aaina dekhen na hum aks hi apna dekhen

aaina dekhen na hum aks hi apna dekhen
jab bhi dekhen to hum apne ko akela dekhen
mom ke log kadi dhup mein aa baithe hain
aao ab un ke pighalne ka tamasha dekhen
tab ye ehsas hamein hoga ki ye khwab hai sab
band aankhon ko karen khwab ki duniya dekhen
baat karte hain to nashtar sa utar jata hai
ab wo lahje ki tamazat ka khasara dekhen
tu ne nazren na milane ki qasam khai hai
aaina samne rakh kar tera chehra dekhen
koi bhi shai hasin lagti nahin jab tere siwa
ye bata shahr mein hum tere siwa kya dekhen
qatl aur khun ke manazir hain jo basti basti
kaise insanon ki duniya ka tamasha dekhen
itna virani se rishta hai 'zafar' apna ab
khwab ki duniya mein bhi sahra hi sahra dekhen

chamka jo tirgi mein ujala bikhar gaya

chamka jo tirgi mein ujala bikhar gaya
nanha sa ek jugnu bada kaam kar gaya
wo nind ke safar mein to makhmur tha bahut
aankhen khulin to khwab ke manzar se dar gaya
aansu the is qadar meri chashm-e-malal mein
har gosha gosha shahr ka ashkon se bhar gaya
phaili hui hai chandni ehsas mein mere
ye kaun meri zat ke andar utar gaya
har shakhs hi kamanden 'zafar' phenkne laga
ek pal ke waste jo khala mein thahar gaya

dariya guzar gae hain samundar guzar gae

dariya guzar gae hain samundar guzar gae
pyasa raha main kitne hi manzar guzar gae
us jaisa dusra na samaya nigah mein
kitne hasin aankhon se paikar guzar gae
kuchh tir mere sine mein paiwast ho gae
kuchh tir mere sine se bahar guzar gae
aansu bayan karne se qasir rahe jinhen
kya kya na zakhm zat ke andar guzar gae
ek chot dil pe lagti rahi hai tamam shab
dil ki zamin se yaadon ke lashkar guzar gae
wo zabt tha ki aah na nikli zaban se
dil pe hamare kitne hi khanjar guzar gae
manzil thi wo ki hoti gai dur hi 'zafar'
kitne hi rah mein mil ke patthar guzar gae

dil-o-nigah ko viran kar diya maine

dil-o-nigah ko viran kar diya main ne
shikast-e-khwab ka elan kar diya main ne
jo tir aae the us ki taraf se sine par
saja ke zakhmon ka gul-dan kar diya main ne
ghamon ka taj mere sar pe jab se rakkha hai
khud apne aap ko sultan kar diya main ne
na koi phul hi rakha na aarzu na charagh
tamam ghar ko bayaban kar diya main ne
wo chahta tha ki sab kuchh luta ke zinda rahun
lo aaj pura ye arman kar diya main ne
main zad pe tiron ke khud aa gaya hun aaj 'zafar'
tere nishane ko aasan kar diya main ne

ek ek pal tera nayab bhi ho sakta hai

ek ek pal tera nayab bhi ho sakta hai
hausla ho to zafar-yab bhi ho sakta hai
biphri maujon se ulajhne ka saliqa hai agar
ye samundar kabhi payab bhi ho sakta hai
umr tapte hue sahra mein basar ki jis ne
to sarabon se wo sairab bhi ho sakta hai
aap dariya ki rawani se na uljhen hargiz
tah mein us ke koi girdab bhi ho sakta hai
lakh moti hi sahi waqt ki gardish mein kabhi
qimti kitna ho be-ab bhi ho sakta hai
jis ko majbur hua hai to khurachne pe 'zafar'
teri aankhon ka hasin khwab bhi ho sakta hai

ek jumbish mein kaT bhi sakte hain

ek jumbish mein kat bhi sakte hain
dhaar par rakkhe sab ke chehre hain
ret ka hum libas pahne hain
aur hawa ke safar pe nikle hain
main ne apni zaban to rakh di hai
dekhun patthar ye nam bhi hote hain
aise logon se milna-julna hai
sanp jo aastin mein pale hain
koi pursan nahin ghamon ka 'zafar'
dekhne mein hazar rishte hain