq-e-talab mein
mahtab sa wo chehra nazar kyun nahin aaya
hum log to marte rahe qiston mein hamesha
phir bhi hamein jine ka hunar kyun nahin aaya
lagta hai muqaddar mein mere saya nahin hai
muddat se safar mein hun to ghar kyun nahin aaya
jis ke liye baithe the bichhae hue aankhen
mahfil mein abhi tak wo bashar kyun nahin aaya
mausam to har ek shakh ke khulne ka 'zafar' tha
phir un pe koi barg-o-samar kyun nahin aaya

rabta kyun rakhun main dariya se

rabta kyun rakhun main dariya se
pyas bujhti hai meri sahra se
hai masail se ab wahi uljha
rishta joda hai jis ne duniya se
khushiyan imroz ki wo pata hai
jo ki ghafil nahin hai farda se
jis ko hasil thin neamaten sari
ab hai mahrum aab-o-dana se
hai khuda ki nazar mein aali wahi
khush-dili se jo milta adna se
thi jise saqi se 'zafar' nisbat
tishna lauta wo baada-khana se