muzmahil hone pe bhi KHud ko jawan rakhte hain hum

By

muzmahil hone pe bhi khud ko jawan rakhte hain hum
ek sar hai jis pe saton aasman rakhte hain hum
hum gareban-chaak logon ko tahi-daman na jaan
le qimar-e-ashiqi mein naqd-e-jaan rakhte hain hum
koi to aakhir chala aaega pursish ke liye
tu na aaega to marg-e-na-gahan rakhte hain hum
ehtiram-e-gham se hain sukhe jaziron ki tarah
warna in aankhon mein bahr-e-be-karan rakhte hain hum
ishq mein zauq-e-takallum hai halakat-afrin
aarzu bhi ehtiyatan be-zaban rakhte hain hum
mah-washon ke aarizon mein dekhte hain apna aks
allah allah apna saya bhi kahan rakhte hain hum
lakh hon phaili hui manzil-ba-manzil zulmaten
sath apne mashal-e-husn-e-butan rakhte hain hum

kuchh bas na chala jazba-e-KHud-kaam ke aage

By

kuchh bas na chala jazba-e-khud-kaam ke aage
jhukna hi pada us but-e-badnam ke aage
ek aur bhi hasrat hai pas-e-hasrat-e-didar
ek aur bhi aaghaz hai anjam ke aage
aa aur idhar koi tajalli ki kiran phenk
baithe hain gada tere dar-o-baam ke aage
ye ishq hai bazicha-e-atfal nahin hai
kuchh aur bhi hai kucha-e-asnam ke aage
yun un ki jafaon se mili hum ko basirat
hum jhuk na sake gardish-e-ayyam ke aage
din dhalne laga dil-zadagan dil ki khabar lo
ek silsila-e-hijr bhi hai sham ke aage
ab kuchh bhi nahin hasil-e-tadbir-e-mohabbat
ab kuchh bhi nahin nama-o-paigham ke aage
ek sehr sa tari tha 'zahir' ahl-e-khirad par
the mohr-ba-lab husn-e-dil-aram ke aage

har rose hi imroz ko farda na karoge

By

har rose hi imroz ko farda na karoge
wada ye karo phir kabhi wada na karoge
ye man liya ahd-e-wafa bhul chuke ho
kya bhul ke bhi tum hamein chaha na karoge
mahfil se hi uth jaenge hum aise qaba-chaak
wahshat ka hamari kabhi shikwa na karoge
achchha tha ki jab aariza-e-hijr nahin tha
achchha hai ki ab tum kabhi achchha na karoge
jis raaz mein shamil hai hamara bhi fasana
us raaz ko kya hum pe bhi ifsha na karoge
mar jaega dil hasrat-e-anwar-e-sahar mein
be-parda agar tum rukh-e-zeba na karoge
kya aur na tha tark-e-talluq ka bahana
sunte hain ki ab tum hamein ruswa na karoge
samjho to 'zahir' un ki nigahon ke ishaare
kya aaj bhi izhaar-e-tamanna na karoge

hain bazm-e-gul mein bapa nauha-KHwaniyan kya kya

By

hain bazm-e-gul mein bapa nauha-khwaniyan kya kya
bahaar chhod gai hai nishaniyan kya kya
tamam umr gul-o-mul ke darmiyan guzri
tamam umr rahin sar-giraniyan kya kya
wo shakhs-e-itr-badan jab bhi samne aaya
dil-o-nazar pe huin gul-o-fashaniyan kya kya
khabar na thi yahi wajh-e-sukun-e-jaan hogi
nigah-e-yar se thin bad-gumaniyan kya kya
tapak ke aankh se tufan utha diye jis ne
is ek ashk mein thin be-karaniyan kya kya
huzur-e-yar se jab izn-e-guftugu na mila
sukhan-taraaz huin be-zabaniyan kya kya
har ek dard ko darman bana diya us ne
jafa ke bhes mein thin mehrbaniyan kya kya
wo husn aaj bhi hila-gari mein yakta hai
dil-e-gharib sunega kahaniyan kya kya
us ek jamal-e-gurezan ki justuju mein 'zahir'
kharab-o-khwar hui hain jawaniyan kya kya

firaq-e-yar ke lamhe guzar hi jaenge

By

firaq-e-yar ke lamhe guzar hi jaenge
chadhe hue hain jo dariya utar hi jaenge
tamam raat dar-e-mai-kada pe kati hai
sahar qarib hai ab apne ghar hi jaenge
tu mere haal-e-pareshan ka kuchh khayal na kar
jo zakhm tu ne lagae hain bhar hi jaenge
miyan-dar-o-shabistan-e-yar baithe hain
jidhar ishaara-e-dil ho udhar hi jaenge
julus-e-naz kabhi to idhar se guzrega
kabhi to dil ke muqaddar sanwar hi jaenge
yahi rahega jo andaza-e-na-shanasai
tumhaare chahne wale to mar hi jaenge
abhi chhidi bhi na thi dastan-e-ahd-e-wafa
kise khabar thi ki wo yun mukar hi jaenge
jamal-e-yar ki nadida khalwaton mein 'zahir'
agar gae to ye aashufta-sar hi jaenge

ab meri yaad ko daman ki hawaen dena

By

ab meri yaad ko daman ki hawaen dena
main gaya waqt hun mujh ko na sadaen dena
sakht be-jalwa-o-be-nur hain lamhat-e-firaq
dil bahal jaega chehre ki ziyaen dena
hijr ki pyas se jalte hain bagulon ke dahan
khushk sahraon ko zulfon ki ghataen dena
yaad aate hain jawani ke junun-khez ayyam
muztarib ho ke bayaban ko sadaen dena
phir qadam ku-e-malamat ki taraf utthe hain
mere maula mere hisse ki khataen dena
jama-zebi pe teri warna lagega ilzam
ishq ke paikar-e-uryan ko rawaen dena
us ka mujh par bada ehsan-e-masihai hai
mere yaro mere qatil ko duaen dena